Read daasanach He Ekeny Gál Alb Fimiká 4 Bible Online

He Ekeny Gál Alb Fimiká 4 - daasanach bible

He Ekeny Gál Alb Fimiká 4

¹Bétiro ubaa Yuána hátlé giri gáál geđieká gál suoryoká, ubaa ˈBíl Waaˈgiet gál hí ˈdeˈdemeká máállé hí mé ki yielká, tá gál Saˈdukaayká[13] gáál ˈdú gáá yimie.

²Aalé gál kinaal he onisiny Bétiro ubaa Yuána hí gálaat ki ˈdiiyime-, giri gálaat uushim yiem gáá ˈdímle uushich yé gáá ˈdím Yiesu hí ˈduwaycheká maaleká chirm sare.

³Gaal đo Bétiro ubaa Yuána ˈgiiliˈgay, tá ˈdaa giri aadh hí dhúú ki ˈjiiyyeká gaal gáál ˈbíl hiiginká fie, gáál bííy éíy ka bibiˈdoká ki esse.

⁴Tá gál burnay-, fayam ˈdeenyle Bétiro ubaa Yuána hí ˈdiiyimeká maaleká fayám iiy yie. Kúlích kinaal ameeny gál Yíésu iiy yieká gál yaab túóy hí shíí chen nyuoˈde.

⁵Aalé biiy ka biˈdeká gál kaansúo-, Yuuˈdiká, gállé káruká, tá gál nyatalaamká Yerúsalem hol ˈdú gáá yimie.

⁶Máá méte suoryo-, gaalí Ánnas yegieká ubaa gállé mú Kayáfas, Yuána, Alekesánda, tá mú gállé éíy yaab mare úba hé ál kinaal gaa ije.

⁷Aalé Bétiro ubaa Yuána gaalí gáál met ká eey, gáál gaalí heegete, He in meeny ubaa fargogint mááya hí máá héljóóllá ki bisiche? gaalí yie.

⁸Bétiro giri Hím Naasan Waaˈgiet hí koch chieká gáál geey, kieye, It kaansúóllo ubaa it halúg karúúllo,

⁹har kúlíchal hé midhab nyí máá héljo-, ˈgas mánnal ki ekeycheká ˈdugaka hí nyí ká viiyye-, mu hát he ki bieká hí nyí hegesetka,

¹⁰aalé itín lulkícho hééllá maaláa, gál Yisirayel lulle úba hí hééllá maalo: he ˈdaa meeny Yiesu Kiristo giri Nasaret-, máálle itín hí ˈgór đarám yaalká ˈdú chies-, tá Waag hí uushich yé gáá ˈdeeycheká in máá hí metééllá gaa yaalallá hí ki bie.

¹¹Yiesu Kirísto íín he máá Warˈgat Waaˈgiet hí hogote-, kieye, He ár[14] it giri é ˈdiˈditaká hí điite-, tá ˈduway-, ˈbíl ali ki chichiratká.[15]

¹²Rubach hé máá éíy taaka ke gaa aargiroká mán, ˈdaa giri lésallá hé máá níínní éíy taaka hí gaa ijo-, Waag hí gáál ka shiiche-, meenyle gálaat hí ki bebeenká mánká, Bétiro hí gáál yie.

¹³Aalé gaal Bétiro ubaa Yuána hát he gál aađa-, timirít mán-, kor ˈdéé hát yaabintiká huogodhe-, gaalí argeká, gaal he af ˈdabe. Gaal úba gaal hát Yíésu hol ˈgieká kimite.

¹⁴Aalé ˈdaa máá giri héljo onnoyká bie-, gáál met gaa seeseme-, gaalí argeká gaal hé níínní hodhoká mán.

¹⁵Aalé ar gáál á níínni mare hol tól yé gaa ˈdeeyche, tákámle hol kí ˈgisate, hol geeyche, kieye,

¹⁶Gálallá háte ke kokoo? Gálallá hé ke af ˈdaˈdabo-, he ekeyká meka hé gál lulle Yerúsalem gaa ijóóllá hé hí óg. Hé níínní ke in gáá kootká mán.

¹⁷ˈDeenyééllá hátlé ke ali kokuo-, les eiy bash ma ki yegen-, gálaat hí ma mamalinyká he gálallá ke il gíl gaa helima, gaal hai gálaat geđ meenyééllá ki ˈdiyíminy, gaalí hol yie.

¹⁸Aalé gaal geđi Bétiro ubaa Yuána ká vie, gáál he ki mure, giri gaal ˈdaa meeny Yiesu gálaat ma ki ˈdiyiminy-, ubaa gálaat he ma ki oonisinyká.

