Read daasanach He Ekeny Gál Alb Fimiká 7 Bible Online

He Ekeny Gál Alb Fimiká 7 - daasanach bible

He Ekeny Gál Alb Fimiká 7

¹Aalé máá méte suoryoká Estéfan yiete, kieye, Hé gaalí ko ˈdú hogodhóóllá hé ˈdúwa? yie.

²Aalé Estéfan gáál ˈdéé hol ˈdú nie, kieye, Nyaaramchú ubaa idhaamchú, ye af nee kóo, bár giri héle eshi eshim kúnnaa Abirááyam hátlé giri Háran mé ma níinyká in Waag gúch ˈgayyo-, hol édhum yé gáá ˈdeđichoká mú lés Mesobotámia álle yé ˈdú gáá ˈdiiyye,

³mú geeyche, kieye, Léskú ubaa gálkú hash, keʼ, sí, lés yú ko aargisuoká mé naʼ,[18] mú chie.

⁴In aaléka mu lés Kalˈday gáá kie, lés Haran gaa ˈgudhdhe. Mú ˈjaalle ál kinaal mán ki yieká Waag mú ál kinaal gáá eeyye, mú lés káána hí gaa iđáállá ká eeyye.

⁵Waag hé aˈjibaat níínní mú állá gaa shiicheká mán, hé mú ˈjádábích lesiet úba ma shíiny. Abirááyam af kinaal úba véel manayka, Waag íín hé mú ˈdéé af iđiche, giri mu íín ubaa hídhle lésallá liiletká.

⁶Tá Waag mú hatallá he geeyche, kieye, Hídhkú umle lés ma lilenyká hai gaa yíéđima, tá gál les kinaalloká géde haí hođita, warram kúˈd afur heeny ha gaalí ki seeme, Waag hí mú chie.

⁷Waag úba mú geeyche, kieye, Kídh hídhkú géde hođisat kinaallá he ha yú ki ekemeye. El ˈdaal gaal lés kinaal yé hai gáá ˈdeeme, lésal hai ye gaa viita,[19] Waag hí mú chie.

⁸Waag úba Abirááyam he ki muˈde, kieye, Kúún ubaa um kua yaabká heermitíe, chie. Hermisan kinaallá he hedh hol af iđiny Waag ubaa Abirááyam hí hol af iđieká.[20] Aalé Abirááyam Yísak hí ki ˈdalidhe, íny ram hí síet chieká mu íny hermisie. Yísak Yákob ˈdale, Yákob nyígéény tomon a naam ˈdale. Nyígéény kinaal guguđanteká é meet chie.

⁹Aalé Yákob nyígéénylé kinaal nyárlé Yúósef hinaafle hí faanne, mú gál nigiˈd hol bíre gaa hidhdhe. Gál nigiˈd kinaal đo mú lés Misirayim ˈdú eedhdhe, mú marte, gál les kinaalloká mú gedech hote. Tá Waag íín hé mú ˈdeˈdeenne,

¹⁰hé mú ki ˈgeeˈgerneyká mú ˈdú chichirate. Waag hé kánsích Misirayim giri Fárro léká innumle mú ˈdaa gaa lileyche, mú Fárro úba hí geelnedhe. Kor Fárro úba hé ényle ubaa lés Misirayim lulle mú máállé guđoká hoy.

¹¹Aalé bár tikiˈde kinaal lés Misirayim ubaa lés Kanaan lulle kuoˈd ˈdeewká hí gáá ˈdiiyye, gálaat mar hí yies. Aalé eshim eshim kúnnaa kinaal ál he ˈguom gaa aargiroká ˈdabe.

¹²Yákob Mísirayim hát ˈguom hí gaa iđoká maaleká mu helellé giri eshim eshim kúnnaaká ali fie. Hé kinaallá he gáál sienylé erkob les kinaalloká.

¹³Aalé gáál sienylé ki naamaká Yúósef hol nyaaramle af ki ˈdaakay. Aalé Fárro Yúósef gáláátle arge.

