Read daasanach He Ekeny Gál Alb Fimiká 23 Bible Online

He Ekeny Gál Alb Fimiká 23 - daasanach bible

He Ekeny Gál Alb Fimiká 23

¹Báulo gál guguđo kinaal gaa dhaay, kieye, Nyaaramchú, yáá innum Waaˈgiet hát ˈdabaanká gaa seseme, ˈjíig kúlích ke gaa ijóóllá đig, muí gáál yie.

²Aalé máá méte suoryo-, giri Ananías léká Báulo gállé hí lag ˈgieká geey, kieye, Mú af gíl gaa ˈdóo, yie.

³Aalé Báulo mú geey, kieye, Kó hol sasallóol! Waag hai ko ˈdaraanna. Kúún in káána ˈdeeny máre hemuriti ál kinaal ki iđa, ye ki iđimicha? Hemurít in el af gaa taanne, Mú af gíl gaa ˈdóo, cheedhe háluke!

⁴Gál Báulo lag ˈgieká kieye, Kúún máá méte suoryo-, Waaˈgietká chácháˈda? mú yie.

⁵Aalé Báulo gáál ˈdéé hol ˈdú nie, kieye, Nyaaramchú, yáá ˈdeeney. Mu hát máá méte suoryo-, Waaˈgietallá yáá muog. Hé Warˈgat Waaˈgiet úba hí hote, giri kieye, Gálkú máállé kansichká ˈdaalle ha hé ˈdeewká ki hôn,[52] chieká, Báulo hí gáál yie.

⁶Aalé Báulo gaal hát ˈbaal hí gál Saˈdukaay-, ubaa hí gál Farisaay-, onnoyká mu káru af ˈdérká ki geey, kieye, Nyaaramchú, yú máá Farisaay, tá yú úba iny máá Farisaay. He iiy yeen yú ˈguo-, giri gál kufoká Waag hí uushim yiem gáá ˈdeđichoká ˈdaalle ˈdugaka in yú hí metééllá gaa yaalla, hí ye ˈdéé ki iđimicha, muí gáál yie.

⁷Aalé mu hatal yieká gál Farisaayká ubaa gál Saˈdukaayká ˈdee hí eiy yie, eiy ˈgite.

⁸Gál Saˈdukaayká he gál kieye, Gál kufoká hé uushim yiem ma gáá ˈdeˈdeminy, yegetká, ubaa kieye, Biiy hé gál ˈgasso-, urruká ubaa gál urietká mán, yegetká. Gál Farisaay íín hé gál Saˈdukaay hí điidhééllá hát he biiy gaa ijoká he iiy yie.

⁹Aalé gálaat đo súm kúóˈd ˈdoy, gál Farisaay nyatalaamká les gaa kie, ˈdéé hát chira saritiká huogodhe, kieye, Máállá hé ˈdeew-, he ˈdeeney-, nyí gaa argiyyeká mán. Mú káána máá mákárta-, urietká, muuninyka, máá ˈgasso-, urruká hí ka géeyka it ôg? gaalí gáál yie.

¹⁰Aalé gééycho kinaal kúfach chieká, máá yuoy mé ki yielká Báulo gáál ki kiadhe, mu hát máá gaalí eiy chirat. Aalé mu yuoyle geey, kieye, Sedhíe, mú gáál af kí ridhdhíe, mú ény kúnnaa yuoyóótíá ka sidháa, gáál yie.

¹¹Aalé kúlích kinaal chúúrélle Máá Guđoká Báulo láá ki ˈdie, kieye, Ha binenêny, hát tikiˈde giri ye Yerúsalem gaa ˈdiiyeennééllá, ˈjien Rooma úba ha ye gaa ˈdiyeenne, Máá Guđoká hí mú yie.

¹²Bííy geđo ka biˈdeká gál Yuuˈdi giri Báulo nebeneyká sul nie, hol ˈdéé mé ki hodhe, kieye, ˈDaab ke Báulo ma yíésinyká hé ke ˈguom ma kokony ubaa ke he ma igiminy, hol yie.

¹³Gál sullééllá nannieká hé tomon afur, tá af ˈgie.

¹⁴Gaal gál guguđo-, suoryoká ubaa karu ˈdeemoká ˈdú sedhe, kieye, Nyíín nyáá nyí hol he mé ki hote, ˈdaab nyí Báulo ma chíésinyká nyáá nyí hé níínní af đig cheetoká mán.

¹⁵Aaléka itín ubaa gál káruká máá giri yuoy mé ki yaalká ˈdéé ˈdú láa, muí Báulo ˈdú gáá eew, hé hí mú geđichaká, itín kieye, Mú nyí hát ˈdabaanká ˈdéé gaa eete, yiedhíe. Nyíín íín tagano nyí ˈdeenne, mu hátlé ál ma ka hílinyká mú ha nyí cheese, gaalí yie.

