Read daasanach Korínto Erká 1 Bible Online

Korínto Erká 1 - daasanach bible

Korínto Erká 1

¹Yú he Báulo, máá Waag hát hí ki feˈdeká hí ká viiyye-, hí máá ali gaa kaany-, Yiesu Kiristoká hoycheká. Warˈgatééllá yú ubaa nyár kúnnaa Sóstenes,

²it gál Kiristo-, ˈjien Korinto gaa iđa-, Waag hí ká viiyye-, Yiesu Kirísto hí saas gaa dhiire-, hí Waag gálle hoyyallá, tá gál biiy lúl gaa ijo-, Máállé tikiˈde úba Máákúnno Guđo Yiesu Kirísto lééllá vivisatallá ke hí ˈdu gáá veere.

³ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

⁴Yáá aadh lulle ˈdaakíchoka Waagchú gielmít hol ˈdu nannuo, ˈdaa giri Waag hí ˈdúˈjímle ˈdaa Yiesu Kiristo kí shiichééllá.

⁵ˈDaa giri hí Yiesu Kirísto hol ˈdú faannééllá, in Waag hí he met lulle ˈdú ookodmiche, hát káána ˈdéé hót midhabká ubaa ˈdaalím lullé.

⁶Fayam Kiristóóllá hé gerkícho hát ˈdabaanká hille.

⁷Aalé káána ˈdaab Máá kúnnaa Guđo Yiesu Kirísto hol ká naanle hí súm met egetóóllá, it hé shiicho Waaˈgiet tikiˈd úba ma gaa ˈdaabiny.

⁸Kirísto úba tág haí chiiˈda, ˈjíig biiy el ˈdaˈd đig, giri kúlích hí Máá kúnnaa Guđo Yiesu Kirísto met ki ˈdeenneká hí ˈdeensen ˈdaabiyyoká.

⁹Waag ííni hí ká viiyye-, giri itín hí Inylé Máá kúnnaa Guđo Yiesu Kirísto hol ˈdú faannééllá, dhúrle hé ˈdúwa, hát ˈdabaanká haí chiirata.

¹⁰Nyaaramchú, Máá kúnnaa Guđo Yiesu Kirísto meenyle ˈdaalleka, gillo yú hí ki efe, hol af iiy yiegedhíe, haí hol eiy gaa ˈgiˈgísan. Tikiˈd yiedhíe, kás hí tikiˈd cheet, hé me hí igiroká úba hí tikiˈd yeet.

¹¹Nyaaramchú, yú hatallá yíéllá, he ˈdaa giri Kilói ˈbíl geerle gáál ˈbáál itín hát hí hol shalal fiiyyééllá fayamle ye shieká.

¹²Hé yú hogodhóóllá, itín mú tikiˈd kieye, Yú máá Baulo, máátí kieye, Yú máá Abollos, máátí kieye, Yú máá Kefas,[1] máátí kieye, Yú máá Kiristo, hí chegedhe.

¹³Kirísto in eiyyo hol mumure? Yáá Báulo lééllá yáá ˈdaakíchoka ˈgór đarám yaalká ma ˈdú kúfinyká muuniny? Ebá meeny chia Báulo lééllo gaalí itín bie gim ki nie?

¹⁴Itín máá níínní yú bie gim nieká mán, hurtkíchoka Kirísbos ubaa Gáíyos tákáma yú bie gim nie. ˈDaa kinaallá ˈdugaka, yáá Waag gielmít hol ˈdú nannuo,

¹⁵giri itín máá níínní kieye, yú ˈdaa meeny Baulo bie gim ki nadhe, yegetká mánká.

¹⁶Iiy-hí, shóʼo! Yáá úba Estéfanas ubaa ˈbíl geerle bie gim nie, tá yáá máá éíy taaka bie gim nie-, ógká mán.

¹⁷Kirísto hé ye gálaat bie gím nímle ali ma ˈdu gáá káany. Mu Fayamlé Midhaballá ˈdiiyiminylé ye ali ˈdú gáá kaay, giri yú fayamééllá hát ˈdee onyiká ma ki ˈdiiyiminy-, kúfách Kirísto hí ˈgór đarám yaalká ˈdú kufeká ˈdiiyiminyle fargogínt ma ˈdaabinyká.

