Read daasanach Róóma 3 Bible Online

Róóma 3 - daasanach bible

Róóma 3

¹Aaléka, gál Yuuˈdi meete ˈdúwa gál gál Yuuˈdi muuninyká ˈdú ˈgaa? Hermisan gál Yuuˈdííllá meete midhab he ˈgayya?

²Iiy-hí, gál Yuuˈdi hé gál kidhdhoká hé hé ˈdúwa-, burnayká ˈdú ˈguo. Hé súm ˈdúwa-, gaalí gál kidhdhoká ˈdú ˈgúóllá, he ˈdaa giri gaal íín Waag hí ˈdeenyle gíl geer gaa kaayyeká.

³Tá gál Yuuˈdííllá hé ˈbaal ˈdeeny Waaˈgiet ma chíran. Gáál ˈdéé ma ki yaalintlééllá he in kieye, Waag héllé hotééllá hé tagle muuninyo, he yegedhe?

⁴Híʼi, he hé hát kinaallá muuniny. Har gálaat lulle úba hođom líítaka, Waag íín hát lullé he ˈdúwa, hát káána ˈDáwuˈd hí Waag geey-, mu kieye, Hé kuuní hogotoká taglé, ˈdeensenkú hé ˈdúwa,[5] yieká.

⁵Tá kálmaréel máádhat kieye, Ađaabano kúnnaa ke higilóóllá hé gáál midhant Waaˈgiet aargisuo, tá Waag har múún gáál he il ká aargisichoka, af kinaalka Waag hé ˈdeew, yieka, tá múún háte ke yeedhe? Hééllá hé gáál ˈbaal hí taawuoká yú hogodho.

⁶Tawuny hat kinaallóóllá Waag hí điito! Waag hé hé níínní ˈdeeneycheká mán. Tá Waag har gál he ˈdeđeneyoká he il ma ká aargisinyka, af kinaalka ˈdéé ki iđinyle hé tagle muuniny.

⁷Héétí kálmaréel máádhat hatal hai faalma, kieye, ˈDeeny chia hódho-, yú hogodhóóllá hé Waag hát hódho mán-, ˈdúwaká gálaat aargisuo. Tá Waag háteeye geđi ye ˈdeđensete, ye máá ađááb ˈguoká cheedhe? hai yeedhe.

⁸Tawuny hat kinaallóóllá hé ˈdeew. Gáál ˈbaal úba hé nyí ˈdeem af kaay. Gaal hé hogodhoká kieye, nyiin kerka gálaato nyí geđicha, nyí kieye, Kí hé ˈdeđewká eekemeyo, hé midhabká hí hé ˈdeđew kinaal yé gáá ˈdie, kerka nyí chegedhe, he yegedhe. Gál hééllá hogodhóóllá Waag ˈdéé haí ki iđimicha, hé gaalí hol ki ˈgeˈgedhoká hééllá.

⁹Aaléka, múúni ki gál Yuuˈdííllá, Waag innumleka, hé ke gálaat ˈdú ˈdúwa, ke hol yegedhe? Híʼi, he hé hát kinaallá muuniny. Hé ke hí geeyká kieye, gálaat lulle, gál Yuuˈdi yíekaʼ, gál gál Yuuˈdi muuninyká yíekaʼ, lulle ađaabano he gim gaa ija, muunîny?

¹⁰Warˈgat Waaˈgiet kieye, Biiy hé máá níínní tikiˈde úba saas mánká mán.

¹¹Hé máá níínní ˈdaallé-, Waag hol gaa ˈgeˈgedhoká mán.

¹²Gálaat lulle hé Waag ˈboiy gaa ˈdie, gaal lulle hé ˈdúúw ˈdabe. Biiy hé máá níínní tikiˈde-, úba hé midhabká ekemeyoká mán.[6]

¹³Gáál ˈdéé hótle hát úúshích af hí eiy ijo-, ká kekeenká. Gáál erble hé hođomká hí yiem gáá ˈdeˈdeme. Gáál agerle hé hí yiem gáá ˈdeˈdeenká hát lúabal af heđlé.[7]

¹⁴Gáál afle ki waaˈgasan ubaa ˈdeem heđeká hí koch.[8]

¹⁵Gáál ˈgasle đúla he gaa igira, giri gálaat fasam okoˈdmuoká.

