Read daasanach Korínto Erká 14 Bible Online

Korínto Erká 14 - daasanach bible

Korínto Erká 14

¹Aaléka, gielmít ˈgany ˈdú laađamíe. Héétí hé shiicho Hím Naasan Waaˈgiet hí gálaat shigichoká feditle ˈgáa, tá hé shiicho-, gálle Waag hí ˈdeem ká shigicho-, ˈdiyeenká feditle súm ˈgáa.

²Har máádhat af Hím Naasan Waaˈgiet yé gáá ˈdeˈdeenká ˈdéé ki hogodhoka, hé gálaat ma geđiny, Waago he geđia. Gálaat hé ˈdeeny muí hogodho kinaallá muog, mu hé geer geđi Waaˈgietká Hím Naasan Waaˈgiet ˈdaallé ki hogodho.

³Tá gál Waag hí ˈdeem ká shigicho-, ˈdiyeenká íín gálaato geđia, ˈdeemle gálaato ˈdiˈdisa, gogofsia, úba aabunsia.

⁴Máá af Hím Naasan Waaˈgiet yé gáá ˈdeˈdeenká hogodhoká, ínalle tákámlé hol ˈdiˈdisa, tá máá ˈdeem Waag hí ká shigichoká ˈdiyeenká íín gál Kiristo he ˈdiˈdisa.

⁵Yú itín lulkícho hí afano Hím Naasan Waaˈgiet yé gáá ˈdeˈdeenká hí hogotoká yáá fedo, tá súm hé yú hí ki fedoká he itín hí ˈdeem Waag hí ká shigichoká ˈdiyeennoká. Máá ˈdeeny Waaˈgiet ˈdiyeenká hé máá af Hím Naasan Waaˈgiet yé gáá ˈdeˈdeenká hogodhoká ˈdú ˈdúwa. Tá mu har af kinaallá gálaat eiy ki nannuoka, hé kinaallá taglé, giri gál Kiristo lulle gúóf aargiroká.

⁶Aaléka, nyaaramchú, har yú hí ˈdu gáá yimie-, afano Hím Naasan Waaˈgiet yé gáá ˈdeˈdeenká hogodhoka, hé kinaallá meete ˈdúwa hí gaa aargiˈda? Tá yú hí hé Waag hí ye kí edhesicheká yíekaʼ, ˈdéé hót ˈdaalimoká yíekaʼ, ˈdeeny Waag hí ye ká shiicheká yíekaʼ, héétí he onisiny yíekaʼ, hééllá hé mákártaká yú hí ˈdu gáá sidheka, ití bal mé ma ki kakaan?

⁷Fuorit ubaa hé éíy taaka gaalí arram ki ˈdaraan-, sidham mánnallá gaalí hát ˈdabaanká arram ma ki ˈdaraminyka, gálaat hé arram kinaallá hát ˈdabaanká eiy nannasat?

⁸Faˈd har shímle gaalí eiy ma nannasanka, yuoy faˈd kinaallá hát hí oos ki veveennoká háteeye he og?

⁹Hát tikiˈdééllá itín úba har hí ˈdéé hót gálaat hí ma kiimisanká hogotoka, gálaat háteeye ˈdeemkícho maala? Hé kinaallá ˈbakate hí geđicha.

¹⁰Biiy afano hol ká eiyye-, burnayká hí gaa ija, tá gál afano kinaallá maaloká hé ˈdeem gaalí hogodhoká hélle eiy nannasat.

¹¹Tá har af máádhat hí hogodhoká yú móíytaka, af kinaalka yú mu íínka, hát máá kídh éíyyo muí ye ká dhaˈgama, mu íín úba yúka, hát máá kídh éíyyo yú ká dhaˈgama.

¹²Aaléka, ˈdaa giri hí hé shiicho Hím Naasan Waaˈgiet hí gálaat shigichoká gófle hí ˈgayyoká, hé shiicho gál Kiristo ˈdiˈdisoká laatle laađamíe, gáál kí ˈdiiˈdisáa.

