Read daasanach He Ekeny Gál Alb Fimiká 8 Bible Online

He Ekeny Gál Alb Fimiká 8 - daasanach bible

He Ekeny Gál Alb Fimiká 8

¹Sáwul Estéfan kúfáchlé gaalí yegieská úba hé fede. Kúlích tikiˈde kinaallá gál Kiristo Yerúsalem gaa ijeká manyjasinyle biiy gáá ˈdiiyye. Aalé gáál gúch hí Yerúsalem gaa đufe, lés Yuuˈdia ubaa lés Samaria eiy ˈdú ˈbasandhe, gál alb fimiká tákámle ká ˈgite.

²Gál Waaˈgiet mare Estéfan súm ˈdú buoy, mú ˈgodhe.

³Aalé Sáwul íín le gaa kie, gál Kiristoká kí ˈdie. Mu ˈjien af gaa veere, gál yaab ubaa gál ˈdiet é gáá shuune, gáál ˈbíl hiiginká fie.

⁴Gál giri kar ˈdane-, les eiy ˈdú basandheká fayam Waaˈgiet alb he met naannieká gaa ˈdiiyime.

⁵Fílib ˈjien lés Samaria mare mé nie, ˈjien kinaal mu gálaat Yíésu hát he Kirísto-, máálle Waag hí salab mé ki liiyye-, Waag hí kansím koyyeká gáál geey.

⁶Nyesebich Fílib ˈdeenylé hogodheká maale-, tá hé gáál af ˈdaˈdabsuo-, muí eekemeyká argeká, gaal lulle mú af tág nee kuokoy.

⁷Fílib gál ilishká aryáán yiem gaa ˈdeey. Gáál af giri aryáán hí yiem gaa ˈdeˈdeenneká gaal koˈdam ˈdane. Gál héljo mare ubaa gál burnay alb ˈgie mare úba muí bisie.

⁸Aalé ˈjien kinaal gálle ger hí gaa meedhe.

⁹Máá gil onyi gaalí Símon yegie mare hé úba ˈjien kinaallá gaa ije. Mu bár kinaal he nímlé nannieká gál Samaria lulle hí af ˈdabe. Mu hollo hol memey, Yaa ˈdúwa, he yegie.

¹⁰Aalé gál ˈduuˈdúwaká ubaa gállé aađa-, les kinaalloká lulle bár kinaal mú a nee kuokoy, gaal kieye, Máállá he fargogint Waaˈgiet giri gaalí Fargogint Guđoká yegetká, gaalí mú yegie.

¹¹Gaal mú ˈdeenyle iiy yie, ˈdaa giri mu hé gáál af ˈdaˈdabsieká warram burnayká gaa eekemeyká.

¹²Aalé gál Símon el gaa igire kinaal Fílib hí Fayam Midhab Guch Waaˈgiet-, ubaa meeny Yiesu Kiristoká ki ˈdiiyimeká gaal fayám iiy yie. Aalé gál yááb ubaa gál ˈdíét fayam kinaal iiy yieká gaalí bie gim nie.

¹³Símon dhúrle úba fayam kinaal iiy yie, gaalí bie gim nie. Mu Fílib el gaa veere, alb lullé giri Fílib hí sesemeká úba sedhe, mu úba hé farguogo-, Fílib hí eekemey-, gáál af ˈdaˈdabsieká argeká he af ˈdabe.

¹⁴Aalé gál alb fimi-, Yerúsalem gaa ijeká gál Samaria hát ˈdeeny Waaˈgiet iiy yieká maaleká gaal Bétiro ubaa Yuána ali fie, gaal gáál bííyle mé nie.

¹⁵Bétiro ubaa Yuána ali ki fameká gáál Waag ki vite, giri gáál Hím Naasan Waaˈgiet hí higilloká.

¹⁶Waag visan gaalí gáál ki vite kinaal he ˈdaa giri gáál kis meeny Máá Guđo Yiesu Kiristoká gaalí bie gim ki nie-, kor gáál hátle Hím Naasan Waaˈgiet hí ma hílinyká.

¹⁷Aalé Bétiro ubaa Yuána gáál gil ˈdú fie, gáál Hím Naasan Waaˈgiet hí hille.

¹⁸Aalé Símon gál alb fimiká gál he gil ˈdú igifieká Hím Naasan Waaˈgiet hí hille argeká, mu gál alb fimi kinaal bíre ki helie,

¹⁹kieye, Fargogintééllá úba ye shía, máá yú gil ˈdú iifuoká úba Hím Naasan Waaˈgiet hí hillo, muí gáál yie.

²⁰Aalé Bétiro mú geey, kieye, Ubaa bírekú hol ˈgar bađáa, ˈdaa giri kúún hé Waag hí gáál ká shigichoká tawunykúka, bíre ha yú higidhdha, chegedhoká.

²¹Kúún kó ˈdeenyééllá hé níínní gaa léká mán, ˈdaa giri káskú he Waag gaa fágká.

