Read daasanach Korínto ki Naamaká 1 Bible Online

Korínto ki Naamaká 1 - daasanach bible

Korínto ki Naamaká 1

¹Yú he Báulo, máá Waag hát hí ki feˈdeká hí máá ali gaa kaany-, Yiesu Kiristoká hoycheká. Warˈgatééllá yú ubaa nyár kúnnaa Tímote it Kirísto iiy chie-, hí ˈjien Korinto gaa iđáállá ubaa gál Kiristo lulle lés Akaya gaa ijoká lul kíchia ke hí ˈdu gáá veere.

²ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

³Máá kúnnaa Guđo Yiesu Kirísto ˈJaallé Waag kí meemeyo. Waag he ˈJaa kúnnaa geer ka guurá ˈguo-, gáál hát lulle gogofsuoká.

⁴Mu manyjany nyiin il hí nyí argiyyééllá lulle ˈdaalleka in mu nyí gogofsia, giri gál mákárta-, manyjany il hí argiyyeká ˈdaalleka nyiin úba nyí gál kinaal gogofsichoká. Góf muí nyí gogofsúóllá in nyiin úba nyí gál manyjany il hí argiyyééllá nyí ki gogofsicha.

⁵Hát káána Kirísto ˈdaalleka he il súm hí gáál aargiˈdóóllá, Waag íín súmo ˈdaa Kiristoka nyí gogofsicha.

⁶Nyíín har gálaat nyí maanyjasieka, hé kinaallá góf kíchia ubaa rúbách kíchia he yé ˈdú ˈdeˈdeme. Tá Waag nyí gogofsichóóllá, nyíín ha ke hí gogofsia, giri hé il hí nyí argiyyééllá úba itín il hí argiyyeka, hí mé ki chichirsataká.

⁷Hééllá ˈdaakíchoka ˈduuwle nyáá nyí óg, manyjasiny hát káána nyiin il hí nyí aargiˈdóóllá itín úba hí aargiˈdóóllá, góf Waag hí nyí shigichóóllá Waag úba haí shigicha.

⁸Nyaaramkínyo, manyjasiny lés Asia il hí nyí gaa argiyyeká hí muogká nyáá nyí ma fediny. Hé il hí nyí argiyye kinaallá hé tág af kinaallá nyí ˈdú ilshandhe, rúbáchkínyo úba nyí yé gaa ˈdiiyye.

⁹Nyíín af kinaallá gál kufunanká nyí hol ká dhaayche. Yaalmit kinaal ˈdugaka in nyí laat kínyaa nyí tákámkínyo lađaanneká nyí hayche, nyí Waag gálaat uushim yiem gáá ˈdeđichóóllá bala ˈdú niiyye.

¹⁰Waag hé tág kúfách nyí ki ˈgierˈgerneyká nyí gaa riiyye, tá Waag geđi ha nyí rianna. Nyíín nyáá nyí mú iiy chie, nyí mú sidhamkínyo gíl geer fiiyye, tá mu taalle ha nyí ririma.

¹¹Itín ˈdaa giri hí nyí Waag kí vivisatóóllá Waag af haí maalla, Waag ha nyí ˈdú ˈjeenne, tá hé kinaal ˈdaalleka gál burnayká Waag gielmít hollo hol ˈdú nannaa.

¹²Nyiin hé midhab-, nyí ekemeyche-, nyí ki ˈgađasannoká nyáá nyí ˈgayya. Hé kinaallá he húgúm ˈdúwa-, leđuđugulle-, Waaˈgiet nyí lésallá ki iđa-, ke hí hurt ki ijóóllá. Nyiin nyáá nyí ˈdaalim gálaat lesalloká el ma gaa igiriny, nyíín geer guura Waaˈgieto nyí ki iđa, nyí af tatiyya.

¹³Hé ki hí ˈdu gáá veerééllá he hé hí totoycho-, hí eiy nannasatoká tákáma. It héél ˈbaal hol eiy gaa naasate, tá héél hát ˈdabaanká hí hol eiy gaa nannasatoká yú fede, giri Máá kúnnaa Guđo Yíésu kúlíchlé ˈdeem hol eiy gaa nannuoká ali kí ˈdiiyyeka, hát tikiˈde ˈduuwkínyo he itínííllá, itín úba ˈduuwkícho he nyííni.

¹⁵ˈDaa giri yú hí ˈduuw heelloká ka ˈguoká, yáá erkob hí af kí ˈdeˈdemeká fede, giri yú hí onnônyka a naam gáá nannaat-, hí ye ˈdúˈjím a naam gaa aargiˈdaká.

¹⁶Sieny chia yú Makeˈdónia ka yiimíéllá, yú hí gáá nanadhe-, tá ˈdaal hol gáá nannaatká úba hí af kí ˈdeˈdemeká onnônyka fede, giri hí ye ˈgas gaa kokoyye-, sieny chia Yuuˈdiaká mé vereneká.

¹⁷Itínka, yú hállééllo sienychú hol gaa lay? Yú hát he gál lesallo-, héllé huogodhoká el ˈgiˈgisat-, hé iiy-hí yeetká geđi híʼi yegetkâ?

¹⁸Hát káána Waag ˈdeenylé hogotoká ˈduwasichóóllá, ˈdéé hót kínyaa ke hí geey-, Iiy-hí, ke hí yieká, nyáá nyí hállééllá hol ma gaa lâny.

¹⁹Iny Waaˈgiet-, Yiesu Kirísto-, yú ubaa Silfáánas, tá Tímote ke hí hurtkícho gaa ˈdiyimééllá mu hé iiy-hí ma yegen, kor wáásaka, héllé kinaal el mé ma ˈgiisan, híʼi, ma yegen. Mu héllé hogodhoká hé ˈdúwaká tákáma.

²⁰He lullé Waag hí muun gáál af iđichééllá hé Kirísto hí ˈduwasie, in ke mú af ˈdúúw hođita, ki iiy-hí yegedhe. Héétí úba ˈdaa Kiristoka, muun, Iiy-hí, he hí hát kinaallá yeet, ke yegedhe, giri Waag hééllá ˈdúúw gaa egeetoká.

²¹He Waago nyiin ubaa itín gáál waarate, gáál gál Kirísto hát ˈdabaanká ki ˈgieká hođicha.

²²Waag íínííllá hé muun gáál gúíyle guyye, Hím Naasanle gáál gaa iđiche, giri he lullé gáál af iđichééllá hát ˈduuwawká ke ógká.

²³Hé yú hogodhóóllá hát ˈdúwaká hé Waag hí óg, yú Korínto ma ka yímenallá he ˈdaa giri yú geđi hí ma ki lolodhminy-, ger hí ma gaa ˈdeđenenká.

²⁴Iiy yeen kíchia hí Kirísto ka ˈgayyáállá ki iđinyle ˈdugaka he he ke hí ki mumura muuniny. Nyiin yiiró ke hí gaa chichiˈda, giri ger hí gaa memeetká. It aalé káánaka iiy yeenkícho tagano ki ˈgiiyya.