Read daasanach Korínto Erká 9 Bible Online

Korínto Erká 9 - daasanach bible

Korínto Erká 9

¹Yú yáá máá mé furít ˈguoká muuniny? Yú yáá máá ali gaa kaany-, Kiristoká muuniny? Yú íín yáá Máá kúnnaa Guđo Yíésu ma árginy? Hújích yú nannúóllá hé itín hí Máá kúnnaa Guđoká hol ma hilsîny?

²Har káána gáál ˈbáál ye máá ali gaa kaanyká ma ká dhaˈgaminyka, itín gon it ye máá ali gaa kaanyká ká dhaˈgasanna. ˈDaa giri itín hí Máá kúnnaa Guđoká iiy chie-, hí mú gálle chíéllá, hé kinaallá he kieye, yú he mú máállé ali gaa kaanyká.

³Gál ye ki nannaatká, ˈdéé hótlé yú geđuoká hééllá:

⁴Nyííni nyí gál alb fimííllá nyáá nyí ˈduuw gálle hé geere kokuoká ubaa hé imi igianká mân?

⁵Nyiin hát tikiˈde gál éíy taaka alb fimiká ubaa Máá kúnnaa Guđoká nyaaramle ˈdegle hol ˈgúóllá, héétí Kéfas[16] úba minle hol ˈgar seseenallá, nyiin nyáá nyí ˈduuw gálle ˈdeg Kirísto iiy chieká hol ˈgar seseenká mân?

⁶Ebá, he yú ubaa Barnábas tákám kínyaa nyí ˈdúúw man,[17] nyí hújích gilietká nanniyya, nyí hé geere gaa aargiˈda?

⁷Máá yúóyó máre mangis hujich ki nannuoká mangis hí bíre les ma ki fafiny? Máá vínna fafuo máre vínnallé fieká hiteka saanolle ma kokony? Héétí máá aany ˈdeˈdeen máre aanylé ˈdeˈdeen kinaal eenle ma igiminy?

⁸Yú ˈdaalim gálaato ˈdéé ki hogodho? Hemurit Waaˈgiet hé úba hééllá ma hôn?

⁹Hemuumurit Waag hí Móshe ka shiicheká tikiˈd kieye, Ány yíérká he ˈguom ˈdug gaa seseen-, ˈguom ubaa metle hol eiy yé gaa ˈdeđuoka, haí af gaa hîn, hí he kóony ka rían,[18] he chie. Waag hatal chíél, in ány yíérallo tawunyle ˈgayyê?

¹⁰Ebá he ˈdaa kúnnaa Waag hí kí hote? Hééllá gon ˈdaa kúnnaa Waag hí kí hote. Máá les hogoboká ubaa máá ˈguom tutunoká hújíchlé he nannuo kinaal héllé gaa aargiroká he met egesse.

¹¹Nyíín nyáá nyí fayam Kiristo ke hí ˈdu gáá sidhééllá hújíchle niiyye. Aaléka, hé geere ke hí gaa aargiroka ta héfo ke hí gaa iđie?

¹²Tá har gál éíy hí ki ˈdiyeenká hí he gaa aargiroka, nyiin nyáá nyí gál kinaallá ˈdúúw ma ˈdú ˈgâny, giri hí nyí he ká shigichaká? Tá itín hújích ke hí ki níéllá símísle hé ke hí ma héésen. Hé kinaallá afleka, nyiin ílsh lullé nyí mé ki chichirsata, giri Fayam Midhab Kiristóóllá nyí gálaat ma ká ririanká.

¹³Gál ˈBíl Waaˈgiet hújíchle nannuoká héllé geereká hé shiicho-, gaalí ˈbíl kinaal ka sidheká gaa aargiroká it múog? Héétí kúb suoryoká gál hí hújíchle nannuoká suoryam kinaal ˈbaal hát gáál ˈguomléká it múog?[19]

¹⁴Hát tikiˈde kinaallá in Máá kúnnaa Guđoká ˈdéé mure, giri gál Fayam Midhaballá ˈdiyeenká hé kokuoká hújích kinaal gaa aargiroká.

