Read daasanach He Ekeny Gál Alb Fimiká 25 Bible Online

He Ekeny Gál Alb Fimiká 25 - daasanach bible

He Ekeny Gál Alb Fimiká 25

¹Aalé Fésitos lés Yuuˈdia kansimle eedhdheká, mu ˈjien Kaisaria ram seđ gaa rafe, đo kie, Yerúsalem mé nie.

²Ál kinaal gál guguđo-, suoryoká ubaa karu Yuuˈdiká mú ˈdú kie, gaal Báulo ˈdeenyle mú ˈdú eedhdhe.

³Gaal Fésitos súm gil ki efe, giri muí af veveet-, Báulo muí Yerúsalem ká egewká. Tá gaal íín ˈdeenylé he tág nanateká Báulo met higilo-, mú le hurt ki yegeská he fede.

⁴Aalé Fésitos gáál ˈdéé hol ˈdú nie, kieye, Báulo Kaisária gaalí ki hiigidhe. Yú úba rám gáá ˈjóbká ál kinaallá hol ˈdú naadha.

⁵Gál kíchia káruká ˈbaal ka báa, gáál nyí hol eete, gaal hé mu héllé mákárta-, ˈdeeđeneyká hí ál kinaallá gáá huogodho, muí yie.

⁶Mu rám síet ubaa tomon nyuoˈdoká ál kinaal gaa rafeká, đo kie, Kaisária hol ˈdú nadhe. Mu bííy éíy taaka ka biˈdeká karullé gálaat ˈdeem ki iđimuoká hol af ká yíéđie, gáál geey, giri Báulo gaalí met ka egewká.

⁷Aalé Báulo he ali kí ˈdieká, gál Yuuˈdi giri Yerúsalem gáá yimieká mú lag ki ˈdie, mú héllé mákárta burnay-, ˈdeđew-, muí ekemeyká huogodhe. Gaal héllé mú ˈdú huogodhe kinaal geđi el met mán.

⁸Aalé Báulo hol ˈdéé ˈdú huogodhe, kieye, Yáá hemuumurit Yuuˈdi hé níínní gaa ˈdeeneyká mán. Yáá úba ˈBíl Waaˈgiet ubaa máá guđo Káísar hé níínní ki ˈdeeneyká mán, yie.

⁹Aalé Fésitos ˈdaa giri gál Yuuˈdi hí memeyo-, fedeká, Báulo yiete, kieye, ˈDeenyéél ˈdugaka Yerúsalem seseen-, ál kinaal ye met ki ˈdeen-, yú ko ˈdéé ki iđimuoká kó feˈdo? muí yie.

¹⁰Aalé Báulo mú ˈdéé hol ˈdú nie, kieye, Yú ˈdaaka ál ye lé-, hemurit Kaisar hí ye ˈdeem ki iđimichoká yaalla, giri kuun ye ˈdéé ki iđimichoká. Kuun dhúrkú gál Yuuˈdi hát yú he ma ki ˈdeenênyká kó tág óg.

¹¹Har yú hé mákárta-, máádhat hí gaa kufunanká ˈdeeneyka, af kinaalka yáá kúfach ma điin. Tá hé gál Yuuˈdííllá hí ye luut kaayallá he hódho kátaka, af kinaalka hé máá níínní ye gálallá gíl geer gaa kakawká mán. Ye Káísar dhúrle ˈdú ée, mu hé ˈdeeny chiallá eiy nuo! yie.

¹²Aalé Fésitos gállé káruká hol ˈdeenyéél geeyká, mu Báulo geey, kieye, Káísar ye ˈdú ée, chíéllá, aaléka Káísar ha ˈdú seenne, Fésitos hí mú yie.

¹³Aalé ram hol ki sieteká máá kansich Agiríba ubaa nyaarlé Berníke Kaisária ki fame, Fésitos naa ˈdú sidhe.

¹⁴Aalé gaal ál kinaal ram ki kaadhdheká, Fésitos Agiríba fayam Baulo geey, kieye, Állá máá Felíki hí ˈbíl hiiginká kí hay mare hí gaa ija.

