Read daasanach Róóma 14 Bible Online

Róóma 14 - daasanach bible

Róóma 14

¹Máá iiy yeenlé Kirísto iiy yieká đalidheká ka ˈjobontíe, mú tawunylé đalimmo muí ˈguo kinaal haí mú ˈdú ˈdéénsen.

²Mú tikiˈd íín iiy yeenleka, he met lulle kóony hé ma ˈdeeneny. Tá máá iiy yeen hí đalidheká so kóony hollo hol ká riidhdha.[60]

³Máá he met lulle kokuoká hai máá he met lulle ma kokonyká egeshêny. Héétí máá he met lulle ma kokonyká hai máá he met lulle kokuoká ˈdeđénsen, ˈdaa giri máá kinaallá Waag hí ká ˈjobonsoteká.

⁴Kúún mááya, kó gédéch máá eiy ˈdeđensetóol? Gédéch Waaˈgiet ˈdeđensetóóllá Máállé Guđo Waago hí ˈdeđente, muuninyka, hí máá ˈdúwaká yegedhe. Tá Waag hé mú ma ˈdeđensen, mú yiir hai gaa chiirata.

⁵Gáál ˈbaal kúlích tikiˈdeká hát kulichanóótíá ˈdú ˈdúwaká he ká dhaˈgama. Gáál ˈbaal íín kulich lullé hí ˈdúúw ki ˈgayya. Aaléka, gálaat lúl hí hééllá kasle eiy ki naasat, hí hé mákártaká gaa eet, el gaa veero.

⁶Gál kasleka kúlích tikiˈdeká hé kúlíchanóótíá ˈdú ˈdúwa yegetká Waag yaalmit kinaallá ˈdúúw gaa shiguoká fede. Héétí, gál so kokuoká Waag yaalmit kinaallá ˈdúúw gaa shiguoká fede, gaal hé so kinaallá ˈdaalleka Waag gielmít hol ˈdú nannuo. Hát tikiˈdééllá gál so ma kokonyallá Waag yaalmit kinaallá ˈdúúw gaa shiguoká fede, gálallá hé úba Waag gielmít hol ˈdú nannuo.

⁷Múún lulkúnno hé máá níínní luolmitle léká mán. Héétí hé máá níínní kúfáchle léká mán.

⁸Muun hátlé ke les ˈdug ˈdú ijóóllá, les ˈdug ˈdú iđinykúnno Waago ke gaa ˈduuwasia. Héétí ke kufeka, kúfáchkúnno Waago ke gaa ˈduuwaya. Aaléka, ke les ˈdug ˈdú ija yíekaʼ, ke kuf yíekaʼ, Waago gáál le.

⁹Kirísto kufe-, tá geđi loolnodhééllá, in gál kufeká ubaa gál luogolká Máállé Guđoká yie.

¹⁰Aaléka, kúún háteka nyaaram kua Kiristóól ˈdeđenseto-, muuninyka, egesheychóol? Onnóo, múún lulkúnno bar tikiˈd Waag met ha ke ki ˈdeeme, Waag ˈdéé hai gáál ki iđimicha.

¹¹Hát Warˈgat Waaˈgiet hí hote-, kieye, Máá Guđo Waag kieye, Taalle yú biiy gaa ijóóllá, bar ali hai kí ˈdeenne, gálaat lulle met kurram hai ye gaa ˈdarama, tá erb lulle yú hát Waagká hai hogodho, Máá Guđo Waag hí yieká,[61] Warˈgát hí chieká.

¹²Aaléka, múún lulkúnno hé kúnnaa mákártaká Waag met ha ke gaa hogodho.

¹³Aaléka, kí hol ˈdeensen hayo. Hé kinaal afleka kí hol ˈdéé mé gaa eet, giri nyaaram kúnnaa Kiristóóllá hé mákárta-, hí riigirsuo-, hí ađaabano mé ki kokuoká ke gáál ˈgas met ma gaa iđiminyká.

¹⁴Hééllá ˈdaa Yiesu Kiristoka yáá ki naan mán: Biiy hé ˈguom níínní hí gaa iđo-, Waag hí gáál ka ririatká mán. Tá máádhat har tawunyleka ˈguom mákártaká ke koeyka ađáábo gáál mé ki kokoyyo yeget-, tá íín har ˈguom kinaal koeyka, af kinaalka ađáábo he hile.

¹⁵Har kúún hé kua kokonyoká máá kua Kiristoká met gaa konye-, mú geer ˈdéént shiicheka, af kinaalka kó mú hát gielmitiká ma ki seseminy. Máá Kirísto hí ˈdú kufééllá ha ˈguom kua kinaallá kóonyle hí bađisîny.

¹⁶Aaléka, mé furit kíchia itle hí he lulle kokonyoká hí ki midhaballá, hé kinaallá hai hé gaalí ˈdú ˈdeđensetká onnôny.

¹⁷Guch Waaˈgiet héllé ˈdúwaká hé he kóony ubaa he ím muuniny, Guch Waaˈgiet he hát Waag hí feˈdoká ekenylé, héétí naanná ubaa geer gaa meen ke hol ki ijoká. Hééllá lulle Hím Naasan Waaˈgieto ˈdaalle yé gáá ˈdeˈdeme.

¹⁸Máá hújích Kiristo hatallá nannuoká Waago geer gaa memeye, héétí gálaat ˈdúúw haí shigia.

¹⁹Aaléka, hé naanná yé ká ˈdeđuoká ubaa hé ke hol ki gogofsuoká kí ˈdú laađaan.

²⁰ˈGuom kóony ˈdaalle ˈdugaka haí hújích Waaˈgiet eiy fufûny. ˈGuom íín lulle kóonyle hé midhab, tá he kóonyle har máádhat rigirsichoka, af kinaalka hé ˈdeew.

²¹Har so hí kokonyoká ubaa bersh hí igiannoká, tá he lullé hí ekemeychoká nyaaram kíchiallá rigirsuoka, hé kinaallá hanyo hí kalat.

²²Yaalmisanóóllá héllé iiy chie-, midhab-, geer ki sisitoká kúún ubaa Waag hol ki onnóo. Máá héllé geer ki sisidhoká hát midhabká óg-, hol ma ˈdú ˈdeđensenká, ebá Waag hí ˈdú ˈjiiy!

²³Tá máá so kóony ki nannaat-, kor so kinaal kuoká, hé ˈdeewká he ekey, ˈdaa giri he geer totom gaa ˈgiˈgiteká. Hé lullé mákárta-, tawunykúka tagle muuninyká ekeycheka, af kinaalka ađáábo hille.