Read daasanach Róóma 11 Bible Online

Róóma 11 - daasanach bible

Róóma 11

¹Aalé káána, ha yú hí ká yiete, Waag gállé Yisirayelallá hai điite? Híʼi, hé gáál ma đíin. Yú úba dhúrchú máá Yisirayel, máá ˈbíl íl Abiraayam, máá é meeny Binyamin.

²Waag hé gállé-, héle waaratééllá ma đíin. Itín ˈdaa Eliyaka hé Warˈgat Waaˈgiet hí hoteká it ógká muunîny, giri Elíyalle Waag ki buoy-, gál Yisirayel ˈdeente-,

³kieye, Máá Guđo, gaal hé gál kua kuuní ˈdeem ká shigicheká yies, hé kubano kua suoriyyoká eiy ˈgieˈgie. Yaa tákáma ká ˈgite, sulchú gaalí nannaa, giri gaal ye yegeská,[45] muí yie-, warˈgát hí chieká.

⁴Tá Waag mú háte geeyche? Waag kieye, Hé kuun tákámkú ma ka ˈgísan. Yáá gál éíy taaka shíí tiiya-, giri waag hódho-, Báal lééllá met les kurram ma gaa ˈdôny-, ma vísanká ˈguo,[46] he mú chie.

⁵Aalé báral úbaka, gál chia túóy Yisirayel-, Waag hí waarate-, hí ˈdú ˈjiiyyeká hé ˈgíérích Waag hí feˈdoká el gaa igiro.

⁶Gaal hátle gál Waaˈgietallá he hé kieye, he símisso gaalí gaa dhiire muuniny, he Waago gáál ˈdú ˈjiiyye, gáál geer guurá argisiche. Tá ˈdúˈjímallá har hé gaalí símis gaa dhiireká kátaka, hé onnônyka hé shiicho halleelloká muuniny.

⁷Aalé yaalmitééllá hatallá: Gál Yisirayel Waag hí gál ˈdúwaká chegieká fede-, tá hé kinaal ˈgar aayaˈgeká gál ilishká hé hé kinaal Waag ma gaa árginy. Gál hé kinaal argeká he gál Waag hí gáál gaa waarateká tákáma. Gálatí íín met hí googondhe.

⁸Hát káána Warˈgat Waaˈgiet hí hote-, kieye, Waag hé gáál rám guđoká mé ki koyye, gáál in ubaa nee riiyye, ˈjíig bár ke gaa ijóóllá đig,[47] chieká.

⁹Tá héétí ˈDáwuˈd úba kieye, Gáál gololaamle hí naram ki yeet, hí ˈgiiliˈgaw, hí ˈgodo ki okodicho, gáál héllé ˈdeđewká ˈdaalleka, gáál hééllá il hí argiyyo.

¹⁰Gáál in hí gaa dhataw, gaal hai biiy gaa árginy, gáál taalle bííyyo kern hí gaa koongʼodot,[48] ˈDáwuˈd hí yie.

¹¹Aaléka, ha yú hí yiete, gál Yuuˈdi les ˈdanitléél he in kieye, gaal gon bííyyo Waago gaa ˈgite, ke yegedhe? Híʼi, he hé hát kinaallá muuniny. He gáál điidhallé kinaallá in gál gál Yuuˈdi muuninyká hí rubach ki arge. Hééllá hatallá ˈdíéllá he giri gál Yuuˈdi hinááf gaa vereno-, gaal úba rúbách kinaal aargiroká fedoká.

¹²Af giri gál Yuuˈdi ˈgíérích Waag hí gálaat rubach ki shigichóóllá điidhe-, ađaabéélla hileká, in Waag kidhéétí ˈdú ˈjiiyye-, rubach shiiche. Tá gál Yuuˈdi bár rúbáchallá mé ˈdu gáá law-, iiy yeetká, ˈdúˈjím Waaˈgiet bar kinaalloká ˈdaa kidh lúl les gaa ijokáka ebá guđáan!

¹³Yú it giri hí gál Yuuˈdi muuninyallá hí geđia. ˈDaa giri yú he máá Waag hí gál gál Yuuˈdi muuninyká ali ˈdu gáá kaayyeká, in yú hújích chiallá ˈduuwasia,

¹⁴giri kálmaréel gál chia Yuuˈdííllá tuuˈdle yú hinááf gaa vereno-, gáál ˈbaal rubach aargiroká.

¹⁵Waag ubaa gál Yuuˈdi hol eiy gaa ˈgisanlééllá, in kidh les gaa ijóóllá kár Waag hol ki higiloká shiiche. Aalé gál Yuuˈdi af giri Waag hol higiloká ebá mídhab! Hé kinaallá he hát gál kufe-, geđi loolnodheká muuniny?

¹⁶Gaman ninni-, gaalí een il ki ˈdaraanká har he midhíntaka, đo een lulle hai midhanayche. ˈGór hidh hí ˈdabíntaka, kolm ˈgor kinaalloká úba hé ˈdabaan.[49]

¹⁷ˈGór Waag hí fiiyyééllá hídhle kolmo he golmia. Gál Yuuˈdi Kirísto iiy ma yéenká he kolm Waag hí ˈgórle gaa muˈdeká. It hí Kirísto iiy chíéllá he ˈgór tím gáá ˈdieká kolmlé Waag hí ka muˈde-, muí kolm giri muí mureká albléká gaa kuokoyká.

