Read daasanach He Ekeny Gál Alb Fimiká 6 Bible Online

He Ekeny Gál Alb Fimiká 6 - daasanach bible

He Ekeny Gál Alb Fimiká 6

¹Bár kinaal gál láliká ilshandheká, gál lali kinaal gál Yuuˈdi Hellenká gál Yuuˈdi Heberewká ˈdeente, ˈdaa giri bar lulle ˈguom gaalí gálaat eiy gigiseká gáál ˈdeglé híyeská gaalí gíl ˈdeent he ki shigieká.

²Aalé gál giri tomon a naama-, alb fimiká gál Yíésu iiy yie-, láliká lulle hol ˈdu gáá vie, kieye, Nyíín nyí ˈdeeny Waaˈgiet onisinyle gíl sug ki haađicha-, nyí ˈguom gísáchle gaa seseenká hé ma midhanany.

³Nyaaramkúnno, gál ˈdúwa-, tiiya Hím Naasan Waaˈgiet hí koch chie-, ˈdaallellé-, hí ógká hol gáá shuunáa, gáál nyí hújíchallá mé ki koyyo.

⁴Nyíín dhúrkínyo aalé bar lulle Waag visan ubaa ˈdeeny Waaˈgiet ˈdiiyiminyle nyí mé verenne, gaalí yie.

⁵Aalé gál láli kinaal lulle hé gál alb fimiká hí hodheká hí ger gaa meey. Gaal Estéfan giri Yíésu hát ˈdabaanká iiy yie-, Hím Naasan Waaˈgiet hí koch onnoyyeká ká eey. Gál éíy taaka úba gaalí ká shuuneká he mú Fílib, Borokóro, Níkanor, Tímon, Bármen, tá Níkola giri Ántiok gáá yimie-, Waag gál Yuuˈdiká iiy yieká.

⁶Aalé gaal gáál gál alb fimiká ˈdú eey, gál alb fimiká gáál Waag ki vite, gáál gil ˈdú fie.[17]

⁷Aalé ˈdeeny Waaˈgiet ˈjien Yerusalem bash ki yie, gál burnayká ˈdéé iiy yie, gaal lali Yiesu yie. Gál burnay-, suoryoká úba fayam Yiesúúl iiy yie, fayám el gaa veere.

⁸Aalé Estéfan giri midhant Waaˈgiet ubaa fargogint Waaˈgiet hí koch onnoyyeká hé gáál súm af ˈdaˈdabsie-, gaalí il ki argeká gálaat hurt gaa eekemey.

⁹Aalé gáál mé tikiˈd Estéfan ˈdu gáá yimie, mú hol ki falme. Gál kinaallá ˈbíl ˈdiiyiminy-, gálle Gál Gaalí Mé Fureká gaalí yegieká he yé gáá ˈdie. Gál kinaallá ˈdáá tikiˈd ˈjienle he ˈjien Kurene ubaa ˈjien Alekesanđara, tá gáál ˈdáá tikiˈd íín úba lés Kilikia ubaa lés Asia he gáá yimie.

¹⁰ˈDaalim Hím Naasan Waaˈgiet Estéfan hí ˈdéé ki hogodheká in fáláám gaalí hol ki fafalme kinaal Estéfan hí gáál kí adhdhe.

¹¹Aalé gál kinaal hát hinyamoká gáál ˈdáá tikiˈd chure, kieye, Estéfan Móshe ubaa Waag chachareká nyáá nyí maalle, yiedhíe, gáál yie.

¹²Aalé ˈdeeny Estefanallá gálaat ubaa gál káruká tá gál nyatalaamká idhansie, gaal Estéfan ˈgiliˈgay, mú gál arraká met ká eey.

¹³Gaal gál mú hódho luut kaay mare úba ká shuunne. Aalé gál kinaal kieye, Máállá bar lullé he ˈBíl Waaˈgietallá ubaa hemuumurit Moshééllá fiichila.

¹⁴Mú nyí af maalleká, mu kieye, Yíésu Nasaretallá ˈBíl Waaˈgietallá eiy hai ˈgieˈgia, kor nyátál Móshe hí gáál ka shieká úba hollo hol gaa laama, muí yie, gaalí yie.

¹⁵Aalé gál giri ál gál arra kinaal gaa ijeká lulle mú gaa dhaay, máá innum hí hol gaa suoyye-, innum hí innum máá ˈgasso-, urruká chieká arge.