Read daasanach He Ekeny Gál Alb Fimiká 5 Bible Online

He Ekeny Gál Alb Fimiká 5 - daasanach bible

He Ekeny Gál Alb Fimiká 5

¹Aalé máá gaalí Ananías yegie mare ubaa minlé Safíra léslé mare úba bíre hidhdhe.

²Ananías bírellé les ká hidhdheká ˈdáá tikiˈd hát hinyamietká kaadhdhe, bíréétí ká eedhdhe, gál alb fimiká met ká sidhe. Mú minle úba hé hinyamééllá mú hol ki onnoy.

³Aalé Bétiro Ananías vie, kieye, Ananías, háteka Sátan ko hille-, kuun Hím Naasan Waaˈgiet nyimisate-, bíre giri les yiateká ˈdáá tikiˈd hát hinyamietká kaatéel?

⁴Hé kua ˈgayyeká hátlé giri bíre ma yíanká hé hékú muunîny? Aalé bíre ká yiateká bíre kinaallá hé hát kua kúólle hí feˈdoká hí ki seseennoká muunîny? Meete ko tawunyéél gaa koy, kuun hí héél ki ékéyche? Kúún kó máádhat ma nyimísan, Waago nyimisate, Bétiro hí mú yie.

⁵Aalé Ananías héél maaleká đo le ˈdoy, kufe. Gál héél maaleká lulle sierm guđoká hí faanne.

⁶Aaléka gál rúóreká kie, mú đafaraam ki maamare, mú eey, mú ˈgodhe.

⁷Aadh ˈgas seđ amú hí ˈgiteká Ananías minlé Safíra ká chimie, hé hé níínní onnoyyeká mán.

⁸Aalé Bétiro min yiete, kieye, Ebá ye ka géesh, lés kíchia hí marsateká bírellé hí ka yiateká lulle hééllo? yie. Aalé min giriká kieye, Iiy-hí, bíre lulle hé kinaallá, chie.

⁹Aalé Bétiro min geey, kieye, Háteka itín hí Hím Naasan Waaˈgiet nyiimisatoká hí hol af gáá maalléel? Fúˈjig, gál bélkú ˈgodheká hé shagum hí ˈbíl af gaa ˈgiˈgidhóóllá. Kúún úba gaal hai ko ˈgoodho, Bétiro hí min geey.

¹⁰Ál tikiˈde kinaal min đo mú ˈgas met les gaa ˈdoyye, kuyye. Aalé gál giri rúóreká ˈbíl ka hileká min giriká úba kuiy, đo min eedhdhe, min bélle láá ki ˈgodhe.

¹¹Gál Yíésu iiy yieká ubaa gál héél maaleká lulle sierm guđoká hí faanne.

¹²Gál alb fimiká hé gaalí il ki aargiro-, gáál af ˈdaˈdabsuoká gálaat met gaa eekemey. Aalé gál Yíésu iiy yieká lulle gách Solomon álle hol ˈdú gáá yiimie.

¹³Har gaal íín súm úba gaalí gál ˈdúwaká ká dhaˈgameka, hé máá níínní hí hurt hileká mán, ˈdaa giri gáál gaalí kikiadheká.

¹⁴Kor gál yááb ubaa gál ˈdíét burnayká Máá Guđoká iiy yie, gáál af ˈdú faafame.

¹⁵Héél ˈdaalle ˈdugaka gálaat gál basham ˈgieká ˈgierim af ká sidhe, gáál kubano ubaa rokodo ˈdugano ˈdú iifie, giri kerka Bétiro ál kinaal ká nadheka, gáchle gáál ˈdáá tikiˈd gáá nannaat-, giri gaal miidhanatká.

¹⁶ˈJien Yerúsalem lag ijeká nyésébích guđoká hí gáá yimie, gaal gál basham ˈgieká ubaa gál aryáán hí ayaˈgisicheká ká eey, gál kinaal lulle midhandhe.

¹⁷Aalé máá méte suoryoká ubaa gállé hol ˈgie-, Saˈdukaayká hinááf hí faanne.

¹⁸Gaal gál alb fimiká ˈgiiliˈgay, gáál ény hiigin-, gaalí gálaat ki higidheká fie.

¹⁹Tá chúúré kinaal máá ˈgasso-, urru-, Waaˈgiet mare ény hiigin kinaal af fuufure, gáál yé ká ˈdeete, kieye,

²⁰Sedhíe, ˈBíl Waaˈgiet đírle geer ki ˈdée, luolmit kaanallóóllá fayamle lulle gáál shía, muí gáál yie.

²¹Aalé biiy ká biˈdeká hát giri máá ˈgasso-, urru kinaal hí gáál geeyká gaal đo ˈBíl Waaˈgiet đírle geer hile, gálaat ˈdéé onisie. Aalé máá méte suoryoká ubaa gálle hol ˈdú sedhe. Aalé gaal gál arrá-, giri karu Yisirayelká lulle úba hol ˈdú vie. Gaal gál yuoyoká ény hiiginká ali ˈdú fie, giri gál alb fimi-, gaalí hiigidheká ká shugunatká.