¹⁶Aalé Báulo iny nyaarle sulléél ˈdeenyle maale. Mu đo ény yuoyo-, Báulo hí gaa ijeká sedhe, Báulo sul fayamle shie.

¹⁷Aalé Báulo gál yuoy kúˈd taat met ki ˈgieká mú tikiˈd ká vie, kieye, Máá ruorichallá máá kíchia hí mé ki yaalká ˈdú éeb, mu hé mú geđuoká ˈgaa, yie.

¹⁸Aalé máá kinaal máá ruorich kinaal máá guđoká ˈdú eey, kieye, Báulo giri hiigin gaa ijóóllá ye vie, kieye, Máá ruorichallá máá kíchia hí mé ki yaalká ˈdú éeb, mu hé mú geđuoká ˈgaa, ye yie, mú yie.

¹⁹Máá giri guđoká máá giri ruorich kinaal gíl gaa chiˈde, mú taak eedhdhe, mú heete, kieye, He ˈgayya ye ká geđicha? mú yie.

²⁰Aalé máá ruorich kinaal kieye, Gál Yuuˈdi hé hol ˈdéé af gáá maale, giri ko hegeset-, kuun beríka Báulo gáál karullé ˈdeemoká met egeyyo-, giri mú ˈdeenyle kerka gaalí tág ˈgas egewká.

²¹Gaal hai ko af far ˈdú gogónson, mú gáál shíiny. Mu gál tomon afur af ˈguoká met haí higila. Gaal hé hol ˈdéé mé ki hodhe, ˈdaab he mú ma yíésinyká hé bie ma igiminy ubaa hé hé geere ma kokony. Gaal lulle hé ˈdeenyle tág kodhdhe, ˈdeeny kua tákáma egese, máá ruorich kinaal hí mú yie.

²²Aalé máá guđo kinaal máá giri ruorichká hinyate, kieye, ˈDeeny ye ka geeychééllá, hát ye ˈdu gáá sitééllá ha máádhat hí mááliny, mú yie, đo mú hay, mu sedhe.

²³Aaléka, máá giri guđo-, yuoy mé ki yiel kinaal gál hí el ˈgie-, yuoy kúˈd taat met ki ˈgieká naam vie, kieye, Sedhíe, yuoy ˈdaaballá tág kóo: Yuoy aađaká kúˈd naam hoyyíe, yuoy fára ki seseenká tomon tiiya hoyyíe, héétí yuoy nannoká kúˈd naam hoyyíe. Chúúrééllá ebisam he ˈgiˈgidheka haí keenne, Kaisária mé haí nanniyya.

²⁴Báulo úba fára ki golóo, mú naanná ée-, mú máá guđo Felíki af ka kóo, muí gáál yie.

²⁵Aalé mu warˈgát Felíki hatal ˈdú veere:

²⁶Máá ˈdúwa guđo Felíki, naa! Yú he Kaláúˈdias giri Lúsias léká.

²⁷Máállá gál Yuuˈdi hí ˈgiliˈgay, onnônyka ha gaalí yegies. Mu máá Rooma yú maaleká in yú yuoychú eedhdhe, mú hile.

²⁸Aalé mú héllé mákárta-, he ˈdeeneyká ˈgásle yú mamaleká yú fede, in yú mú gáál karullé ˈdeemo-, Yuuˈdiká met eey.

²⁹Mú héllé gaalí af kaayká gáál nyátálle ˈdaallé he ki yaalla. Tá hé mú kúfach ubaa mú hiigin mé ki kokuo-, yú mú gaa argeká mán.

³⁰Mú sul oosle fayamle gaalí ye ka shieká in mú yú ko ali ˈdu gáá kaay. Yáá úba gál mú ˈdeenyle ˈguoká bííykú gíl kí helie, giri gaal ˈdeenylé mákárta-, ˈguoká ko ka geđuoká.

³¹Aalé yuoy giriká ˈdéé hát gaalí ki mureká el gaa veeˈde, warˈgát ubaa Báulo eedhdhe, chúúré kinaal leđuđugul ˈdie, ˈjíig Antibátiris ki fame.

³²Aalé biiy ka biˈdeká yuoy aađaká ubaa yuoy nannoká Báulo yuoy fára ki seseenká ˈdú hay, giri gaal mú ˈdaatí ki egewká. Gaal íín gáál hol gáá nadhe.

³³Yuoy fára ki seseen kinaal ˈjien Kaisaria ki faanneká gaal warˈgát máá giri guđo Felíki shie, Báulo mú gíl geer gaa kaay.

³⁴Aalé Felíki warˈgát tuoyká Báulo yiete, kieye, Kúún máá lés máre? mú yie. Aalé mu Báulo hát he máá lés Kilikia maaleká,

³⁵mu kieye, Gál kuun ko kataseká he állá kí fameka in yú ˈdeenykú nee kokoo, mú yie. Aalé mu yuoyle geey, giri gaal Báulo ˈbíl Heroˈde egew-, mú ál kinaal gaa ˈdeˈdeenká.