¹³Tá máá af Hím Naasan Waaˈgiet yé gáá ˈdeˈdeenká hogodhoká, hí Waag visat, giri Hím Naasan Waaˈgiet hí af kinaal eiy nímle shigichoká.

¹⁴Har yú af Hím Naasan Waaˈgiet yé gáá ˈdeˈdeenká Waag ki vivisatka, sídhchú hé Waag vivisato, tá kaschú íín hé Waag visan sídhchú hí vivisatóóllá muog.

¹⁵Aaléka, háte yú ˈdeeme? Sídhchú hí Waag viivisat, tá kaschú úba hí Waag viivisat. Héétí sídhchú hí arram ˈdaaraan, tá yú arram kaschú hí eiy nannasatoká úba ha ˈdarama.

¹⁶Har sídhkú Waag vivisato-, Waag memeychoka, gál Waag hurt gaa vivisato kinaallá, ˈdaa giri kuun hát Waag gielmít hol ˈdú nanniyyoká muogká, háteeye, Iiy-hí, he hí hát kinaallá yeet,[33] yegedhe? Gaal in hé kua hogotoká má maalo háluke!

¹⁷Hé ˈduwa, kó Waag gielmít hát ˈdabaanká hol ˈdú nanniyyo, tá gál kinaallá íín hé Waag visan kuallá hí ma ˈdiˈdisiny.

¹⁸ˈDaa giri yú hí lulkícho afano Hím Naasan Waaˈgiet yé gáá ˈdeˈdeenká súm ˈdú hogodhoká, yáá Waag gielmít hol ˈdú nannuo.

¹⁹Tá gál Kiristo hol ˈdu gáá yiimieka, hurtle ha yú ˈdéé um shíí af Hím Naasan Waaˈgiet yé gáá ˈdeˈdeenká ki húógon. Hé kinaal afleka, yú ˈdéé um chen af kaschú hí ógká ki hogodho-, gáál he ki oonisuoka kalat.

²⁰Nyaaramchú, kaskícho hai kas um niginiká onnôny. Hát um nigini-, hé ˈdeđewká muogká yeedhíe, tá kaskícho hí kas gál hirayká cheet.

²¹Warˈgat Waaˈgiet kieye, Yú gálallá gál éíy taaka-, afanolle gaalí muogká ha ki geđia, tá har úba káána hát kinaal kátaka, gaal hé ye a nee ma kokony,[34] Máá Guđo Waag hí yie.

²²Aaléka, afano gálaat hí muogká huogonle he hé gál Kirísto iiy yieká ˈdiˈdisoká muuniny, he hé gál Kirísto iiy ma yéenká hí argeka, gáál taalle mé guuđanayoká. Tá ˈdeem Waag hí gáál ka shiicheká ˈdiiyiminyle he hé gál Kirísto iiy ma yéenká mé ma guuđanany-, héétí gál Kirísto iiy yieká ˈdiˈdisoká.

²³Kálmaréélka, it Kiristoká lulkícho hí hol ˈdu gáá chimie-, lulkícho hí afano Hím Naasan Waaˈgiet yé gáá ˈdeˈdeenká hogotoka, tá gábáríchatí, muuninyka, gál Kirísto iiy ma yéenká hí hurt ká hileka, gaal hé gál sigiraam hí fameká hí ma ká dhaˈgaminy?

²⁴Hé kinaallá afleka, har lulkícho ˈdeem Waag hí ká shigichoká hí ˈdiyeenno-, tá máá gábáríchatí, muuninyka, máá Kirísto iiy ma yéenká hí hurt ká hileka, he lullé mamaloká hí bíl hođia, ađaabanolle kiimita,

²⁵mú tawunylé geer geđiká Waag haí ká eedhesicha, tá mu Waag met les kurram hai gaa ˈdarama, Waag viita, tá hí geđia, kieye, Hé ˈduwa, Waag hé hí hurt gaa iđo, haí yeedhe.

