Read daasanach He Ekeny Gál Alb Fimiká 24 Bible Online

He Ekeny Gál Alb Fimiká 24 - daasanach bible

He Ekeny Gál Alb Fimiká 24

¹Ram chen he beeyyeká máá méte suoryo-, Ananías lééllá ubaa karu Yuuˈdi ˈdáá tikiˈd, tá máá hemuumurit Rooma óg-, gaalí Tartúllos yegie mare Kaisária mé nie. Gaal héllé Báulo af kaayká máá giri guđo Felíki léká ˈdú eedhdhe.

²Aalé Báulo gaalí ˈbíl geer ki vieká Tartúllos đo les gaa kie, giri Báulo héllé gaalí af kaayká Felíki met gaa hogodhoká. Aalé mu Felíki geey, kieye, Nyáá nyí naanna mé ˈdérká kansimkú gaa argiyye. ˈDaalim kua kúólle hé biiy metoká hol aˈgaˈd tág ki nanniyyoká hé lésallá in hol ki niiyye.

³Felíki, hééllá lullé ekeychééllá nyiin hát lullé nyí biiy lulle iiy gaa chie. Kó tág nyí ger gaa meeyche.

⁴Ebá ha ko súm ˈgorôny, nyí net shíish, ˈdéé hót kínyia um hí naamáállá nee kog.

⁵Máállá hát biiy ˈdeeneyká nyáá nyí kimisate. Mu hé gál Yuuˈdi les lulle gaa ijoká mángísle hol af maalít ká ridhdhe. Mu máá ény Nasaret gál hí el gaa veereká he mé ki yaalla.

⁶Mu ˈBíl Waaˈgieto úba he nyakarich hoy, in đo nyiin nyí ˈgiliˈgayye. [Mú onnônyka nyátál kínyia ˈgíéríchle nyí ki naate, nyí ˈdéé ki iđimiche,

⁷in đo Lúsias giri yuoy mé ki yaalká ká yimie, nyí mú af ki ridhdhe,

⁸gál mú ˈdeenyle ˈgúóllá he ki mure, giri gaal bííykú ká yiimetká.][53] Kúún dhúrkú mú heeseteka ˈdéé ˈgásle ha aargiˈda, hé nyí mú ˈdú hogotóóllá hát ˈdúwaká ha kiimisata, muí mú yie.

⁹Aalé gál Yuuˈdi máá ˈdéé hogodheká ˈdú fame, kieye, Hééllá lullé muí huogodhééllá hé ˈdúwa, yie.

¹⁰Aalé máá guđo Felíki Báulo gíl ki geey, giri mu hol ˈdéé ˈdú hogodhoká. Aalé Báulo mú geey, kieye, Kúún hát warram ilishká mángísallá gálle ˈdeem ki iđimicheká yáá óg. Yáá tág geer ye gaa meedhe, giri káána yú ko metééllá gaa yaal-, yú hol ˈdéé ˈdú hogodhóóllá.

¹¹Hát yú rám tomon tikiˈde a naama ˈgitéétíá Yerúsalem sedhe-, Waag gaa viviteká, eiy ha naasata.

¹²Gál ye ˈdeenyééllá luut kaayallá hé máá níínní ye arge-, yú gálaat ˈBíl Waaˈgiet geer ˈdeem nyí hol ˈdú nanniyye-, nyí hol ki fafalanneká mán. Yáá úba gáál énylé ˈdiiyiminyká ubaa gáál ˈjienlé nyesebim ˈdiˈdisie-, nyesebim gaa chuchure-, gaalí ye gaa argeká mán.

¹³Gaal íín dhúrle káána ye ˈdéé af kaayallá hé ˈdúwa ˈguo-, ko ka geeyoká mán.

¹⁴Tá hé ˈduwa! Waag héle eshim eshimchú hí viviteká in káána yú ˈgíérích Kiristo gaalí ˈgíérích hodho yegetallá ki vivita. Yú hemuumurit lullé Waag hí Móshe ka shiicheká ubaa he lullé gál Waag hí ˈdéé ka shigicheká hí veereká iiy yie.