¹⁸It kolm muí mureká albléká muí gaa kuokoyallá haí hol méeny, hí kieye, Nyííni kolm muí muréétíá nyí ˈdú ˈdúwa, hí chéen. Itín taalle hí kolmo, itín hidhdho hí ki luol.

¹⁹Itín kálmaréel hatallá haí cheedhe, Kolmééllá muí alb gaa murééllá, he giri alble muí nyí gaa kokuoká, haí cheedhe.

²⁰Iiy-hí, hééllá taglé. Tá onnóo! Waag kolm alb gaa muˈdééllá he ˈdaa giri gaal Kirísto iiy ma yéenká. He ˈdaa giri itín hí Kirísto iiy ki chieká in Waag hí alb kinaallá gaa kuokoyye. Aalé haí hol memêny, Waag kiikiadhíe.

²¹Har Waag káána ˈgór kolmle alb gaa muˈdeka, tá it Waag hí alb gaa kuokoyyééllá har hí Waag sug ki niiyyeka, Waag hé hí alb ma gaa mumuriny?

²²Aaléka, ití argiyye? Waag hé geer ka guurá ˈgayyo, tá gál hí af đuˈdusanká he illo ká aargisicha. Tá itín mu hé hí geer guurá argisie. Aalé har taalle hí mú el gaa igiˈdoka, mu geer guurálle taalle haí aargisia. Tá har hí mú sug ki niiyye-, hí mú điiteka, af kinaalka hát kolm biime-, muí murekáka, ha muí muura.

²³Tá kolm Waag hí alb gaa muˈde kinaal har Yiesu Kirísto bala ˈdú nie-, mú iiy yieka, Waag geđi ˈgór hí gaa muˈde kinaal haí gaa kokoyyo. Waag íín hééllá ekemeychoká hé uˈdo.

²⁴Itín hí hát kolm Waag hí ˈgór timiet gáá muˈde-, tá hát aađaká muuninyká ˈgór muí fieká gaa kuokoyká. Aalé Waag ˈgór he fiiyye kinaal kolmlé gáá muˈde kinaal geđi hol ˈdú nanniyyoká ebá súm hí hawul ki mán!

²⁵Nyaaramchú, hé geer geđi-, Waaˈgietallá hí eiy nannasatoká yú fede. Har hí hééllá hát ˈdabaanká eiy ma naasanka, kálmaréél gál súm ˈduuˈdúwaká hollo hí hol ká dhaˈgasanna. Gál Yisirayelallá ˈbaal hé met guogo, tá gaal met guogintlééllá hai ˈgaa, ˈdaab ameeny gál gál Yuuˈdi muuninyká gállé Waag hí rubach shigichoká lúl rubach ma árginyká.

²⁶Ebá gál Yísirayel hát lulle Waag hí rubach shigichoká yú hí ká geeye, hát káána giri Warˈgat Waaˈgiet hí hote-, kieye, Máá gálaat rianká Síyonno yé gáá ˈdeeme, mu ˈbíl íl Yakob[50] Waag điinle yé hai gáá ˈdeđia.

²⁷Tá gál Yisirayel ˈdéé afo yú iđimia, giri gáál ađaabanolle yú gaa egewká,[51] chieká.

²⁸Gál Yisirayel ˈbaal ˈdaa giri Fayam Midhab Kiristóóllá điidheká káána hé Waag hol ka kídh yie. Hééllá in hé hí ki midhabká hí yé gáá ˈdie. Tá Waag hé hátle gál Yisirayelallá giel, ˈdaa giri gáál eshim eshimle waarateká.

²⁹Aaléká, Waag hé gál waarate kinaal ma haađiny, héétí hé hé shiicho-, gálaat af iđicheká shiinyle el ma ˈgiisan.

³⁰It gál gál Yuuˈdi muuninyallá, it héle hát Waag hí feˈdeká điite. Aalé káána gál Yisirayel hát Waag hí feˈdoká điidhééllá, in itín hí Waag geer guuralle argiyye.

³¹Aalé itín Waag hí geer guurá argisichééllá, gaal ííni káána Waag điidhééllá Waag geer guurálle úba iiy hai yeedhe.

³²ˈDaa giri gálaat lulle Waag af đuˈduseká, in Waag hí gál hiiginká hoyche. Waag gáál hatallá koyyééllá, he giri gáál lulle geer guurá aargisichoká.

³³Waag kamurle ubaa ˈdaalimle, tá he onyle, ebá guđáan! Mú kasle hé tág kaskúnno ˈdú guđo! Mú ˈgierimlé ˈdúwáállá eiy naasanle hé tág gáál far ˈdú gogo!

³⁴Hát Warˈgat Waaˈgiet hí hote-, kieye, Mááya Máá Guđo Waag tawunyle og? Mááya mú af tie?[52]

³⁵Mááya kálta hé mákártaká Waag êw ki shie, tá Waag hí êw ki higita?[53] chieká.

³⁶He met lulle Waago yé gáá ˈdie, ki ija, tá geđi Máállé íín hí le. Waag taalle bííyyo gaalí meemeyo! Iiy-hí, he hí hát kinaallá yeet.