²²Hé kua ˈdeđew-, taawuyyóóllá hash, Máá Guđoká gil ki ef, hé kua ˈdeđew-, geer ka ˈgayyóóllá kálmaréél muí haya, mu hai ko he il ka argisîny!

²³Kúún hát hinaaf ˈdeewká ˈgayyo-, saas ko hiigidheká yáá ko arge, Bétiro hí mú yie.

²⁴Aalé Símon Bétiro ubaa Yuána geey, kieye, Ye Máá Guđoká makan ki ˈjée, hé hí hogotóóllá tikiˈd ha il hí ye árginy, muí gáál yie.

²⁵Aalé Bétiro ubaa Yuána Máá Guđo Yíésu ˈdeenyle ˈdiiyime-, hé muí eekemey-, he il ki argeká fayamle úba gáál shieká kie. Gaal ˈgíéríchlé gaa igire-, Yerúsalem hol ˈdú nanadheká Fayam Midhab Waaˈgietká ˈjien Samaria gálaat gaa shie.

²⁶Aaléka, máá ˈgasso-, urru-, Waaˈgietká Fílib geey, kieye, Keʼ, ˈdaa urru ki sí, ˈgíérích Yerúsalem yé gaa ˈdeˈdeen-, ˈbakat gaa nannaat-, Gása mé nannúóllá nú, mú yie.

²⁷Aalé Fílib đo kie, sedhe. Mu máá guđo Abacha-, min Abacha kansidhe-, gaalí Kanˈdáke yegieká birmle ubaa shokodaamle mé ki yiel mare ˈgíérích kinaal gaa arge. Máá Abacha kinaal Yerúsalemo he Waag gaa vite,

²⁸mu muul fara hí af chichiˈdeká he gaa ije, hai gagale. Mu ˈgíéríchlé gaa igireká warˈgat ˈdeenyle Waag hí Yisááya shiiche-, Yisááya hí veereká he totoy.

²⁹Aalé Hím Naasan Waaˈgiet Fílib geeyche, kieye, Sí, muuléétíá ˈdú sí, muul a ˈdíne nú, chie.

³⁰Fílib đo muul fara hí af chichiˈde kinaal ˈdú ˈdodhdhe. Mu muul a ˈdíne nadheká máá giriká af maale, mu warˈgat Yisááya hí veereká totoyo. Aalé Fílib mú yiete, kieye, Hé totoychóóllá hélle kó kimisatê? yie.

³¹Aalé máá giri Abachaká kieye, He hélle ˈdaab máádhat hí ye af ma gáá kônyká háte yú kiimita? yie. Aalé mu Fílib muul gaa kaadhdhe, mú hol lag yíéđie.

³²Mu warˈgat kinaal ˈdeeny he gaa totoyká kieye, Hát ány walach gaalí ˈgalan ˈdú ˈdeđisatkáka, mú gaalí eedhdhe. Hát ány walach gaalí dhúúr gaa dhudhurio-, ma ˈdiyiminykáka, mu hé ˈdéé ma hôn.

³³Gál arraká mú ˈdúúw rie, hé mú ˈdeenyle hát ˈdabaanká eiy ma níiny. Gál mú ˈbíl ílle hol geđuoká in gálya? Mú in gaalí les gaa yies háluke![29] he yie.

³⁴Aalé máá giri Abachaká Fílib yiete, kieye, Ebá ye ka géesh, Máá Waag hí ˈdéé ka shigichééllá mááya ˈdeenyle hogodho? Mu ˈdeenylé he hogodhoo? Ebá, mu máá éíyyo ˈdeenyle hogodho? yie.

³⁵Aalé Fílib ˈdeeny muí totoy kinaal hélle mú af gaa koy, mú Fayam Midhab Yiesuká geey.

³⁶Gaal ˈgíéríchlé gaa igireká gaal ál bie hí gaa ijo mare ká nyuore. Aalé máá giri Abachaká mú geey, kieye, Bie hállá, meete ye bie gim naan ká riridhdha? yie.

³⁷[Fílib mú geey, kieye, ˈDeenyééllá har ko geer hát ˈdabaanká hileka, af kinaalka bie gim ha yú ko nannaa, yie. Aalé máá Abachaká mú ˈdéé hol ˈdú nie, kieye, Yiesu Kirísto hát he Iny Waaˈgietká yáá iiy yie, yie.][30]

³⁸Aalé máá Abacha kinaal máá muul kukueká geey, giri mu muul ali kokuoká. Aalé muul ali ki ˈdiiyyeká mu ubaa Fílib hullaalle leedhe, đo bie ki leedhe, Fílib mú bie gim nie.

³⁹Gaal he bie yé gáá ˈdieká Hím Naasan Máá Guđoká đo Fílib ali gaa eete. Máá giri Abachaká hé geđ mú ma árginy, ˈgíéríchle nadhe, geer hí gaa meedhe.

⁴⁰Fílib hol ka argeká ény Asotus gaa ija, aalé đo kín sedhe, ˈgíéríchlé gaa igireká ˈjien gaa nadhe, ˈjien kinaal gáál Fayam Midhab Waaˈgietká gaa shie, ˈjíig Kaisária ki ˈjie.