Read daasanach He Ekeny Gál Alb Fimiká 27 Bible Online

He Ekeny Gál Alb Fimiká 27 - daasanach bible

He Ekeny Gál Alb Fimiká 27

¹Aalé sieny kínyia gaalí mure-, giri nyí kadich higille-, nyí lés Talyan seseenneká Báulo ubaa gállé gaalí hol ˈgar hiigidheká ˈbáál gaalí máá gaalí Yúlias yegie-, yuoy kúˈd tikiˈd mé ki yiel mare gíl fie. Máá kinaallá he yuoy gaalí Yuoy Kaisar yegieká máállé.

²Aalé kádích Ađaramúten gáá yimie-, lés Asia hol ˈdú nannaat-, malgam les kinaalloká ki ˈdeˈdeen mare nyí hille, đo nyí kiiyye. Aristákos giri máá lés Makeˈdonia-, éget hí Dhesalonikeká úba nyáá nyí hol ˈgayye.

³Biiy ká biˈdeká nyí Síˈdon đig chie. Aalé Yúlias Báulo ˈdú ˈjie, mú síé shie, giri mu sheelle ˈdú seseen-, mu héllé mákárta mánká gáál gaa aargiroká.

⁴Aalé nyí ál kinaal gaa kiiyye-, nyí sienykínyo mé veeˈdeká ˈdaa giri waanich ˈdaa nyí ki seseenneká he súm gáá ˈdarameká nyí koro Kuburos ˈdaallé líéshká naate.

⁵Aalé nyí lés Kilikia ubaa lés Bamfilia láá naateká, nyí malg Mura giri lés Lukiaká ki faanne.

⁶Aalé ál kinaal máá giri yuoy mé ki yielká kádích Alekesánđara gáá yimie-, lés Talyan seseme mare arge, mu nyí kádích kinaal fie.

⁷Aalé nyí hát hefiet mare rám ilishká gaa kuate, ˈjíig nyí malg Kaniˈdos kí ˈjobonte. Ál kinaalka waanich hátlé he súm ˈdarame-, nyí sieny biiy metoká ká ridhdheká nyí malg Salmone láá naate, nyí koro Kerete léshle túmus ki koyye.

⁸Aalé bás in kinaal nyí hát hefiet mare gaa kuate, ˈjíig ál gaalí Malg Midhabká yeget-, ˈjien Lasaya kí ˈjób mare đig chie.

⁹ˈDaa giri rám ilishká nyí le hurt ki beesete-, kadich kuan hí nyí bineneny fiiyye-, ˈjila af hisanká ram úba hí ˈgiteká[54] Báulo gáál ki ˈday,

¹⁰kieye, Gál yaab, sieny kúnnaallá yú dhaayká hé ma ˈduuwany, múún kadich ubaa shokodaamle ha gáál gaa baađaa. Hé kinaal úba kí hayo, sie hé muun dhúrkúnno úba gáál ki ˈdeew, yie.

¹¹Aalé máá giri yuoy mé ki yielká íín hé ˈdeeny Báulo hí hogodheká nee ma kôny, mu máá kadich mé ki yielká ubaa máá kadich léká ˈdeenyle tákáma he el gaa igire.

¹²Aalé ˈdaa giri malg kinaal ˈguiyam ˈdeenyietkáka kadich ma ki midhananyká, gál gúúđo kadich taalle seseen-, ˈjíig Fóínika nyooron-, gaal ˈdéeny aflé kinaal ál kinaal gaa yíéđianká he fede. Malg Foinika kinaallá koro Kerete ˈdaa aadho urruká ubaa ˈdaa aadho meleská he bala niiyye.

¹³Wááních ˈdaa urru af hí ka nieká gaal hé tawueká, wááních gáál siidhoká hé kinaallá, he yie. Aalé gaal đo waar giri masam met ki hiigidhe-, bie ki laalameká bie gáá shuunne, kadich ká fadhdhe, gaal koro Kerete in gaa kudhdhe.

¹⁴Kadich hátlé ma fagánanká wááních fargogo-, ˈdeew-, gaalí wááních baryo meleská yeget mare baaˈd af gáá kiite.

¹⁵Huđum kadich ˈjiiyye. Aalé ˈdaa giri kadich huđum hí waanich mé ki kôny ka riateká đo nyí kadich mé ki hayche, kadich waanich hí sidhe.

¹⁶Aalé nyí koro ninni gaalí Kaláwˈda yeget mare álle ka ˈdoyyeká kóro ˈdaallé líéshká nyí naate. Aalé kádích ninni kadich el ki yielká hát hefietká nyí kadich geer kí hergisate.

¹⁷Gaal kádích giri ninniká kadich geer gáá kaadhdheká, gaal kádích giri guđoká masam gim nie, masam ki ˈdane, giri kadich hol af eiy ma gaa babaminyká. Aalé gaal ˈdaa giri ál tiirte-, gaalí Súrti yegetká kadich ki kiadheká gaal đafaraam kadich sisidhoká ká leesie, kadich mé ki hay, kadich waanich hí sidhe.

¹⁸Aalé huđum he kadich tunne-, kadich ki rayyeká, biiy biˈdeká gaal shókódích kadich gaa ijeká ˈdáá tikiˈd bás ki laalame.

¹⁹Kúlích ki seđeká gaal úba shokodaam iigilish-, kadich gaa ijeká gúch hol ki chiichiˈde, bás ki laalame.