¹⁵Yú úba hát tikiˈde gaal íín hí Waag iiy yíéllá Waag iiy yie, giri gál saas mánká ubaa gál saas ˈguoká met hullaalle Waag hí uushim yiem gáá ˈdeđichoká.

¹⁶In bar lúl yú lađama, giri yú innum Waaˈgiet ubaa innum gálaat ađááb hol ká ririatká.

¹⁷Aalé warram ilish yú Yerúsalem gaa lalayká hol ki sedheká, yú geđ Yerúsalem hol ˈdu gáá nadhe. Hé chia hol ˈdu gáá nadheká gál chia Yuuˈdi-, he maamannayká hé chia shiichoká ˈdú gáá sidhe, héétí suorró Waag ki ˈgaˈgale.

¹⁸Gaal ye ˈBíl Waaˈgiet geer gaa aargiro-, yú suor ˈgaˈgale kinaallá yú yáá kis ˈdaa hemurit kínyoka hol dhiire. Hééllá yú ekemetééllá yáá nyésébích níínní nyí hol af iđeká mán. Héétí úba yáá shalal níínní ali yé gáá ˈdeeyká mán.

¹⁹Gál Yuuˈdi Asia-, giri ˈbaal hí ye ˈdeenyééllá luut kaayallá íín dhúrle onnônyka állá he ije, hé mákárta-, yú ˈdeeneyká har ˈdúúw kátaka, metkú gaa hogodhe.

²⁰Aalé káána gaal ál gaa laʼ háluke, ebá gál állá ijóóllá af giri yú gaal ye ar met eeyká hé yú ˈdeeney-, gaalí ye gaa argeká hí ko ká geeyo.

²¹Tá hé tikiˈde gaalí ye ˈdú ˈdeđensetká taalle hééllá máámaʼ, giri yú af gaa gúch gáál met gaa hodhe-, yú kieye, Gál kufoká uushim yiem gáá ˈdímle ˈdugaka in yú metééllá gaa yaalla, hí ye ˈdéé ki iđimicha, yú gáál yieká? Báulo hí gáál yie.

²²Aalé Felíki giri ˈgíérích Yiesu kinaal onnoyká đo ˈdéé eiy mure, mu Báulo geey, kieye, Lúsias giri yuoy mé ki yaalká ká ˈjieka, af kinaallá in yú ˈdeenykú hol eiy gaa nannaa, mú yie.

²³Aalé Felíki máá yuoy mé ki yielká máállé hí el yielká geey, kieye, Báulo ˈbíl hiiginká álle ki chiˈdíe, tá haí híígin. Mú sheelle hí ˈdú gáá chiimet-, gaal hé mákárta úba mú ˈdú gáá sisidhoká haí ka rían, muí gáál yie.

²⁴Aalé ram hol ki sieteká Felíki ubaa minlé ini Yuuˈdi-, gaalí Đúrsila yegie mare hol ká eedhdhe. Mu Báulo gáál ali ˈdú fie. Mu iiy yeen ke Yiesu Kirísto iiy yeget-, Báulo hí ˈdiiyimeká nee koy.

²⁵Aalé Báulo gálaat hát ˈduwantiká ki ijoká ubaa gálaat hé ˈdeđewká hol gáá momoyoká, tá kúlích ká chiimeto gálaat Waag hí ˈdéé ki iđimichoká yaalmitle gáál geđieká, Felíki đo neey, Báulo geey, kieye, Aalé káánaka sí, af mákártaká ha yú ko ká veeme, mú yie.

²⁶Mu af kinaal Báulo hí gub les ki fafieká úba he fede. ˈDaa kinaal ˈdugaka in aadh lulle mu Báulo gálaat ali ˈdú fafie, mú hol geđie.

²⁷Aalé warram naam hí beeyyeká Bórkios Fésitos kara kansimo-, Felikiká ˈdú yíéđie. Felíki ˈdaa giri gál Yuuˈdi hí memeyo-, fedeká, mu Báulo ˈbíl hiiginká ki hay.