¹⁴Yúósef ˈjaallé Yákob ubaa gálle ˈdéé ˈdú lay, giri gaal hí ˈdú guuranká. Gál ka guureká lulle tomonaam tiiya a chen.

¹⁵Aalé Yákob lés Misirayim kinaal gaa yíéđie, ál kinaal mán ki yie. Mú helellé giri eshim eshim kúnnaaká úba lés kinaallá he mán ki yie.

¹⁶Aalé gáál lafle gaalí lés kinaal gáá shuunne, gaalí ˈjien Shekem ká sidhe, gaalí ˈguoˈd Shékem gaa tiel-, Abirááyam hí hele Hamor hol bíre gaa hidhdheká ki ˈgodhe, gaal đo geđi lés Misirayim hol ˈdú nadhe.

¹⁷Aalé warram burnay kinaal hátlé hol el gaa igireká gál kúnnaa kinaal lés Misirayim ki heere. He af iđiny Waag hí Abirááyam af iđicheká bárle ká ˈjobonteká, gaal lés kinaal súm ki ilshandhe.

¹⁸Aalé el ˈdaal lés Misirayim kinaal máá Yúósef moonnoyká hí kansím gaa eedhdhe.

¹⁹Aalé mu gál kúnnaa kinaal điđám ki ˈdie-, gáál he ki ekey-, kor gáál he ˈdú moy, giri gaal umlé niginiká bado sisidhe-, um kufumeká.

²⁰Af tikiˈde kinaallá in Móshe úba ˈdalidhe. Mu ka ˈdalidheká mu mídhab, in gál hí ˈdaloká hí ˈbíl ki kaay, hí ˈguiyam seđ gaa way.

²¹Aalé el ˈdaal mú gaalí baaˈd sidhe-, hátle gaalí baaˈd ki kakayká Fárro inille hí shuunate, hí eete, hí veelle hosote.

²²Aalé Móshe ˈdaalim gál Misirayimká lulle gaalí onisie, mú ˈdéé hót ubaa he eekemenyle hí hé máá ˈdúwaká chie.

²³Aalé mú warram hí tomonaam afur chieká mú kas máálle gállé Yisirayelká a kí ˈdeˈdeenká hí ká hille.

²⁴Kulich tikiˈd mu sedheká, mú gálle mú tikiˈd máá Misirayim hí he ki ekemeyeká muí arge. Aalé mu máá kídhlé kinaal in gaa nadhe, máá Misirayimká ˈdoy, mú yies.

²⁵Móshe tawunyleka, gálle hát Waag mú íín ali gáá kaayye-, mu gáál biisuoká hai kiimita, he yegie. Kor gaal hé hé kinaal ma kimísan.

²⁶Aalé bííy eiy ka biˈdeká, Móshe gállé Yisirayel naama-, hol tutune mare a kí ˈdie. Mu gáál gár ki nie, kieye, Gál yaab, itín kidh hí tikiˈde, tá háteka hí hol tutunnáal? yie.

²⁷Aalé máá giri ós ka kuoneká Móshe lay, kieye, Mááya ko máá kínyia arra-, nyí mé ki yaalká hoy?

²⁸He in hát gefere máá Misirayim chieská in úba ye chegeská feˈde?[21] yie.

²⁹Móshe ˈdeenyéél maaleká đo lés Miˈdian kar ˈdú ˈdoy, mu lés ma lileny kinaal gaa yíéđie, úba gaa eedhdhe, nyígéény naam ki ˈdale.

³⁰Aalé Móshe lés Miˈdian warram tomon afur gaa yíéđieká mu kulich tikiˈd áíy ál ˈbakate Gúm Sanai kí ˈjobonoyye mare he gaa igire. Aalé máá ˈgasso-, urruká mú yé ˈdu gáá ˈdie, hát ˈjieteká ˈgór hurt gaa boloy.

³¹Mu héél argeká he af ˈdabe, mu kerka he kí ˈjoobondhe, he tág dhaˈgame. Aalé mu Máá Guđo Waag afle maale,

³²Waag kieye, Yú he Waag eshim eshim kua-, mú Abiraayam, Yisak, tá Yakobká,[22] he chie. Móshe sierm hí faanne, fađane, hé úba ali ma gaa dháany.