²⁰Rám ilishká nyáá nyí aadh ubaa hidhino ma gaa árginy. Aalé huđum kín taalle kadich tune, bim úba nyí mé yé gaa ˈdie.

²¹Aalé ˈdaa giri gaal rám ilishká ˈguom ma gaa kônyká Báulo gáál hurt ki ˈdie, kieye, Gál yaab! Itín onnônyka af haí ye maalle, hé ke Keréte ma ˈdu gáá kukúan, hééllá il hí ma aargíriny.

²²Aaléka, yú hí geeye, haí geer mare ˈgíiny, it máá níínní hí gaa kufunanká mán, kadich tákáma eiy baama.

²³Waag ye lé-, yú hujich ki nannúóllá máállé ˈgasso-, urruká kisare ye láá kí ˈdie,

²⁴ye geey, kieye, Báulo, ha néeny, kuun Káísar met ha ki ˈdeenne, ˈdéé ha gaalí ko ki iđimia. Waag hé ko af veete, gál hí hol kadich af iđáállá hé Waag hí midhantle ki riiyye, muí ye yie.

²⁵Gál yaab! Haí geer mare ˈgíiny, hé Waag hí hotééllá hát ˈduuwawká yáá óg.

²⁶Tá kádíchkúnno íín koro mákárta bie hurt gaa yaalká álle hai chiiˈda, Báulo hí gáál yie.

²⁷Ram he tomon a afur chieká chúúre waanich hátlé nyí Bás Ađariya gaa sisidheká, gál giri kadich kukuoká chúúre hurtákaká hol heete, He in taalle ke ílung má kí ˈjobonon? hol yie.

²⁸Aalé gaal más wáár mé ki hidhe-, más bie ki layká, bie gaa múúgantle gil tooson hí tomon síet. Aalé gaal geđi á níínni mare sedheká geđi más bie ki gadheká, bie gaa múúgant hí gil tooson tomon le ˈdoy.

²⁹Hé nyí súm neesieká kadich waar meto ki ˈdarama nyí chie. Aalé gaal waar afur kadich el ki laalame, biiy bír waagamle ki vite.

³⁰Aalé gál giri kadich kukuoká kádích giri ninniká bie ki leesie, kerka wár gaalí kadich mé ki hiigidheká bie ki lalame, kor íín hinyamlé he koyká karro ˈdarame he fede.

³¹Aalé đo Báulo máá giri yuoy mé ki yielká ubaa yuoy geey, kieye, Gálallá kádích guđóóllá geer yé gaa ˈdieka, itín álkícho hé bím mán, yie.

³²Aalé gál giri yuoyoká masam gaalí kádích ninniká ki leesieká mumure, kádích ninni kinaal đo taare.

³³Aalé aadh hátlé yé ma ka ˈdíinyká Báulo gáál lulle hé geere ki chure, kieye, Rám tomon a afur beeyyééllá it neeyye, it hé níínní geere hí konyeká mán.

³⁴Aaléka, ebá hé geere kóo, ˈguom hí gon hol ká niiyyo, it máá níínní he hí ki ˈdeđenetká mán, Báulo hí gáál yie.

³⁵Aalé mu gáál hatal geeyká balashá eedhdhe, gáál lulle metle Waag gielmít hol ˈdú nie, balashá eiy ˈgieˈgie, balashá koey.

³⁶Gaal lulle ger hí gaa meedhe, gaal úba gololte.

³⁷Nyííni giri lúl nyí kádích kinaallá gaa iđeká nyí kúˈd naama tómón eiy tiiya a le.

³⁸Aalé gaal ˈguom koey-, heyieká orgom sííndí hí gaa iđeká bie ki laalame, kadich heefendhe.

³⁹Biiy ká biˈdeká gaal hé lés yé ˈdú ˈdieká ma kimísan, gaal ál giilo-, ílung hí midhab mare arge, giri ál kinaal har hát ˈgayyoka álle gaalí kadich ˈdú aruanká.

⁴⁰Aalé gaal waar masam gaa mumure, waar bie ki hay. Gaal kadich ˈguorlé hí el ˈgie-, gaalí kadich af ki tatuoká masamle gaa nyurnay. He đueká, gaal đafar kadich mé ki tielká les gaa eey, waanich ki ˈgaase, baaˈd af ˈdú kudhdhe.

⁴¹Gaal ál bie hí tiirt hoy mare ka ˈdoyká kadich tiirt mé ki ˈdoy, les ki kiite, motiny úba ˈdabe. Kadich ˈdaallé elloká bárán giri tiirt tutuneká hí eiy baabiyye.

⁴²Gál giri yuoyoká gál gaalí hiigidheká yegieská he fede, giri gaal kadich ma gaa sorominy-, ma dhadhanan-, kar ma ˈdaraminyká.

⁴³Aalé ˈdaa giri máá yuoy mé ki yielká Báulo ririme-, fedeká, mu yuoy gál gaalí hiigidheká ooslé he yegieská ká ridhdhe. Mu gáál lulle geey, kieye, Gál giri dhám ógká erkob hí kadich gaa sooroon, hí dhanat, hí ílung yé ki ˈdie.

⁴⁴Gál giri kadich kí ˈgisatká hí ˈguor ubaa kadich ˈbakalaamle ki dhanat, hí ílung yé ki ˈdie, muí gáál yie. Yaalmitééllá in gálaat lulle hí ki bie, hí baaˈd yé ki ˈdie.