Read daasanach Korínto ki Naamaká 10 Bible Online

Korínto ki Naamaká 10 - daasanach bible

Korínto ki Naamaká 10

¹Itín ˈbaal hí tawuyyeká, yáá Báulo lééllá, af giri ke hol af ijoká in síer, af giri ke hol in eiy ka láká tákáma nyáálle? Yú hát káána Kirísto abunaʼ-, nog seseenallá, yaalmit hat kinaallóóllá in yú ˈgaa, yú hí gil ki egefe.

²Ha yú hí ruogone, yú ka yimieka, yú ha hát máá gálaat he ki mumurokáka hí ˈdeem ma ki ˈdaraminyká. Tá gál kieye, itín húgúm lesalloká hí ki iđa, nyí yegetká, gál kinaallá ha yú ki loodhmo.

³Har úba káána nyí les gaa iđoka, oos kínyia nyí hol chegesallá hé oos lesalloká muuniny.

⁴ˈGulo ooso-, nyí ˈgayyáállá hé ˈgulo ooso-, lesalloká muuniny. ˈGulo ooso-, nyí ˈgayyáállá he fargogint Waag yé gáá ˈdiiyye-, nyí Sátan điđamle ubaa kas lesallóóllá kí aađaatká.

⁵Héétí he lullé hol yé ká ˈdeđuo-, gálaat Waag kimisan ká ririatká nyí kí aađaat-, nyí kás lulle kí ˈgiiliˈgayya-, kas kinaal nyí hol gaa lalaanna-, kas Kirísto enniannoká chegedhoká.

⁶Itín hí gál Waag af ˈduuwasuoká chieka, nyáá nyí tagano ˈgiiyya, giri gál mákárta kíchia-, Waag af đuˈdusanká nyí ki lolodhonká.

⁷Itín gálaat ˈdugo hí gáá dhaˈgasanna. Hurt kíchiallá gál hol gál Kiristo ka dhaˈgasanallá hí geđi tawuo, hí hééllá met ká ˈguo, hát gaal íín he gál Kiristóóllá nyiin úba nyí gál Kiristo.

⁸Mé ki yaaliny kíchia Máá kúnnaa Guđóóllá hí nyí mé ki koyallá, har káána úba yú súm ki ˈgađáminyka, kern hé ye ma ˈgiˈgin. Mé ki yaalinyééllá he hé ke hí eiy ki fufumuoká muuniny, he hé ke hí ki ˈdiˈdisoká.

⁹Yáá warˈgasam hí ˈdú gáá verenóóllá hí ma ki biirgisiny.

¹⁰ˈDaachúka gáál ˈbáál kieye, Mú warˈgasamlééllá ˈdeem kullaʼ-, farguogoká hí gaa ija, tá af giri mú ke hol af ijoká mú ˈdéé hót hí đalidhe, kor úba hí ˈdúúw mán, gaalí yegedhe.

¹¹Gál kinaallá hí onnow, hát ke hí gaa fág-, ke hí warˈgasano ˈdú gáá veerééllá, nyí ál kinaallá kí faanneka, gáál úba hát kinaallá nyí ki seenne.

¹²Nyáá nyí gál hol gál ˈdúwaká ka dhaˈgasanallá hol ma ki ekemeny. Gál hatallóóllá ˈdaa giri dhúrle hol ki ekemeset-, mááya máátí ˈdú ˈdúwa yegetallá, in hé níínní eiy nannasatká man.

¹³Albano Waag hí nyí met ma ki kônyká nyáá nyí hol bal ma ki ˈdaraminy, he albano Waag hí nyí met ki koyyeká tákáma nyí hol bal ki ˈdaraanna. Albano kinaallá ˈbaal hí itíni.

¹⁴Af giri ke hí af tatuoká, alb Waag hí nyí mé ki koyyeká nyáá nyí af yíé ma ˈdeđiny. Nyiin he gál erkob-, hí Fayam Midhab Kiristóóllá ˈdú gáá sidheká muuniny?

¹⁵Nyáá nyí hújích gál eiy hí nieká hol bal ma ki ˈdaraminy. Hé nyí feˈdoká, he giri iiy yeenkícho higirayyo-, hújích kínyaa ki hí hurt kíchiallá gaa nannúóllá biiy bash ki yeget-,

¹⁶lesano éíy taaka-, léskícho ˈdaatí iđoká úba nyí Fayam Midhaballá gaa ˈdiyeenneká. Hé nyí ma fedinyká he hújích gál eiy hí nieká nyí hol bal ma ki ˈdaraminyká.

¹⁷Warˈgat Waaˈgiet kieye, Máádhat har héllé he ekeyká hol bal ki ˈdaraanka, hé kinaal afleka, kalat hí hé Máá Guđo Waag hí ekeyká meeyo,[14] he chie.

¹⁸Máá innum Waaˈgietka ˈdúwaká hé máá íín ˈduuwle ma hogon-, Waag hí ˈduuwle hogotoká.