²⁶Nyaaramchú, háteeye ki yeedhe? Af giri hí hol ˈdu gáá chiimet-, hí Waag hol ˈgar vivisatoká, mááká hé ár ka ˈdaraanká ˈguo, mááká hé he onisiny gáál af ki tatuoká ˈguo, mááká hé Waag hí kí edhesicheká ˈguo, mááká hé ˈdéé hót af Hím Naasan yé gáá ˈdeˈdeenká kí hogodhoká ˈguo, héétí hé máá ˈdéé hót af kinaal gáál eiy ki nannuoká ˈguo. He lulle hí hé gál Kiristo ˈdiˈdisoká onnow.

²⁷Har gálaat afano Hím Naasan yé gáá ˈdeˈdeenká ˈdeem ki hogodhoka, hí naam, muuninyka, hí seđ tákámle onnow, tá hí hol kal ˈgiiˈgidhuo, héétí máádhat hí gálaat ˈdeem kinaal eiy ki naannuo.

²⁸Tá har máá gálaat af ki nannuoká líítaka, af kinaalka máá af Hím Naasan Waaˈgiet yé gáá ˈdeˈdeenká ˈdéé ki hogodhoká fedoka, hí shab yeet, hí íín ubaa Waag hol gieđuo.

²⁹Gál Waag hí ˈdeem ka shigichoká, naam yíekaʼ, seđ yíekaʼ, hí ˈdeem kinaal ˈdiiyeen, tá gálatí hí ˈdeem kinaal ˈduuwle eiy naanasat.

³⁰Tá máá Waag hí ˈdeem ká shigicho kinaal hátlé ˈdéé af ká ˈguoká, gál ál kinaal ijoká mú tikiˈd har Waag hí ˈdéé hót kí edhesicheka, máá ˈdéé hogodho kinaal hí ˈdeenyle ali kuo, hí mú kar shuo.

³¹Hatallá in it lul kíchia Waag hí ˈdéé ka shigichóóllá hát taataká haí ˈdiyeenne, giri gálaat lulle he oonoot-, gofononká.

³²Gál Waag hí ˈdeem ká shigichoká har kar argeka, hí ˈdeeny Waag hí ka shigiche kinaal ˈdiiyeen. Har kar ma arginyka, hí shab yeet,

³³ˈdaa giri Waag he máá gáál mé guuđanayoká muuniny, he Waag naannaká. Hát káána gál Kiristo lulle albano mákártaká met hí hol gaa aargiro-, Waag vivisat-,

³⁴gál ˈdiet íín hí gaa shaballá, itín af giri me hí hol aargiroká gál ˈdiet úba hí shab onnow. ˈDég alb kinaal ˈdeem gaa hogotoká hé tagle muuniny. Hát hemurít hí chiekáka, ˈdég hí gáál af nee kuokoyyo, chieká.

³⁵ˈDég har ˈdéé hót eiy nannasatoká feˈdoka, hí ényle beelemle gaa heegeset. Min gál Kiristo hol ˈdú sienyle hurtle ˈdéé gaa hogotoka, hé kinaallá hé tagle muuniny.

³⁶ˈDeeny Waaˈgiet hí dhaaycheká in itíni hí yé gáá ˈdie? Ebá, itín tákáma hí mé đig ká yie?

³⁷Máádhat har máá Waag hí ˈdeem ká shigichoká, muuninyka, máá Hím Naasan Waaˈgiet atimle el gaa igiroká hol ká dhaˈgasanka, hí ˈdeem yú ka veerééllá hát he hemurit Máá kúnnaa Guđoká yé gáá ˈdieká hí ká dhaayo.

³⁸Tá máádhat har hééllá nee ma kokonyka, ha gaalí af nee kôny.

³⁹Aaléka, nyaaramchú, ˈdeem Waag hí ká shigicho-, hí ˈdiyeennoká feditle súm ˈgáa, tá gál afano Hím Naasan Waaˈgiet yé gáá ˈdeˈdeenká hogodhoká haí afano kinaal huogonle gáá momôny.

⁴⁰He lullé hí ekemeychoká, hát midhab-, tagléká eekemeyyíe.