Read daasanach Korínto Erká 6 Bible Online

Korínto Erká 6 - daasanach bible

Korínto Erká 6

¹Itín hí hé mákártaká hol ˈdú iidhansichoka, háteka ˈdéé hí gál Kiristo ma ˈdú egeen-, ˈdéé hí gál Kirísto iiy ma yéenká ˈdú egeetóol?

²Gál Kiristo bár ˈdaatika hát les gálle ˈdéé ki iđimuoká it múog? Itín in hí les gálle ˈdéé ki iđimicha háluke, tá háteeye hí ˈduuw ˈdeem hatallo-, hawul maamanal eiy ki nanniyyoká man?

³Muun bár ˈdaatika hát ke gál ˈgasso-, urruká ke ˈdeemle ˈgas egewká it múog? Tá muun in hé kinaal ke ekemeyoká ke ura háluke, háteeye hé lesalloká ke ˈdeemle ˈgas egewká ma uriny?

⁴Har ˈdeeny lesallo-, gálle hol af ma maalinyká hí ˈgayyaka, háteka hí ˈdeem kinaal gál arra-, gál Kiristo hí ma kimísanká ˈdú egeetéel?

⁵Yú hééllá hodhééllá itín gon it hawul hí eete. Itín úba it máá tikiˈde-, ˈdaallé-, hurtkícho gaa ijo-, gállé nyaaram-, hol ˈdeem af ma ki mamalinyká ˈdéé eiy ki nannuoká mân?

⁶Bá dhaayyíe! It nyaaramallá it gál Kirísto iiy ma yéenká hol ˈdú eegeete, gál kinaal hí ˈdeem ki iiđimie.

⁷Yaalmit hí ar hol ˈdú egeetééllá, it gon hát Kirísto hí ki fedoká ma ká iđiny. Hé kinaal afle, gál hí he ki ˈdeđeneyoká it ma haađîny? Gál hí hát điđamoká gaa buruanká it ma haađîny?

⁸Kor it hol nyaaramallá dhúr kíchia hí he hol ki ˈdeđeneyche, hí hol hát điđamoká gaa buruanna.

⁹Tá gál hé ˈdúwaká ma gaa seseminyká hát Guch Waaˈgiet ma higilinyká it múog? Aaléka, ha máádhat hí nyimísan, gál herginy buraaká gaa seseenká, gál waagam hódhoká vivisatká, gál hol ˈdú hergisanká, héétí herginy gál hol ki yaabká hí hol hergisanká gálle hé Guch Waaˈgiet ma higiliny.

¹⁰Héétí gál buraalléká, gál he lulle hol ki feefedoká, gál bersham hí fafaanká, ubaa gál gálaat meet ˈdeđeneyoká, tá gál gálaat he fargogínt af ki ririatká, gál hatallóóllá úba hé Guch Waaˈgiet ma higiliny.

¹¹Itín ˈbaal it hé kinaallá gaa iđe. Tá káána it Máá kúnnaa Guđo Yiesu Kirísto ubaa Hím Naasan Waaˈgiet hí ađaabano kinaal gaa dhiire, hí gál saas mán-, Waag innumleka ˈdúwaká hoy.

¹²Yáá mé furit he lulle ki ekemeyoká ˈguo. Hé ˈduwa, kor he lulle íín hé ye ma ki midhanany. Yáá mé furit he lulle ki ekemeyoká ˈguo, kor yáá hé níínní gédéchle yegetká mán.[12]

¹³ˈGuom he hé geere, tá geer hélle he ˈguom. Hé ˈdúwa, tá geer ubaa ˈguom hullaalle Waag mé haí ˈgiidhicha. Tá gónkúnno íín, hélle hé herginy ađááb ˈgayyoká muuniny. Gónkúnno Máá kúnnaa Guđoká hí le. Máá kúnnaa Guđoká ííni gónkúnno ki yaalla.

¹⁴Waag Máá kúnnaa Guđoká geđi loolnoyche-, uushich yé gáá ˈdeeychééllá, in fargogintle úba muun gáál uushim yiem kí ˈdeđicha.

¹⁵Itín gónkícho hát gón Kiristo ˈbáálká it múog? Aalé máádhat gónlé gón Kiristo ˈbáálallá geđi gón sharmuutallá hol higilsuoka, hé kín taglê? Hóbá! Hé kinaal Waag hí điito!

¹⁶Máá gónle gón sharmuut hol higilsuoká hát íín ubaa sharmuut kinaal tikiˈd yeetká it múog? Hát Warˈgat Waaˈgiet hí hote-, kieye, Gaal hullaalle tikiˈd hai yeedhe,[13] chieká.

¹⁷Tá máá Máá kúnnaa Guđo Kirísto hol ˈdú faanká, ubaa Kirísto tikiˈd hai yeedhe.

¹⁸Herginy ađááb ˈgayyoká met kar gaa ˈdaaramíe. Ađaabano éíy taaka máádhat hí ekemeyoká hé mú gónle ađááb mé ma ki kokony, tá máá herginy ađááb ˈgayyoká hiloká, máá kinaallá gónlé he ađááb mé ki koy.

¹⁹Tá gónkícho hát Hím Naasan Waaˈgiet Waag hí shiiche-, hí gaa iđóóllá ˈbílléká it múog? Itín it hol ma lileny, Waago hí le,

²⁰ˈdaa giri Waag hí hím guđoká les gaa fiiyyeká. Aaléka, gónkícho Waag ki ˈduwayyíe.