¹⁸Fayam Kiristo máálle ˈgór đarám yaalká ˈdú kufééllá, gál hí iiy ma yegen-, baađawallá, hé đeeymo hí ká dhaˈgama. Tá múúni ke Waag rúbáchle gaa ijóóllá, fayamééllá muunka he Waag fargogintlé.

¹⁹Hát Warˈgat Waaˈgiet hí hote-, kieye, Yú gál ˈdaalleléká ˈdaalimle ha ˈdeđeneye, gál he ooʼogká ˈdaalimle eiy ha fufumia,[2] chieká.

²⁰Aaléka, gál ˈdaalleléká ubaa gál gálaat nyatalaam oonisuoká, tá gál lésalka ˈdéé huogon súm ógká kor meete gáál ká geđia? Waag hé ˈdaalim lesalloká hé đeeymo hoycheká muuniny?

²¹Waag hé ˈdaallé, tá hé ˈdéé murate, giri gál lesalloká ˈdaalimle Waag ma ki kiimisanká. Héél afleka, Waag fayamle ˈdiiyiminylé gál lesalloká hí hé đeeymoká ka dhaˈgasanallá ˈdaalle ˈdugaka in gál fayám iiy yegetká rubach shigicha.

²²Gál Yuuˈdi íín hé af ˈdaˈdaboká he fede, giri fayam nyí ˈdiyeennééllá hát Waag gáá chimieká il ki aargiroká. Tá gál Hellen íín hé ˈdaalimoká he hol gaa ˈgeˈgedhe.

²³Tá nyíín Kirísto gaalí ˈgór đarám yaalká ˈdú yieská nyí ˈdiyeenne. Fayamééllá he fayam gál Yuuˈdi iidhansicho-, gál Hellen íín hí hé đeeymo ka dhaˈgasanká.

²⁴Tá gál Waag hí ká viiyye-, gál Yuuˈdi yíekaʼ, gál Hellen yíekaʼ, nyiin nyí fayamééllá ki ˈdiyeennallá, gaal íínka fayamééllá he Kirísto, giri Waag fargogintle ubaa Waag ˈdaalimle hí gaa iđoká.

²⁵Hé gálaat hí đeem Waaˈgiet ka dhaˈgasanká hé gáál ˈdaalimle ˈdú ˈdaallé, héétí hé gálaat hí đalim Waaˈgiet ka dhaˈgasanká hé gáál fargogintle far ˈdú gogo.

²⁶Nyaaramchú, af giri Waag hí ka veveenneká yaalmisano hí ki iđeká, ebá táb ˈdodhdhíe. Gálaat tawunyleka, itín af kinaal it iraam mán mare hí ˈdaalileyye, héétí it iraam mán mare hí kansimano ˈgayye, úba hí gál ˈdúwaká onnoyye.

²⁷Gál lésalka gaalí gál đéeská ka dhaˈgasanká hé Waag hí waarate, giri gál ˈdaalleléká kern ˈgiˈgidhichoká, héétí gál lésalka gaalí gál farguoginsam mánká ka dhaˈgasanká waarate, giri gál farguoginsam ˈguoká kern ˈgiˈgidhichoká.

²⁸Gál lésalka gaalí gál ˈdúúw mánká ka dhaˈgasanká ubaa hé gaalí il bís ki dhaˈgasan-, gaalí egesheyóóllá hé Waag hí waarate, giri hé gál lesalloká hí hé ˈdúwaká ka dhaˈgasanká Waag hí hé káta mánká hođichoká.

²⁹Waag hééllá ekeychééllá, he giri innumleka máá níínní hol memeyoká mánká.

³⁰Tá Waag hé itín ubaa Yiesu Kirísto hí hol ˈdú fiiyye, Kirísto ˈdaalimkúnno hoyche. Kirísto ˈdaalleka Waag hé muun gáál gál ˈdúwaká hoyche, gáál gálle hosote, gáál ađaabano gim yé gaa ˈdeeyche.

³¹Aaléka, hééllá he hé Warˈgat Waaˈgiet hí hote-, giri kieye, Máádhat har hol hé mákártaká ki memeyoka, hai hé kinaal hol ki memêny, hí Waag meemeyo,[3] chieká.