²²Aalé gál giri yuoyoká ény hiiginká sedheká gaal ˈbíl gaa laʼ, đo hol ká nadhe, fayám ká sidhe,

²³kieye, Nyí sieteká ény hiiginká gaalí hát ˈdabaanká af gaa kuokog, gál é ˈdeˈdemeká kín é af eiy hát ˈdabaanká gaa ˈgee, kor é nyí af fuˈdeká é gerle gál níínní hí gaa ijeká mán, gaalí yie.

²⁴Gál ˈBíl Waaˈgiet ˈdeˈdemeká máállé hí mé ki yielká ubaa gál guguđo-, suoryoká ˈdeenyéél maaleká birge, he hátlé mákártaká af ˈdabe.

²⁵Aalé mú tikiˈd ká yimie, kieye, Bá dhaayyíe, gál kíchia giri hí ˈbíl hiiginká fiiyyeká ˈBíl Waaˈgiet đírle geer gaa ˈgee, gálaat he oonisia, yie.

²⁶Aalé máá giri ˈBíl Waaˈgiet gállé hí ˈdeˈdemeká mé ki yielká ubaa yuoyle đo hol eedhdhe, gál alb fimi kinaal ká eedhdhe. Gaal hé gáál hát fargogintiká ma ka shúúnan, ˈdaa giri gaal gálaat kiadhe-, gálaat waar hai nyí kí tuuna, yegieká.

²⁷Aalé gaal gál alb fimiká ka eeyká, gáál gál arráká met gaa koy, giri máá méte suoryoká hí hegesetká.

²⁸Aalé máá kinaal gáál yiete, kieye, It ke hí he ma ki múriny, ke hí il gíl ma gaa helîny? Meenyééllá haí gálaat he ki oonisîny, ke hí ma yéen? Tá káána háteeye geđi he onisinyéél hí ˈjien Yerusalem geer kuˈd hoyche, hí nyí mú fásle méé gaa veveenne? muí gáál yie.

²⁹Aalé Bétiro ubaa gál alb fímíítí mú ˈdéé hol ˈdú nie, kieye, Gálaat hí ˈgisat, nyiin gon Waago nyí met gaa kekeenne.

³⁰Yíésu giri itín hí ˈgór đarám yaalká ˈdú chieská hé Waag eshim eshimkúnno hí loolnoyche, hí uushich yé gáá ˈdeeyche.

³¹Waag hé mú gíl ˈdaallé naanietká iđisate, mú Máá Kansich-, ubaa Máá Rubachietká hoyche, giri mu gál Yisirayel fargogínt shiguo-, gaal héllé ˈdeđew-, gaa seseenká haađuo-, mú makan fafaan-, gáál muí ađaabano ubaa nyuogim gaa egewká.

³²Nyíín ubaa Waag Hím Naasanlé giri Waag hí gállé hí met gaa kekeenká shiicheká in nyí hééllá ˈdúúw ˈdú ˈdiiyye, nyí hogoto, gaalí mú yie.

³³Aalé gaal ˈdeenyéél maaleká súm idhane, gáál yegieská fede.

³⁴Aalé máá Farisaay-, gáál nyatalaam oonisuo-, gaalí Gamáliel yegie-, ˈdúwa gaal hí óg mare gál giri arraká hurtle les gaa kie, ˈdéé hodhe, giri gáál gaalí á níínni mare baaˈd yé ki ˈdeđuoká.

³⁵Aalé mu gál guguđo kinaal geey, kieye, Gál Yisirayel, gálallá hé hí ki ekemeychoká mé dhaaˈgamíe.

³⁶Toomééllá Dheúˈdas yé ká ˈdie, ˈduuwle huogodhe, hol meey, gáál kúˈd afur hí el gaa veere. Mú gaalí yieská mú lalilléká eiy bađay, he đo lulle me hí ˈgidhe.

³⁷Máá kinaal elle Yúúˈdas giri máá lés Galilaayaká bár gálaat gaalí totoyká yé ká ˈdie, gál burnayká hí el gaa veere. Máá kinaal úba gaalí yieská mú gállé kinaal eiy bađay.

³⁸Aalé káána yú hí geeye, gálallá hayyíe, gaal hí siet, gaal héllé ekemeyóóllá har hé ˈdaa gálaat yé gáá ˈdieká kátaka, af kinaalka hé el mé mán.

³⁹Tá gaal har hélle hé Waag yé gáá ˈdieká kátaka, af kinaalka ití gálallá he eiy ma ki fufuminy. Itín af kinaalka Waago hí af ˈdú egeyye, muí gáál yie.

⁴⁰Aalé gaal Gamáliel af maale, gaal gál giri alb fimiká ká vie, gáál túdaam ki tune, kor gáál il gíl gaa helie, gáál geey, kieye, Haí meeny Yiesúúllá ˈdaalle he ki hógon, yie, đo gáál fure.

⁴¹Aalé gál alb fimi kinaal ar álle gaa kieká, ger hí gaa meedhe, ˈdaa giri gáál gaalí ˈdaa meeny Yiesu ki manyjasieká.

⁴²Ram hátlé hol el gaa igiˈdeká, gaal đír ˈBíl Waaˈgiet geerle tá ubaa ˈjien Yerusalem Fayam Midhab Waaˈgiet-, Yíésulle hát he Messíyaká taalle gáál gaa shiigie.