Read daasanach Korínto Erká 3 Bible Online

Korínto Erká 3 - daasanach bible

Korínto Erká 3

¹Nyaaramchú, múún ke hol af ijeká yáá hí hát gál Hím Naasan Waaˈgiet atimle el gaa igiroká ma ka geđîny. Yú af kinaallá itín hát gál hé metle ki seseen-, nigini-, Kirísto ma ki hirânyká hí ká geđie.

²Yú af kinaallá eeno hí shigie, yáá hí ˈguom guogiyyoká ma shigîny, ˈdaa giri hí he onisiny farguogoká aleđuđugulle ma ka ˈdônyká. Káána úba ki gaa ijóólláka, it he onisiny farguogoká aleđuđugulle ma ka ˈdôny,

³ˈdaa giri itín hátle hí húgúm lesalloká ki iđaká. Hinááf ubaa hol ki fálaam hurtkícho gaa iđóóllá, hé kinaallá hát hí húgúm lesalloká ki iđa-, hí kas gálaat el gaa igiˈdaká ma ká yaalîny?

⁴Af giri itín mú tikiˈd kieye, Yú máá Baulo, máátí kieye, Yú máá Abollos, hí chegetoká, it gál lesalloká muuniny?

⁵Aaléka, Abóllos he mááya? Héétí Báulo he mááya? Nyíín taalle nyí gede Waaˈgiet, giri hí ˈdaakínyoka fayam Kiristo iiy ki chieká. Nyíín hullaakínyo hújích Máá Guđoká hí nyí met eiy ki kuokoyká nyí nanniyya.

⁶Máá áár fieká he yú, áár máá hí bie fafieká he Abóllos, tá áár máá hí ˈdisieká he Waag.

⁷Máá áár fafuoká ubaa máá áár bie fafuoká hé áár ma ˈdiˈdisiny. Áár Waago hí ˈdiˈdisicha.

⁸Máá áár fafúóllá ubaa máá áár bie fafúóllá áwúlle tikiˈde, gaal hullaalle hújíchlé he nannuoká hélle hai aargira.

⁹Nyiin hullaakínyo hújích Waaˈgieto nyí hol ˈgar nanniyya, itín íín he lés Waaˈgiet ke hí fieká. Héétí itín hí ˈbíl Waag hí ˈdiˈditoká.

¹⁰ˈDúˈjím Waag hí ye shiicheká in yú hujich ki nie. Hát máá gil óg-, é ˈdiˈdisokáka, yáá ál ˈdúwa-, gaalí ˈbíl ˈdiˈdisoká gáál argisie, gál kinaal hé ál kinaallá ˈbíl gaa ˈdiˈdiso. Tá gálaat hí hol ˈdeeˈdeen, hí ˈbíl hát ˈdabaanká ˈdiiˈdisso.

¹¹Hé ál éíy taaka-, gaalí ˈbílallá gaa ˈdidissoká mán. Ál yú gáál argisie-, ˈbíl guogoychóóllá, he Yiesu Kirísto.

¹²Gáál ˈbáál ˈbíl ál yú gáál argisíéllá gaa yaalallá hé hát káána hórkí, ubaa sibilaam ííkarská, tá waar ˈdabaanká ki ˈdiˈdiso. Tá gáál ˈbáál hé ˈbílallá hé biiy ma chochony-, hát káána ˈguoro, iish, tá sirteká ki ˈdiˈdiso.

¹³Kúlích ˈdéé ki iđinyká ali kí ˈdiiyyeka, gálaat lulle hujichaamlé nieká ˈduuwle hai ká eedhee. Hééllá hé hí ká eedhesuoká he ˈjiet hujichaam kinaallá ˈjeˈjeen-, gálaat hujichaamle ˈduuwle eiy nanniyyoká.

¹⁴Máá ˈbílallá hújíchlé nieká, hújíchlé kinaal har ˈjiet hí ma kony-, ká ˈgiteka, máá kinaallá hé shiicho-, hujich kinaalloká hai aargira.

¹⁵Tá máá hújíchle ˈjiet hí af ki shuunatká, hé shiicho-, hujich kinaalloká hai ˈdaaba. Mu íín nyíf onnônyka ˈjiet haí koonye, tá mu ˈjiet met kar hai gaa ˈdarama, rubach hai aargira.

¹⁶Itín hí hát ˈbíl Waaˈgiet-, Waag Hím Naasanle hí gaa iđoká it múog?

¹⁷Aaléka, máádhat har ˈbíl Waaˈgiet ˈdeđeneyoka, máá kinaallá Waag haí ˈdeđeneyche. Hé kinaallá he ˈdaa giri ˈbíl Waaˈgiet he ˈbíl saas mantiká. Tá ˈbíl Waaˈgiet he itíni.

¹⁸Máádhat hai hol nyiimísan. Itín mú tikiˈd hol máá ˈdaalléká ká dhaayka, máá kinaallá innum gál lesallokáka hí máá đeechká yeet, giri mu ˈdaalim Waaˈgiet ˈdaa ki liiletká.

¹⁹ˈDaalim lesalloká innum Waaˈgietka hé đeeymo. Hé kinaallá he hát Warˈgat Waaˈgiet hí hote-, kieye, Waag hé gál ˈdaalle léká điđamle ˈdú ˈgiiliˈgayyo,[6] chieká.

²⁰Warˈgat Waaˈgiet geđi kieye, Máá Guđo Waag hé gál ˈdaallellé-, lesalloká kasle óg, kas kinaallá Waagka hé nyag mán,[7] he chie.

²¹Aaléka, máádhat hai gálaat hol bal ki ˈdaráminy. He met lulle hékícho.

²²Hát káána Báulo yíekaʼ, Abóllos yíekaʼ, Kéfas yíekaʼ,[8] lésallá yíekaʼ, luolmít yíekaʼ, kúfach yíekaʼ, báral yíekaʼ, bár ˈdaatika yíekaʼ, hééllá lulle hékícho.

²³Itín íín Kirísto hí le, Kirísto íín Waago hí le.