Read daasanach Korínto Erká 15 Bible Online

Korínto Erká 15 - daasanach bible

Korínto Erká 15

¹Aaléka, nyaaramchú, Fayam Midhab-, kis yú hí kí ˈdiiyime-, hí iiy chie-, hí tág ki taalallá, bá yú hí káána ááy kí naa.

²Fayam Midhaballá in hí rubach gaa aargiˈda. Hé kinaal har Fayam yú hí ki ˈdiyimeká hí tág ki taalka. Tá har hí tág ma ki taalinyka, af kinaalka iiy yeenkícho taalle hállééllá.

³Yáá Fayam súm ˈdúwa-, Waag hí ye ká hilsicheká hí ká hilsie, giri Kirístolle ađaabanokúnno ˈdú kufeká. Hééllá hé Warˈgat Waaˈgiet kis hí hote.[35]

⁴Héétí mú hé gaalí galie, tá gíl ki seđeká mu hé loolnodhe, Waag hí uushich yé gáá ˈdeeyche. Warˈgat Waaˈgiet úba hé hééllá hote.[36]

⁵Kirísto uushich yé gáá ˈdieká, mu Kéfas[37] yé ˈdú gáá ˈdie. Aalé el gaa igíˈdelle mu gál láli tomon a naamaká yé ˈdú gáá ˈdie.[38]

⁶Waaséél mu gál hí iiy yie-, kúˈd chen a yíé ˈdieká yé ˈdú gáá ˈdie. Gál kinaallá afééllá gúch hé alb ijo, tá ˈbaal hé guraam hí guure.

⁷Tá gál kinaal el ˈdaal, mu Yákob yé ˈdú gáá ˈdie, waaséél gál alb fimiká lulle yé ˈdú gáá ˈdie.

⁸Aalé hé kinaal lulle el ˈdaal, mu yáá máá hát máá bár tagle muuninyká gaa ˈdalidheká, yaa he ye yé ˈdú gáá ˈdie.[39]

⁹Yú Kirísto gállé alb fimiká máállé biiy el ˈdaˈdká. ˈDaa giri yú kis gál Kiristo manyjasieká, yú onnônyka, gaal hé ye mú máállé ali gaa kaanyká ma yégen.

¹⁰Tá Waag ˈdúˈjímle ˈdaalleka in yú hát ijóóllá yie. ˈDúˈjím Waag hí ye ká shiichééllá hé hé guđo-, midhabká ekenyle ye yé ˈdú ˈdeeyche, yáá gál alb fimíítí hujich súm ˈdú nie. Tá hújích yú níéllá hé ˈdaa fargogintchú yú ma ki níiny, he ˈdaa ˈdúˈjím Waag hí ye shiichééllá fargogintlé yú Waag hujich ki nie.

¹¹Aaléka, yú hí ki ˈdiyime yíekaʼ, gál alb fimíítí hí ki ˈdiyime yíekaʼ, fayam nyiin nyí ˈdiyeennallá áwúlle tikiˈde, fayám he fayam hí iiy chíéllá tákáma.

¹²Aaléka, ˈdaa giri fayam nyí ˈdiyeennallá kieye, Kirísto hé geđi luolnodhe, Waag hí uushich yé gáá ˈdeeyche, chieká, tá háteka itín ˈbaal hí kieye, Gál kufeká hé geđ ma loogolnon, uushim yiem ma gáá ˈdeˈdeminy, hí chegetóol?

¹³Har hé hí hogotóóllá ˈdúúw kátaka, af kinaalka Kirísto hé geđi ma lóólnon, Waag hí uushich yé ma gáá ˈdéeny.

¹⁴Tá Kirísto har geđi ma loolnon-, Waag hí uushich yé ma gáá ˈdeenyka, hé nyí ˈdiyeennallá af kinaalka, hé kátaká mán, héétí hé hí iiy chegetóóllá hé úba kátaká mán.