³³Aalé Máá Guđo Waag mú geey, kieye, Koiykú ˈgas gaa fur, kúún innum chia gaa taalla.

³⁴Gál chia Mísirayim gaa ijóótíá hát gaalí mé les ki ˈdiidheká yáá hát ˈdabaanká arge. Yáá gáál buonyle maale, yáá aalé ká leedhe, giri gáál ririanká. Kúún aalé Mísirayimo yú ko ali ˈdú kakaa,[23] muí mú yie.

³⁵Hééllá Móshe tikiˈde giri gál Yisirayel hí điidhe-, gaal kieye, Mááya ko nyí máá arra-, nyí mé ki yaalká hoy? gaalí yieká. In Waag Móshe kinaal yaalmit máá ˈgasso-, urruká yé ˈdu gáá ˈdiiyye, ˈgór hurt gaa boloyye. In aaléka mú gállé Yisirayelká ali ˈdú kaayye, giri mu gáál ririan-, gáál lés Misirayim yé gáá ˈdeđuo-, gáál mé ki yaalká.

³⁶Aalé Móshe kinaallá gál Yisirayel lés Misirayim yé gáá ˈdeey. Mu hé gaalí il ki arge-, gáál af ˈdaˈdabsieká lés Misirayim ubaa Bás Búrká álle gaa ekey. Hé éíy hat kinaalloká úba muí ál ˈbakateká warram tomon afur gaa ekey.

³⁷Hééllá Móshe tikiˈde giri gál Yisirayel geey-, kieye, Waag máá Waag hí ˈdéé ka shigicho-, hát yúká gálkúnno hurt yé hai gáá ˈdeđicha,[24] muí yieká.

³⁸Hééllá he Móshe giri eshim eshimkúnno ubaa nyésébích Yisirayel lulle hol ˈbakat álle af ije-, máá ˈgasso-, urruká hí Gúm Sanai ˈdéé gáá shigie-, ˈdeeny luolmiti kinaal gáál ˈdú sisidheká.

³⁹Kor eshim eshimkúnno mú af điidhe, gerleka lés Misirayim hol ˈdú nannaatká he fede.

⁴⁰Gaal Ááron geey, kieye, Nyí waagam nyí met nannaat-, nyíín nyí el gaa igiˈdoká nyí tág kí naʼ. Móshe gáál Mísirayim gáá eeyallá, hé mákárta hí ki ˈdeenedheká hé ke muog,[25] gaalí mú yie.

⁴¹Aalé ál kinaal gaal hórkí máádíny tág gaa naate, waagle hote, kor suor ki ˈgale. Gaal hé gílle tág ki naateká hí geer gaa meemesie, aaˈdume.

⁴²Aalé Waag gáál hurt yé gaa ˈdiiyye, gáál hidhino uriet-, gaalí vivite-, gaalí fedeká gáál ˈdú hayche. Hát giri gaalí warˈgat gál Waag hí ˈdéé ka shigicheká gaa veere-, warˈgatle kieye, It Yisirayelallo, warram tomon afur hí ˈbakat álle gaa iđe-, hí suor ˈgaˈgalleká he in yaa hí ye suor kí ˈgaˈgale? It suoryam kinaallá ye ma kí ˈgaˈgáliny!

⁴³Itín waagam hí gilkícho tagano ki nannasateká in hí vivisate, hát káána waag giri Mólok lé-, lokoolle hí hol gaa sisiteká, héétí ubaa waag giri hidhinte-, Ráífan lé-, hí ˈduwasicheká. Itín aalé kídh ha yú ˈdú haađia, kidh haí ugunma, lés Babilon mé sug ˈdaatí ha gaalí ˈdú egedhdhe,[26] chieká.

⁴⁴Eshim eshimkúnno hé ˈBíl ˈbaaro Waaˈgietká [27] ˈbakat álle gaa ˈgie. ˈBíl ˈbaaro kinaallá hát giri Waag hí Móshe argisicheká gaalí ká ˈdisse.