¹⁹Aalé Bétiro ubaa Yuána gáál ˈdéé hol ˈdú nie, kieye, Itín dhúrkícho ebá hééllá hol eiy gaa náa, innum Waaˈgietka, he in itín ke hí met gaa kekeenká káláát? Ebá, Waag ke met gaa kekeenká kalat?

²⁰Tá nyiin gon hé nyí argiyyeká ubaa hé nyí maalleká nyáá nyí ma haađiny, ha nyí ˈdiyeenne, gaalí gáál yie.

²¹Aalé máá méte suoryoká ubaa gállé hol ˈgieká geđi Bétiro ubaa Yuána ki lole, gáál il gíl gaa helie. Gál guguđo kinaallá ˈdaa giri gálaat lulle hé Bétiro ubaa Yuána hí ekeyká af ˈdabe-, Waag memeyká in gálaat kiadhe, hé Bétiro ubaa Yuána he ma ki ekêny, gáál fure.

²²Máá ameeny ka ˈdalidheká héljo onnoy-, giri káána yaalmitéél ki bieká hé warram hí tomon afur a ˈgayye.

²³Bétiro ubaa Yuána gaalí fureká gálle hol ˈdú nadhe, he lullé gál guguđo-, suoryoká ubaa gál káruká hí geeyká gáál geey.

²⁴Aalé gál kinaal héél maaleká gaal lulle af gaa guđoká Waag ki vite, gaal kieye, Máá kínyia súm Guđoká, kúún kó úr, les, bás, tá héllé hí gaa ijoká lulle tág niiyye.

²⁵Kúún kó ˈdaa fargogint Hím Naasankú eshi eshim kínyia ˈDáwuˈd giri gédéch kuaká afle héle ˈdéé gáá hote, kieye, Háteka kidh ídho hí ˈdú ˈjiiyye-, gaal Waag ˈdéé tág ki nannuo-, kor hé níínní đuđusuo mánnal?

²⁶Gál kaansúo-, lesalloká hé tagano ˈdie, tá gaal hé hol ˈdú gáá yimie, Máá Guđo Waag ubaa máállé Kirísto hé ˈdú gáá rue[16] chieká.

²⁷Hé kinaallá hé ˈduway. Heróˈde ubaa Bonti Bilááto, tá gál kidhdhoká ubaa gál Yisirayelká hé ˈjienééllá hol ˈdú gáá yimie, giri Gédéch kua Saas Mán-, kuun hí salab mé ki liiyye-, kansím koyye-, Yíésu léká met hiigiteká.

²⁸Gaal hééllá ekeyallá, fargogintkú ubaa he fedit kua héle kuuní ali koyyeká gaalí ki ekey.

²⁹Máá Guđo, aalé káána hé gaalí nyí met iifíéllá kí fúˈjig, gedekú fargogint giri ˈdeenykú hát nyaalimoká ki hogodhoká shíish.

³⁰Gíl kua gáál bibisuoká nyí ˈdú gáá hélish, hé gaal hí il ki aargiro-, gáál af ˈdaˈdabsuoká ˈdaa meeny gédéch kua Saas Mán-, Yíésu léká nyí ki eekemeyche, gaalí yie.

³¹Aalé gáál Waag visan hí gaa đuyyeká ál gaalí hol ˈdú gáá yimie kinaal motiyye. Gáál lulle Hím Naasan Waaˈgiet hí koch chie, gaal ˈdeeny Waaˈgiet nyaalím ki huogodhe.

³²Gál Yíésu iiy yieká lulle ger ubaa kas hí tikiˈd yie. Hé máá níínní shókódíchle hol bal ki ˈdarameká mán, gaal shokodaamlé ˈgieká lulle hol ki liledhe.

³³Gál alb fimiká Máá Guđo Yíésu uushich yé gáá ˈdímle fargogínt ki ˈdiiyime, tá gáál ˈdúˈjím guđoká hí ˈdú gáá leete.

³⁴Af kinaal hé máá níínní gáál hurt gaa ije-, he hí ki ˈgerneyká mán. Gaal ameeny gál lesam ubaa é ˈgieká gaal lesam ubaa énylé kinaal marte, birm ká hidhdhe,

³⁵birm gál alb fimiká met ká sidhe. Aalé gál alb fimi kinaal birm gál he hí ki ˈgeeˈgerneyká eiy ki mumure.

³⁶Yúósef giri máá Levi, tá máá lés Kuburos, giri gál alb fimiká hí meeny Barnábas léká shieká léslé he lilayká úba bíre hidhdhe, bíre kinaal gál alb fimiká met ká sidhe. (Barnábas hélle kieye, Máá gáál gogofsuoká.)