¹⁵Héétí, ˈdaa giri nyíín nyí kieye, Kirísto hé geđi luolnodhe, Waag hí uushich yé gáá ˈdeeyche, nyí chíéllá har hódho kátaka, nyiin af kinaalka Waago nyí hódho af kaayye. Tá gál kufeká uushim yiem gáá ˈdímle har hódho kátaka, af kinaalka Waag hé Kirísto uushich yé ma gáá ˈdéeny.

¹⁶Har gál kufeká Waag hí ma logolnony-, hí uushim yiem ma gáá ˈdeđinyka, af kinaalka Kirísto hé hátle uushich gaa iifo.

¹⁷Tá Kirísto har geđi ma loolnon-, Waag hí uushich yé ma gáá ˈdeenyka, af kinaalka iiy yeen kíchia hí Kirísto ka ˈgayyáállá hé nyag mán, it hátle nyuogim ubaa ađaabano gim gaa iđa.

¹⁸He har hát kinaal kátaka, gál Kirísto iiy yie-, tá kufeká hé úba rubach ma árginy, bađay.

¹⁹Har iiy yeen kúnnaa ke Kirísto iiy yíéllá bár ke les ˈdug ˈdú ijóóllá tákámle gáál ki midhínta-, biiy íín luolmit biiyoká manítaka, af kinaalka yaalmitkúnno hé tág yaalmisano gál les ˈdug ˈdú ijóóllá lúl ˈdú ˈdeew.

²⁰Tá Kirísto íín hé geđi luolnodhe, hé Waag hí uushich yé gáá ˈdeeyche, ˈdaa kinaallá ˈdugaka, gál mú iiy yieká hát he uushim yiem gáá ˈdeˈdeenká hé ke óg.

²¹Hát káána mú tikiˈd ˈdaalle kufach hí ka nadhééllá, gál kufeká uushim yiem gáá ˈdímle úba mú tikiˈd ˈdaallé he ká nadhe.

²²Gálaat lulle ˈdaa giri Áˈdam yé gáá ˈdieká in kufach hí igira. Hát tikiˈdééllá ameeny gál lúl Kirísto hol ˈdú fafaanká kufeka, Waag geđi haí logolnoycho.

²³Uushim yiem gáá ˈdím aleđuđaatle hatallá: erkob Waag Kirísto uushich yé gáá ˈdeeyche, héétí af giri Kirísto hol ká nannaatká gál Kirísto hí léká Waag hí uushim yiem gáá ˈdeđicha.

²⁴Hé kinaal el ˈdaal, Kirísto kansimano ubaa gugúch, tá fargoginsam lulle hai ká aađadhdha, mu guchlé he aargiro kinaallá ˈJaallé Waag gíl geer hai gaa kakaa.

²⁵Hé kinaal metle, hát Waag hí muˈdeká mu hé kansím ˈguo, ˈdaab hé hí ka kídhká lulle Waag hí mú kansimle gim ma gaa iđîny-, muí met les ma ki ˈdíinká.[40]

²⁶Kufach he kídhích muí biiy el ˈdaˈd mán gaa hođuoká.

²⁷Warˈgat Waaˈgiet kieye, Waag hé he met lulle mú kansimle gim gaa iđiche,[41] he chie. Waag he met lulle mú kansimle gim gaa iđichééllá, he hé kieye, Waag úba mú kansimle gimmo he gaa iđa muuniny.

²⁸Tá af giri he met lulle Kirísto kansimle gim gaa ijoká, mu ííni Iny Waaˈgietallá dhúrle úba Waag gimmo hol gaa iđimia, giri Waag he lúl mé ki taalká.

