Read daasanach Róóma 8 Bible Online

Róóma 8 - daasanach bible

Róóma 8

¹Aalé káána ameeny gál Yiesu Kirísto ˈdú fameká, hé Waag hí ma ˈdeđensen.

²Aalé itín ˈdaa Yiesu Kiristoka, fargogint Hím Naasan Waaˈgiet hí luolmít shigichóóllá hé fargogint ađaabano hí kúfach mé ki kokoyyoká hé hí gim yé gáá ˈdeeyche.

³Hemuumurit Waag hí gál Yuuˈdi ka shiicheká hé fargogint níínní ˈgayye-, múún gáál ađaabano gim yé gáá ˈdeđicheká mán, ˈdaa giri balt gónkúnno hemuumurít a mé kí ˈjiiyyeká. Tá Waag íín dhúrle hé gáál ađaabano gim yé gáá ˈdeeyche! Mu Inyle múúni ke ađaabano ˈgúóllá gáál ali ˈdú gáá kaay. Iny gón gálaato kí yimie. Waag hé Inylééllá suor hoyche, ađaabano gálaat ˈdeentle ˈdú iđiche.

⁴Aalé múúni káána ke Hím Naasan Waaˈgiet atimle el gaa igiro-, ke balt gónkúnno el ma gaa igirinyallá, in hemuumurit Waaˈgiet héllé gáál gaa feˈdoká ki đuusinyle ura.

⁵Gál balt gonnietká ki ijóóllá tawunyle balt gónlé kinaallá he igiˈda. Tá gál Hím Naasan Waaˈgiet ki ijoká tawunyle íín hé Hím Naasan Waaˈgiet hí feˈdoká he kakata.

⁶Kas máádhat har balt gonniet hí he ki mumuˈdoka, af kinaalka kúfacho he yé ˈdú ˈdeˈdeme. Tá har Hím Naasan Waaˈgiet hí he ki mumuˈdoka, af kinaalka luolmít ubaa naanna Waaˈgieto he yé ˈdú ˈdeˈdeme.

⁷Hééllá he ˈdaa giri kas balt gonniet hí he gaa mumuˈdoká Waag nébká. Kas hatallóóllá hé hemuumurit Waaˈgiet met ma gaa kekeminy, ˈdaa giri fargogint níínní ˈgayyo-, Waag af ki ˈduuwasichoká mánká.

⁸Aalé gál balt gonniet hí he gaa mumuˈdoká hé hát níínní Waag geer gaa memeyoká mán.

⁹Tá itín har Hím Naasan Waaˈgiet hí gaa iđoka, it balt gonniet hí he ma ki mumuriny, Hím Naasan Waaˈgieto hí he ki mumuˈda. Máádhat Hím Naasan Kiristo manítaka, hé Kirísto hí ma lileny.

¹⁰Aalé káána Kirísto hí gaa ijóóllá, gónkícho har káána úba ˈdaa ađaabanokáka kufunannoka, Hím Naasan Waaˈgiet hé hí luolmit biiyoká shiiche, itín káána Waag innumleka, hí gál ˈdúwaká.

¹¹Aaléka, Hím Naasan Waaˈgiet Yíésu uushich yé gáá ˈdeeychééllá hé hí gaa iđo. Hát káána Yiesu Kirísto Waag hí geđi loolnoyche-, hí uushich yé gáá ˈdeeychééllá, gón kíchia kufunannóóllá úba mú Hím Naasanlé hí gaa iđóóllá ha muí ki loolnoyo.

¹²Aaléka, nyaaramchú, muun káána ke ađaabano gim yé gáá ˈdíéllá, ha geđi ke hé balt gón kúnno hí gáál ki mumuˈdoká hol ˈdú náan.

¹³Har hí balt gonnietká el gaa igiˈdoka, hí kuyyeka, it luolmit biiyoká ma higiliny. Tá ˈdaa Hím Naasan Waaˈgietka, hí hé kinaal hol ká riateka, luolmit biiyoká haí higilla.

¹⁴Ameeny gál Hím Naasan Waaˈgiet atimle el gaa igiroká, lúl he um Waaˈgiet.

¹⁵Itín hím naasan hí argiyyééllá hé hím naasan hí gede sierm ˈgayyoká hođichoká muuniny. Itín Hím Naasan Waaˈgiet hí um Waaˈgiet hođichoká hí argiyye. Hím Naasan Waaˈgietallá ˈdaalleka in muun ke Waag, Ába, Baabá, yegedhe.

¹⁶Hím Naasan Waaˈgiet ubaa sidhamkúnno hát múún gon ke um Waaˈgietká hé gáál geđicho.

¹⁷Aalé káána ke Waag umle yíéllá, Waag hé umle af iđicheká úba ha ke aargira. Héétí har muun hát Kirísto manyjayallá ke úba Kirísto ˈdaalle ki manyjayka, Waag múún Kirísto ˈgarro gáál hol ˈduuwasicha.

¹⁸ˈDuuw bár ˈdaatika Waag hí gáál ka shigichóótíá hé manyjany ke lésallá gaa maanyjawallá ke hol ma ki ekemeny. Manyjanyééllá hát hé káta mánká yú ká dhaˈgama.

¹⁹He lullé Waag hí ka kuonnééllá bár ka chiimeto-, Waag umle ˈduuwasichoká ali kí ˈdeˈdeenká hé tág fedo, met egeso.