¹⁶Gaal alb he sesemeká hé he ki ˈdeeđeney, gálaat buony ˈdú iđie.

¹⁷Gaal hé naanná ˈgíéríchle muog.[9]

¹⁸Gaal hé Waag kian hé níínni úba ka mánno,[10] he chie.

¹⁹Hééllá hé gaa édhká, hemuumurít gál Waag hí shiiche-, Yuuˈdííllá ˈdaallé he ki taalla, giri gálaat fálaam ká ririat-, gálaat lulle innum Waaˈgietka ˈdeensen ˈguoká.

²⁰Aaléka, hé máá níínní innum Waaˈgietka hemuumurít ki yaalitle ˈdaalleka Waag hí máá ˈdúwaká chegetoká mán. Hemuumurít gálaato hát saas ˈguoká he gáál ká aargisicha.

²¹Aalé káána Waag hé kár gálaat gál ˈdúwaká ki hođichoká gáál kí edhesiche. He veerit Moshe ubaa he veerit gál Waag hí ˈdeem ka shigicheká kárallá ˈdeenylé he hogodho. Kárallá hé hemuumurít el gaa igiritle ˈdaalle ma ki taaliny.

²²Kar ˈdaa Yiesu Kiristo he ki taalla. Gálaat lulle Yiesu Kirísto iiy yeget-, har káána úba gál kídh mákártaká kátaka, Waag saas haí gaa egeyye, innum Waaˈgietka gaal gál ˈdúwaká hai yegedhe.

²³Gálaat lulle hé ađaabano hile, muun hé ˈdúwa-, Waag hí gáál gaa feˈdoká hé ke ma ekêny.

²⁴Tá Waag ˈdúˈjímlé guđoká hállééllá he gáál ká argisiche, Yiesu Kirísto ali gáá kaayye, giri gáál ađaabano ubaa nyuogim gim gáá egewká. Aalé ke Yiesu Kirísto iiy yieka, in Waag múún gáál gál ˈdúwaká chegedhe.

²⁵Waag Yíésu ali gáá kaayyééllá, he giri mu suor yeget-, fásle okodmuo-, gál hí iiy yegetká ađaabano ubaa nyuogim gaa egewká. Waag mú ali gáá kaayyééllá, in he hát ˈdúwaká Waag hí gáál ká argisiche. Hé ˈdeđew-, héle gaalí eekemeyká hé muí il er nie.

²⁶Hééllá muí il er níéllá, he ˈdaa giri mu gáál nog ki sesemeká. Tá báralka, suor Yiesúúllá Waag hát he ˈdúwaká gáál ká aargisicha. Héétí gál Yíésu iiy yegetká in Waag hí gál ˈdúwaká chegedhe.

²⁷Aaléka, meete ke ˈgaa, ke hol ki memeye? Gon hé mán. Tá Waag múún gáál gál ˈdúwaká chegetóóllá, he hemuumuríti ke el gaa igire? Híʼi. Hééllá he ˈdaa giri ke Kirísto iiy yieká, in mu gáál gál ˈdúwaká yie.

²⁸Aaléka, máádhat hé hemuumurít ki yaalitle hí máá ˈdúwaká ma hođiny, iiy yeen muí Yiesu Kirísto iiy yieká in innum Waaˈgietka mú máá ˈdúwaká hođicha.

²⁹Waag íín he Waag gál Yuuˈdi tákáma? Hé úba gál gál Yuuˈdi muuninyká Waagle muuniny? Iiy-hí, Waag úba he Waag gál gál Yuuˈdi muuninyká.

³⁰Waag íín tikiˈde biiy gaa iđoká. Gál Yuuˈdi yíekaʼ, gál gál Yuuˈdi muuninyká yíekaʼ, máálle Kirísto iiy yieka, in Waag hí máálle hođisata.

³¹Aaléka, ˈdaa giri ke Kirísto iiy yíéllá, he hemuumurit Waag hí gál Yuuˈdi ka shiichééllá kí gadho, ke yeedhe? Híʼi, he hé hát kinaallá muuniny. Hemuumurít hélle ha ke đuusia.[11]