²⁹Waag har onnônyka gálaat geđi ma logolnony-, hí uushim yiem ma gáá ˈdeđinyka, gál gál kufeká afleka gaalí bie gim nannúóllá háte he ˈdeeme? Tá Waag gál kufeká geđi ma logolnonyallá har ˈdúúw kátaka, af kinaalka háteka gáál gál kufeká ˈdaalle gaalí bie gim ki nannúol?[42]

³⁰Héétí háteka aadh lulle nyí hol kúfach mé ki kokoyyóol?

³¹Nyaaramchú, yú aadh lullé kufach ye kí higila. Hééllá he ˈdaa geer gaa meen it Máá kúnnaa Guđo Yiesu Kirísto iiy chieká yú hí gaa argééllá ˈdaallé yú ki ˈdodhdhe.

³²Yú onnônyka har máá kufeka, Waag geđi hí ma logolnonyká kátaka, af kinaalka laat yú ubaa gál bíne kach ˈguo-, ˈjien Efeso gaa ijóóllá nyí hol ki lađaanneká ˈduuw máre he ˈgayye? Har gál kufeká Waag hí geđi ma logolnonyka, af kinaalka ˈdéé hót giri kieye, Beríka in ke kufuma háluke, kí he kuo, kí he ˈjio,[43] chegetóóllá, ki el gaa veereka kalat máámaʼ?

³³Aaléka, ha gaalí bađisîny. Sheel ˈdeđewká húgúm midhabká hai ˈdeđeneyche.

³⁴Kas ˈdúwaká ˈgáa, hé ˈdeđew-, Waag hí ma fedinyká hayyíe. Yú hí geeye, hééllá gon he kern ˈgin, ˈdaa giri itín ˈbaal hí Waag muogká.

³⁵Mááká kálmaréél ˈdéé hótéél hai ká hegete, kieye, Gál kufeká hát máre Waag hí uushim yiem gáá ˈdeđicha? Gaal gón máre geđi Waag hí shigicha? hai yeedhe.

³⁶Kó đeech-, hatal chegetóol! Áár les fiiyyeka, ˈdaab af hí eiy ma ˈdíinyká, hé hirich hí yé ma ká ˈdeeminy.

³⁷Hé hí les fafiyyoká, ár siindi yíekaʼ, ˈguom éíy taaka árle yíekaʼ, hé kinaallá taalle arram, hé ˈguor wáásaka ka ˈdeˈdeenká muuniny.

³⁸Waag arram kinaal gón éíy taaka-, he ki feˈdoká hai shigicha. Arram met hí hol ka burnayallá, gónlé Waag hí shigichóóllá lúl hol ká eiyye.

³⁹Hé lesalloká lúl gónle hol ká eiyye, gálaat hé gónle ˈguo, bine hé gónle ˈguo, kimír hé gónle ˈgayyo, bee hé gónle ˈguo.

⁴⁰Hé urruká hé gónle ˈguo, hé lesietká úba hé gónle ˈguo. Gón urruká midhantle ubaa gón lesalloká midhantle hol ká eiyye.

⁴¹Aadh hé édhúmle ˈgayyo, ˈguiy hé édhúmle ˈguo, hidhino hé úba édhúmle ˈguo, tá hidhino edhum úba hí hol ká eiyye.

⁴²Gál kufeká Waag hí uushim yiem gáá ˈdeđichoká yaalmisanolle úba hát kinaallá. Gón gálaat gaalí ˈgoˈgodhóóllá he gón mooˈdoyyoká, tá gón gál Waag hí uushim yiem gáá ˈdeđichoká hí aargiroká he gón ma kufuminy-, ma mooˈdonyká.

⁴³Gón gaalí ˈgoˈgodhóóllá he gón kuyye-, ˈdúúw mánká, tá gón Waag hí uushim yiem gáá ˈdeđichoká he gón fargogiyyo-, ˈdúúw ˈgayyoká.

⁴⁴Gón gaalí ˈgoˈgodhóóllá he gón aađa-, lesalloká, tá gón Waag hí uushim yiem gáá ˈdeđichoká he gón urruká. Biiy har gón lesalloká ˈgayyoka, hé úba gón uratiká ˈgayyo.