⁴⁵Aalé af giri Yóshua ubaa eshim eshimkúnno ˈBíl ˈbaaro Waaˈgiet kinaal ˈgieká, in lésallá gaalí kidh af kí ridhdhe. Tá bár giri gaal les ka higileká ˈBíl ˈbaaro kinaal úba gaalí lésallá ˈdú gáá eedhdhe. Af giri gaal les kidh af kí riridheká Waag íín eshim eshim kúnnaa he kidh met gaa aruanne. ˈBíl ˈbaaro Waaˈgiet kinaal hé lésallá gaa yiel, ˈjíig bár giri ˈDáwuˈd hí lésallá máá kansich gaa onnoyká.

⁴⁶Aalé ˈDáwuˈd Waag geer gaa meey, kor Waag Yakob kinaal yiete, har ˈbíl he gaa yíéđiannoká muí ki ˈdiisoka.

⁴⁷Tá Waag hé ˈDáwuˈd hí ˈbíl ki ˈdiˈdiseká iiy ma chéen. ˈDáwuˈd inylé Sólomonno he iiy chie, hí ˈbíl ki ˈdisse.

⁴⁸Tá Waag Úr Iđoká íín hé ˈbíl gálaat hí gíl ki ˈdissoká ma gaa yíéđiminy. Hát giri máá Waag hí ˈdéé ka shigiche-, Yisááya hí veere-,

⁴⁹giri Waag kieye, Ur he kara chia kansimoká, les he kara chia yú ˈgas ˈdú kokuoká. ˈBíl yaalmit máre yaallo, hí ye kí ˈdííta? Ál chia yú hím ki nannuoká ále?

⁵⁰Hééllá lulle hé gílchú hí tág ma níiny?[28] chieká.

⁵¹It met guogo-, hí gerkícho Waag iiy ma ki chegen-, hí nee gaa guogiyyáal! Itín hát hí eshim eshimkícho. Itín bar lullé hí Hím Naasan Waaˈgiet af điđidhanna.

⁵²Ameeny gál giri Waag hí ˈdéé ka shigicheká mááya eshim eshimkícho hí he ma ki ekêny? Eshim eshim kíchia kinaallá in úba gál giri héle Máá ˈdúwa-, saas mánká ˈjímle ˈdiiyimeká yies. Aalé káána itín it Máá ˈdúwa-, saas mán kinaal hí gáál mú mé il gaa koyye, hí mú chies.

⁵³Itín it hemuumurit Waaˈgiet giri gál ˈgasso-, urruká hí ˈdú gáá siteká argiyye, kor ití nyátál kinaal ma ki tíéliny, Estéfan hí hatal gál arraká geey.

⁵⁴Gaal héél maaleká idhane, mú af ˈdú ˈgiinime.

⁵⁵Estéfan Hím Naasan Waaˈgiet hí koch chie kinaal úr gaa dhaay, édhúm Waag gáá edhdheyká ubaa Yíésu Waag gíllé ˈdaa naanietká yielká muí arge.

⁵⁶Aalé Estéfan kieye, Bá dhaayyíe, úr hé af hí furme, Iny Máádhat Waag gíl ˈdaa naanietká yaal, muí yie.

⁵⁷Gaal héél maaleká hol nee rie, súm kúóˈd ˈdoy, lulle mú ˈdú gudhdhe,

⁵⁸mú a chiˈde, mú é yé gaa ˈdeete, giri mú yegeská. Gál hé giri Estéfan hí hogodheká nee kokoyká gielolle fure, máá ruorich gaalí Sáwul yegie mare bala fie, gaal Estéfan waar ki tune.

⁵⁹Gaal hátlé Estéfan waar ki tutuneká Estéfan Waag vite, kieye, Máá Guđo Yíésu, sídhchú éew, yie.

⁶⁰Aalé mu le ˈdoy, kurram le veere, af úr ki eey, kieye, Máá Guđo, nyúógíchallá ha gáál luut káany, yie, đo mán yie.