²⁰He lullé Waag hí ka kuonnééllá, geer ˈdéénti he ki ija, tá hé he feditle muuniny, ˈdaa giri ađaabano he les ka hileká in les ubaa héllé lulle hí gaa ijoká Waag ˈdórle gim gaa ija. Tá bár giri hééllá lulle ˈdór kinaal gim yé gáá ˈdeenká ali hai kí ˈdeenne.

²¹Bár kinaallá he lullé Waag hí ka kuonnééllá Waag kúfach ubaa móˈd gim yé haí gáá ˈdeđicha, iđiny ˈdúwa Waag hí umle higilsichoká úba Waag haí higilsicha.

²²He lullé Waag hí ka kuonnééllá hát kul ˈdalietkáka hé egedhme, tá ˈjíig káána ke gaa ijóóllá hát egedhenká hé ke óg.

²³Múúni giri Waag gáál Hím Naasanle hé shiicho erkobká kí hoychééllá úba hé ke egedhen, ˈdaab ke he lullé Waag hí umle af iđicheká ma árginy-, Waag gónkúnno kúfach ubaa móˈd ma gáá ríinyká. Hééllá feditle hé tág ke súm ˈguo.

²⁴Af giri Kirísto múún gáál rubach shieká in ke he lullé Waag hí umle af iđichééllá met esinyle arge. Máádhat hé argeká geđi háteeye he met egese?

²⁵Tá hé ke met egesoká hátle ke ma arginyka, ke taalle mé ki chiirsat-, ke Waag iiy yeget-, ˈjíig ke hé ke feditle ˈguo kinaal il ki aargiroká.

²⁶Aalé Hím Naasan Waaˈgieto in muun gáál đalim kúnnaallá yiir gaa chichirata. Hé ˈdúwa ki Waag rogononká hé ke muog, tá Hím Naasan Waaˈgieto dhúrle muun gáál ˈdéé met gaa sisita, buony kúnnaa edhminy-, múún dhúrkúnno ke muogká Waag geđicha.

²⁷Waag ííni hé gerkúnno ógallá hé Hím Naasanle kasle óg. Waag Hím Naasanlééllá hát Waag hí feˈdoká in gál Waaˈgiet Waag ki vivisata.

²⁸Gál Waag giel-, Waag hí he gaa feditle kí viiyyééllá, he lullé gáál kárle ká nannaatká Waag hujich haí ki nannasata. Hé kinaallá gáál ˈdaalleka hát hé midhabká hí yé gáá ˈdeˈdeenká hé ke óg.

²⁹Waag hé gállé hátlé ma ka ˈdaláanká óg, hé úba gáál taak koyye, giri gaal hát mú Inyle yeget-, Iny gál burnay-, hol nyaaramallá angʼalle yegetká.

³⁰Aalé gál Waag hí taak koyyééllá in úba Waag hí ká viiyye. Gaal ííni muí ka víéllá in úba muí gál ˈdúwaká yie. Gál muí gál ˈdúwaká yíéllá he gál muí ˈduuwasuoká.

³¹Aalé káána, hé midhab hatallóóllá ˈdeeny máre ke hol gaa nannaa? Waag har ˈdaakúnno ki taalka, meete ke kikiadha?

³²Waag Inyle ma kulnásan-, ˈdaa kúnnoka ká sillichééllá hé úba he met lulle hát geer gaa midhantiká gáál ma ká shígîny?

³³Aalé Waag gál he waarateká in gál ˈdúwaká chegedhe háluke, tá mááya gálallá ˈdeđente?

³⁴Máá muun gáál innum Waaˈgiet gaa ˈdeđensetká he mááya? Hé mán. Muun Yiesu Kirísto tikiˈde-, gáál ˈdú kufe-, Waag hí geđi loolnoyche-, hí uushich yé gáá ˈdeeyche-, káána Waag gíl ˈdaa naaniet ijóóllá, in múún gáál ˈdéé ˈdú hogodho.

³⁵Mááya muun gáál gielmit Kirísto hí muun gáál ka ˈgúóllá gaa ˈgiidhia? He in hé il hí gáál aargiˈdokâ, ebá tawuny ˈgany? He in manjasiny muun gaalí gáál manyjasuokâ? He in kuoˈd ˈgany ubaa geleem mánti? Ebá he in oos ubaa kúfach?

³⁶Hát Warˈgat Waaˈgiet hí hote-, kieye, ˈDaakícho ˈdugaka, nyíín aadh lullé gaal nyí yegese, nyiin hát wala gaalí yegeská gaalí nyí ká dhaˈgama,[19] chieká.

³⁷He lullé il hí nyí aargiˈdóóllá nyáá nyí ma gaa giinany, ˈdaa Kirísto muun gáál gielallá ˈdaalleka lúl a mé ha nyí kí faanna.

³⁸Tá yáá gon óg, kúfach ubaa luolmít yíekaʼ, gál ˈgasso-, urruká ubaa kansimano aryaanká yíekaʼ, hé baralloká, muuninyka, hé bar ˈdaatiká yíekaʼ, farguoginsam met lulle

³⁹úr gaa iđoká yíekaʼ, les geeréétí gaa iđoká yíekaʼ, héétí he met lullé Waag hí ka kuonnééllá hé hát níínní gielmit Waag hí muun gáál ka ˈgayyo-, ke ˈdaa Kiristo gaa argééllá gáál gaa ˈgiidhuoká mán.