⁴⁵Warˈgat Waaˈgiet kieye, Áˈdám erkoballá hé máá sidh ˈguoká yie,[44] he chie. Tá Yiesu Kirísto-, ke Áˈdám biiy el ˈdaˈdká yegetallá, he máá uriet-, Hím Naasanle gálaat luolmít shigichoká.

⁴⁶Muun erkob gón aađa-, lesietká ke aargira. El gaa igíˈdelle, ke gón urietká aargira.

⁴⁷Máá erkob-, Áˈdamlééllá, hé máá Waag hí eeˈd lesalloká tág gaa niiyyeká. Tá Máá ki naama-, Kirísto lééllá úrro he gáá yimie.

⁴⁸Gál lesalloká he hát máá Waag hí eeˈd tág gaa niiyye-, Áˈdamlééllá. Héétí gál urietká he hát Máá úr gáá yimie-, Kirísto lééllá.

⁴⁹Hát yaalmit máá Waag hí eeˈd tág gaa niiyyééllá yaalmitle káána ke ˈgúóllá, in aadh ˈdaatika, Máá úr gáá yimíéllá yaalmitle ke kaadhdha.

⁵⁰Nyaaramchú, hé yú hogodhoká hééllá: Gón kúnnaa ke ˈgúóllá hé Guch Waaˈgiet ma higiliny, héétí hé kufunan-, mooˈdowká hé ál luolmit biiyóótíá úba ma lileny.

⁵¹Bá dhaayyíe, hé geer geđiká yú hí geeye, múún lulkúnno hé ki ma kufuminy, tá lulkúnno hollo ko hol gaa soromo.

⁵²Hééllá he af giri faˈd biiy el ˈdaˈdká úr gáá sheennoká. Af giri faˈd kinaal sheennoká, gál kufeká Waag uushim yiem haí gáá ˈdeđicha, gaal hé geđ ma kufuminy, lulkúnno hát in hol ki ˈdony af hí tikiˈdekáka hollo ko hol gaa soromo.

⁵³Hát Waag hí muˈdeká, gón kúnnaa kufunanno-, mooˈdoyyóóllá, in hol gaa soroonno, gón ma kufuminy-, ma mooˈdonyká chegedhe. Múúni ke kufunanallá in ke hol gaa soromo, ke gál ma kufuminyká yegedhe.

⁵⁴Af giri gón kúnnaa kufunanno-, mooˈdoyyóóllá gón ma kufuminy-, ma mooˈdonyká cheget-, ke gál ma kufuminyká yegetká, af kinaallá hé Warˈgat Waaˈgiet hí hoteká hai ˈduuwaa, giri kieye, Kúfach oosle hé Waag hí el mé ˈgidhiche,[45] chieká.

⁵⁵Kúfach, ooskú aayye? Fargogint kua innum ˈdéént gálaat ˈdú iđimicheká aayye?[46]

⁵⁶Kufach fargogintlé gálaat innum ˈdéént ˈdú iđimicheká nyuogim ubaa ađaabano he yé gáá ˈdeˈdeme. Nyuogim ubaa ađaabano íín fargogintle hemuumuríti he yé gáá ˈdeˈdeme.[47]

⁵⁷Aalé Waag Máá kúnnaa Guđo Yiesu Kirísto ˈdaalleka muun gáál fargogint ke hééllá lulle kí aađaatká ka shigichóóllá, kí gielmít hol ˈdú naannuo!

⁵⁸Aaléka, nyaaram chia yú gielallo, taganokícho ˈdée, ha gaalí riitisîny. Aadh lulle Máá kúnnaa Guđoká hújíchle taalle hát ˈdabaanká naannáa. Hujichaam lullé hí Máá kúnnaa Guđoká ki nanniyyóóllá hát hé midhabká hí yé gáá ˈdeˈdeenká it óg.