¹⁵Aalé af giri yú Yerúsalem sedheká gál guguđo-, suoryoká ubaa gál Yuuˈdi káruká ye mú ˈdeenyle ˈdu gáá eedhdhe, giri yú mú ˈdéé ki iđimuo-, ubaa mú ˈdéé điidhanká.

¹⁶Hé yú gáál geeyká, yú kieye, Hééllá hé hát nyátál Rooma muuniny. Máá Rooma ˈdaab gállé hí ˈdéé af kaayká metle hol ˈdéé ma ˈdú húógonká hé máá hí he ki ekemeyoká mán, yú yie.

¹⁷Aalé gáál nyí hol állá ˈdu gáá eeteká yáá ˈdéé ram ma ki ráfiny. Kúlích nyí gáá faanneká nyí rayye, biiy ká biˈdeká karuchú yú hol ˈdú gáá vie. Aalé yú Báulo gáál ali ˈdú fie, giri mú gaalí nyí met ká kokuoká.

¹⁸Aalé mú gállé giri hí ˈdéé af kaayká les gaa kieká gaal hé ˈdéé hót ˈdeew-, yú af ki raradheká ma ka hôn.

¹⁹Gáál ˈdeemlé kinaallá gáál nyátál Waaglé-, ubaa héétí máá kufe-, gaalí Yíésu yeget-, Báulo íín kieye, Hé luol, muí yeget mare, ˈdaallé he ki yaalla.

²⁰ˈDeenyééllá ˈgíéríchlé ke eiy ki nannuoká yú af ˈdabeká, yú mú heete, har mu Yerúsalem seseen-, yú ál kinaal mú ˈdéé ki iđimuoká muí fedoka.

²¹Aalé Báulo kieye, Ye Káísar ˈdú ée, yieká, in yú ˈdéé mure, giri ˈdaab yú mú Káísar ali ma ˈdú káanyká mú yuoy hí ˈbíl hiiginká ki chiiratká, Fésitos hí Agiríba yie.

²²Aalé Agiríba Fésitos geey, kieye, Yú dhúrchú máállá af nee kokuoká fede, yie. Aalé Fésitos kieye, Beríka mú af nee ha kooyyo, muí mú yie.

²³Aalé bííy éíy taaka ka biˈdeká Agiríba ubaa Berníke tá nyésébích guđo-, hol ki fadhdheká hol ká eedhdhe, ˈbíl guđo-, ˈdeeká ká hile. Nyésébích kinaallá ˈbaal hí gál guguđo-, yuoy met ki ˈgieká. Gáál ˈdáá tikiˈd hí gál guguđo-, ˈjiennoká. Aalé Fésitos kieye, Báulo ˈbíl gáá káa, yieká, Báulo đo gaalí ˈbíl gaa kaay.

²⁴Aalé Fésitos kieye, Máá guđo Agiríba ubaa it lúl hí ál iđáállo, it máállá argiyyâ? Máállá he máá gál Yuuˈdi lullé giri ˈjien Yerusalem ubaa ˈjien Kaisaríállá gaa ijoká hí ye yiete-, gaalí kóˈdle ˈdoy-, gaal kieye, Máállá hé máá les ˈdug ˈdú ijoká muuniny, gaalí ye yieká.

²⁵Máállá hé ˈdeew-, he ˈdeeney-, yú gaa arge-, hí kúfach mé ki kokuoká mán. Tá ˈdaa giri mu kieye, Ye Káísar ˈdú ée, muí yieká, in aalé yú kieye, Mú Róóma yú ali ˈdú kakaa, yú yie.

²⁶Tá yáá hé ˈdúwa-, mú ˈdaalleka ˈguo-, máá guđo Káísar ˈdú verenoká mán. Aaléka, yáá hí mú lulkícho met ká eey, tá súm kó guđo Agiríba lééllá, giri ˈdeenyéél ke hát ˈdabaanká ˈgas eeyka, yú máá kúnnaa guđoká hé ˈdú verenoká ˈguoká.

²⁷ˈDaachúka, máá hiigin gaa ijoká ke máá kúnnaa guđo Káísar ali ˈdú kaay-, kor héllé mákárta ˈdeew he ˈdeeđeneyká ke mú ma ˈdú veerinyka, hé kinaallá hé tagle muuniny, Fésitos hí Agiríba yie.