¹⁵Tá har káána úba yú ˈduuw gálle gálaat he gaa aargiroká ˈguoka, yáá hé hatallóólla kálta gálaat ma héésen. Yáá úba hí hééllá ma ˈdú gáá vereniny, giri yú hí he gaa aargiroká. Hol meenyééllá har gaalí ye ká ririatka, yú kufeka kalat.

¹⁶Fayam Midhaballá ˈdiiyiminyle hé hé yú hol gaa ˈduuwayoká muuniny. ˈDiiyiminyééllá Waago hí ye mé ki koyye. Har yú Fayam Midhaballá ma ˈdiyiminyka, he bá ye ki ˈdéen!

¹⁷Fayam Midhaballá ˈdiiyiminyle har yú hol kí muˈdeka, af kinaalka yú he gaa argeka kalat. Tá yáá hújíchallá hol ma kí múran, hújíchallá Waago hí ye kí murate, in yú nannaa.

¹⁸Aaléka, hújích yú nannúóllá símísle kor meete yú gaa aargira? Hé yú aargiroká he gielmit yáálle Fayam Midhaballá gálaat ki ˈdiyeen-, gálaat he gúsach ma gaa ˈgeˈgenká.

¹⁹Har káána yú máádhat gédéchle muuninyka, yáá káána gálaat lulle gédéchle hol hoy, giri hát lulle lađaan-, gál burnayká Kirísto ˈdu gáá egewká.

²⁰Af giri yú gál Yuuˈdi hurt gaa ijoká, yú hát máá Yuuˈdi ká ija, giri yú gál Yuuˈdi kinaal Kirísto ˈdú gáá egewká. Har úba káána yú hemuumurit Waag hí Móshe ka shiicheká gim ma gaa iđinyka, yú hát gál hemuumurit kinaal gim gaa ijoká ká ija, giri gáál Kirísto ˈdú gáá egewká.

²¹Hát tikiˈdééllá af giri yú gál gál Yuuˈdi muuniny-, hemuumurit Waag hí Móshe ka shiicheká mánnallá hurt gaa ijoká, yú hát máá hemuumurit kinaal mánká ká ija, giri gál kinaal yú Kirísto ˈdú gáá egewká. Tá yú hééllá ekemeyóóllá hé kieye, yáá hemuumurit Waaˈgiet mán ma yegen. Yáá hemurit Kiristo gim gaa ijo.

²²Héétí, af giri yú gál ma hirânyká hurt gaa ijoká, yú gál ma hirâny kinaallá hé hí ki midhabká ki ekemeye, giri gáál Kirísto ˈdú gáá egewká. Yú hát lullé ki ija, ubaa ˈdeˈdeme, giri gaal rubach aargiroká.

²³He lulle ˈdaa Fayam Midhab Kiristóóllá yú ki ekemeye, giri yú fayamééllá ˈdúˈjímle gaa yíéđianká.

²⁴Af giri gálaat hol ˈdam ki ekemesetká, gál burnayká hát hol ki kirmisat-, tá mú tikiˈd tákámle gáál lulle in ká ˈdeen-, gaalí hé shiicho shiguoká it múog? Aaléka, hát ˈdabaanká kiritíe, giri hí hé shiicho aargiˈdoká.

²⁵Ameeny gál đúla kirmisatká, hát lullé he lađama, hol fargoogonoyo, giri hé shiicho aargiroká. Hé shiicho gaalí aargiróóllá el met haí ˈgiidha. Tá múún iđiny kúnnaallá hát lullé ke gaa lađama, giri hé shiicho biiyo-, el met hí ma ˈgiˈginallá ke aargiroká.

²⁶Yú đuláállá gaa igiróóllá, ál nyonyoronká hát ˈdabaanká ˈdú kirmita. Laat yú lađaanallá yáá gil ma gaa reresiny.

²⁷Yú gón chia he mé ki tataa, ye met gaa kekeenne, giri yáá gálaat ki ˈdiyeennallá hé shiicho Waaˈgiet ma gaa ˈdaabinyká.