Read daasanach Korínto Erká 13 Bible Online

Korínto Erká 13 - daasanach bible

Korínto Erká 13

¹Har káána úba yú afano gálaatká ubaa afano gál ˈgasso-, urru-, Waaˈgietká onnôny-, kor yú gielmít manítaka, af kinaalka hé chia yú hogodho kinaal hát hé kaal he shesheenno.

²Tá yú Waag har ye gállé ˈdéé ka shigichoká mú tikiˈd hôny-, yú hé ger geđiká lulle ubaa ˈdaalím met lulle onnôny-, iiy yeen gumano alb gaa gugursichoká úba ˈgíiny-, kor gielmít mannânyka, yáá máá kátaká mán.

³Héétí har hé chia lulle yú ˈguoká yú gálaat shigîny-, sídhchú úba sillîny-, giri yú hol memeyoká, kor yú gielmít manítaka, yáá hééllá ˈduuw níínní gaa aargiroká mán.

⁴Gielmít he geer gaa gúchi, gielmít hé geer ka guurá ˈgayyo, hé hinááf mán. Gielmít hé hol meeny mán, hé ma muurshany.

⁵Gielmít hé hát kern mantiká ma ká seseminy, hé hátlé feˈdoká gálaat mé ma ki tatiny, hé ídho ma ˈjobonony. Gielmít hé gálaat héllé ˈdeđewká mé ma ki sisin,

⁶hé hé ˈdeđewká geerle hí ma gaa memeen, hé ˈduuˈdúwaká geerlé hí gaa memeedhe.

⁷Gielmít he lúl hai ˈdú fafaata, he lulle ˈdaalleka iiy yeenno Waag gaa iđimicha, Waag hé ˈdúwaká hát he ekemeychoká hé óg, héétí he lullé mé ki chichirsata.

⁸Gielmít íín hé el me hí ma ˈgiˈgin. Tá hé shiicho Waag hí gáál ka shigicho-, hát káána ˈdeem Waag hí gáál ka shigichoká ˈdiiyiminylé, ubaa afano Hím Naasan Waaˈgiet yé gáá ˈdeˈdeenká huogon, tá ˈdaalím ˈdéé hótlé íín lúl el met haí ˈgiidha.

⁹Muun káánaka hé ke hátle he lúl muog. Héétí ˈdeem Waag hí gáál ka shigicho-, ki ˈdiyeennallá hé gáál he lulle ma ká geđiny.

¹⁰Tá bár giri muun ke he lulle hát tagléká ke eiy nannasatká ali kí ˈdeennoká, ˈdaalim iraam mánnallá bárle đo el met haí ˈgidhe.

¹¹Af giri yú ninineyká, ˈdéé hótchú ubaa tawunychú, tá kaschú lulle hát hé máá ninniká. Aalé káána yú hirayallá, yáá yaalmit niganti kinaallá in gáá yimie.

¹²Hé káána ki argóóllá, he hát síbíl gaa boorochká ke he ki dhaˈgasan, tá bár ka chimetóótíá he lulle hát ˈdabaanká il ha ke ki aargira. Hé yú káána ógallá yáá tagano muog, tá bár ka chimetóótíá hát tikiˈde Waag ye alúl ógallá, hé kinaallá hát ˈdabaanká eiy ha yú naata.

¹³Aalé káánaka, hé farguogo-, ke ˈguoká he iiy yeen ke Waag ka ˈguoká, ubaa hé ke met egessoká hát he ˈduuwawká ónyi, héétí he gielmíti. Tá hé seđééllá héllé hí a mé ijoká he gielmíti.