Read daasanach He Ekeny Gál Alb Fimiká 3 Bible Online

He Ekeny Gál Alb Fimiká 3 - daasanach bible

He Ekeny Gál Alb Fimiká 3

¹Kulich tikiˈd aadh ˈgas saal-, urgúaka gaalí Waag gaa vivisatká, Bétiro ubaa Yuána ˈBíl Waaˈgieto seseme.

²Máá ameeny ka ˈdalidheká héljo mare gálaat hí úr ki eedhdhe, ˈBíl Waaˈgiet kárlé gaalí Kár Bis hí Midhabká yegie mare gaalí álle iđie. Ál kinaal bar lullé gaalí mú iđimie, giri mu gál ˈBíl Waaˈgiet higiloká rogononká.

³Mu Bétiro ubaa Yuána hátlé kar ká nanadheká gáál bíre ruogone.

⁴Aalé Bétiro ubaa Yuána mú gaa dhaay. Bétiro kieye, Nyí kí fúˈjig! muí mú yie.

⁵Aalé máá giriká gáál gaa dhaay, amú kieye, Gáál he yú gaa aargira, he yie.

⁶Aalé Bétiro kieye, Yáá bíre ˈguo-, ko ka shiguoká mán. Tá hé yú ˈguo-, yú ko ká shiguoká hééllá: ˈDaa meeny Yiesu Kiristo Nasaretkáka, le gaa keʼ, hol gaa sí, Bétiro hí mú yie.

⁷Aalé Bétiro mú gíl ˈdaa naaniet chiˈde, mú les gaa eey, máá giriká đo ˈgas ubaa kudf hí fadhme, midhandhe.

⁸Mu les gaa kiite, hol gaa seeseme, gáál hol eedhdhe. Aalé gaal ˈBíl Waaˈgiet higileká mu urgano ki kiikite, Waag meey.

⁹Aalé gálaat lulle mú arge-, mu hol gaa seseme-, Waag memeyká,

¹⁰gaal mú kimite, he ta máá giri aađa-, bar lulle ˈBíl Waaˈgiet kárlé Bis hí Midhabká gaalí af gaa iđimie-, rogonmeká! Gaal mú yaalmitléél ki argeká gil hí af fame, he af ˈdabe.

¹¹Máá giri rogonmeká hátlé giri Bétiro ubaa Yuána ki yiel-, gaal gách gaalí gách Solomon yegieká gaa ˈgieká, gálaat hí arge. Gálaat đo hol ˈdú gáá kirite, mú bímle af ˈdabe.

¹²Bétiro gáál he af ˈdabinyléél argeká gáál geey, kieye, It Yisirayelallo, háteka hí héél af ˈdabiyye-, hí nyí hatal gáá dhaˈgasanáal? Tawunykíchoka, hol gaa sieny maallóól in fargogintkínyo ubaa ˈduuw kínyia he yé gáá ˈdiiyye, hí cheedhe? Hé hát kinaallá muuniny.

¹³Waag giri Abiraayam-, Yisak-, tá Yakob-, giri eshim eshim kúnnaa kinaallá hé gédéchlé Yíésu ˈduwasiche. It mú gál kaansúoká gíl geer gaa kaayye. Af giri Bilááto mú ká hađieká fedeká ití mú Bilááto met gaa điite.

¹⁴It Máá saas mán-, ˈdúwa kinaallá điite. Itín máá gálaat yegieská gaalí yé kí ˈdeđieká hí feˈde.

¹⁵It Máá sidh léká chies, tá Waag íín hé mú uushich yé gáá ˈdeeyche. Nyíín nyáá nyí hééllá ˈduuwle argiyye.

¹⁶ˈDaa iiy yeen meeny Yiesuka in máá hí argiyya-, hí ógallá les gaa eeyye. Hé ˈduwa, iiy yeen nyí Yíésu iiy chieká, máá hí metééllá gaa yaalallá bisiche.

¹⁷Nyaaramchú, yáá óg, hé gál kíchia kaansúoká ubaa itín hí ekeycheká hé kinaallá meto hí moonnoyye.

¹⁸Hééllá hát Waag hí gállé héle ˈdeem ka shigicheká kíssóótí geeyche-, giri Messíyalle maanyjawká in ˈduway.

¹⁹Hé kíchia ˈdeđew-, hí gaa seseennoká hayyíe, Waag makan famíe, giri ađaabano ubaa nyuogim kícho Waag hí ˈdug gaa laanno-, hím kíchia hí nanniyyoká Máá Guđo Waag yé gáá ˈdeenká.

²⁰Waag hí makan faanneka, Waag Messíya giri hí gíl ki helicheká ali haí ˈdú gáá kaayya. Máá kinaallá he Yíésu.

²¹Mu íín ˈdaab Waag he lulle hátlé er ká kuonneká geđi tág ma ka níinyká taalle úrro gaa ija, hát giri héle Waag gállé taak koyye-, ˈdéé ka shigicheká hí ˈdiiyimeká.

²²ˈDeenyééllá ˈdeeny úba héle Móshe hí huogodhe-, giri mu kieye, Máá Guđo Waag máállé ˈdéé ka shiguo-, hát yúká, hurt yé ha muí gáá ˈdeđia. Máá kinaallá he lullé hí geđuoká nee kóo.

²³Máá mú ˈdeenyle nee ma kokonyká, mú gálle ha gaalí gaa ˈgiidhia, ha gaalí yeese,[11] muí gáál yieká.

²⁴Hé ˈduwa, gál Waag hí ˈdéé ka shigicheká ameeny Sámuel tá el ˈdaal kí suoyééllá lulle úba hé ˈdeeny kulichallóóllá ˈdiiyime.

²⁵Itín um gál Waag hí ˈdéé ka shigicheká ubaa um eshim eshimle Waag hí he af iđiche-, giri mu Abirááyam geey-, kieye, É meet lullé les gaa iđoká ˈdúˈjímlé yú ˈdú ˈjeenká umut kua ˈdaalle ká naata,[12] muí yieká.

²⁶Aalé Waag gédéchle gáál hurt yé gáá ˈdeeycheká in erkob muí itín ali ˈdú gáá kaay, giri muí ˈdú ˈjeˈjeen-, lulkícho muí ˈgierim kíchia ˈdeđewká af gáá tatuoká, Bétiro hí gáál yie.