Read daasanach Korínto Erká 8 Bible Online

Korínto Erká 8 - daasanach bible

Korínto Erká 8

¹Aalé, yú aany gaalí waagam hódhoká suoryam ki hođuoká sogimle kóonyle yaalmitlé hí ye ka heeseteká yú hí hol ˈdú gáá naa. Muun lulkúnno hát ke hééllá ˈdaalimle ˈguoká hé ki óg. ˈDaalim máádhat hí ˈguoká íín hol meenyo mú yé ˈdú ˈdeđicha, tá gielmít íín máádhato he ˈdiˈdita.

²Máá hol bal ˈdaraan-, kerka ˈdaalím ˈguoká, máá kinaallá hátle hé ˈdaalím mán.

³Tá máá Waag gielká, hé Waag hí óg.

⁴Aaléka, aany gaalí waagam hódhoká suoryam ki ˈgaˈgaloká sogimle kóonyle hátle yú hí ká geeye. Muun waagam hódho-, gál lesalloká hí vivisatká hát hé káta mánká hé ki óg. Biiy hé waagam éíy taaka hí gaa ijoká mán, Waag biiy gaa iđoká he tikiˈd tákáma.

⁵Hé ˈduwa, hé gálaat hí waagam yegetká hé úr ubaa les gaa ijo. Gálaat hé héllé burnay-, waagamle ubaa gállé guguđoká hoteká ˈguo, vivisat.

⁶Tá Waag íín hát tikiˈdeká hé ke óg. Waag kúnnaallá he ˈJaa kúnnaa he met lulle ka kuone-, muun ke ki ijoká. Héétí, Máá kúnnaa Guđoká íín hát tikiˈdeká hé úba ke óg. Máá kúnnaa Guđóóllá he Yiesu Kirísto giri he met lulle ˈdaalle Waag hí kí kuonne-, ˈdaalle múún ke ki ijoká.

⁷Tá ˈdéé hót ˈdúwáállá hé gálaat lulle hí muog. Gáál ˈdáá tikiˈd ˈdaa giri hé gaalí waagam yegetallá in eiy kí ˈdeeyká, káána úba aany gaalí waagam kinaal suoryam ki hoyká sogimle koeyka, in gaal hátle sogim kinaal sogim waagam kinaal hí léká ká dhaˈgama. ˈDaa giri gáál kas hí ma hirânyká, in gaal sogim kinaal koeyka, kerka sogim kinaal hí ađááb mé ki kokoo.

⁸Tá hé ki kokuoká íín hé hé muun ubaa Waag gáál hol higilsuoká muuniny. Ki he ma kokonyka, hé kinaallá hé gáál ˈdaˈdabsuoká mán. Har ke he kokuoka, hé kinaallá hé ál gáál yé ˈdú ˈdeđuoká mán.

⁹Aaléka, hol ˈdeeˈdemíe, mé furit kíchia itle hí he met lulle kokonyoká uˈdáállá hai gál kas hí ma hirânyallá ađaabano hilít mé ki kôny.

¹⁰Kálmaréél máá yaalmit hatallo-, kas hí ma hirânyká kó ˈdaalím ˈgayyóóllá ény gaalí waagam hódhoká gaa vivisatká he gaa kokonyo-, muí ko gaa argeka, kó mú waagam hódho-, hatallóóllá suoryamle kóonyle mé ma ki kôny?

¹¹Yaalmitééllá in nyár kua kas hí ma hirâny-, Kirísto hí ˈdú kufeká, ˈdaalim kua kinaal hí baađisicha.

¹²Tá itín hí nyaaram kíchia Kiristo-, kas hí ma hirânyallá he ki ˈdeeneyche-, hé gaal íínka ˈdeewká ekenyle hí gáál mé ki koyye-, gáál ger hí gaa ˈdeenedheka, af kinaalka Kirísto tuuˈdlé hí he ki ˈdeeneyche.

¹³Aaléka, so chia yú kokuoká har nyárchú ađááb mé ki kokuoka, yáá af kinaalka geđi so ma kokony. Yáá hé nyaaramchú ađaabano higilsuoká ma ekemeny.