Read daasanach Korínto ki Naamaká 11 Bible Online

Korínto ki Naamaká 11 - daasanach bible

Korínto ki Naamaká 11

¹ˈDéé hót chia hát ˈdéé hót đeemóóllá onnônyka á níínni mare hollo hí hol gaa tatiyya. Tá hé ˈduwa, it ˈdéé hótééllá hátle hol gaa tatiyya.

²Yú hinaaf Waag hí ˈdaakícho ka ˈgayyoká úba ˈgaa. Itín hát ini ˈdúwa-, yú máádhat đarm kí sidheká. Máá yú hí đarm kí sidhe kinaallá he Kirísto.

³Hé yú kikiatká, he hát káána héle char hí Háwa điđám ki ˈdie-, mú nyimiteká in itín úba kas kíchia ˈdaa Kiristoka ˈdúwa-, taglééllá gál hođomlééllá hí baađisuoká yú ma fediny.

⁴Hééllá he ˈdaa giri máádhat hí ˈdu gáá yimieka, hé mákárta-, muí ki ˈdiyeenká hí hállééllá iiy chegetoká. Har káána úba Yíésu mákárta-, Yíésu nyí ˈdiyeenallá gaa taakaká gaalí ki ˈdiiyime yíekaʼ, hím naasan Hím Naasan Waaˈgiet hí argiyyééllá gaa taakaká gaalí ki ˈdiiyime yíekaʼ, héétí fayam Fayam Midhab hí iiy chíéllá gaa taakaká úba gaalí ki ˈdiiyime yíekaʼ, hééllá lulle hállééllá hí nee kokoyyo, it ˈduuwle ˈgas ma egeny.

⁵Gál hol gál ˈdúwa-, alb fimiká hol ka hoyallá, tawunychúka, hé ye ma ˈdú ˈduwanany.

⁶Har úba káána yú gáál ˈbáál innumleka ˈdiiyiminy súm móíytaka, yáá ˈdaalím ˈguo. Nyáá nyí hát lulle ke hí hééllá ká argisie.

⁷Af giri yú hí Fayam Midhab-, Waaˈgietallá ki ˈdiyimeká, yáá hé hí ye ka shigicheká hí ma ki mumúriny. Hol ˈdúúw rím chiallá itíni yú ˈduway. Héél ta ha yú ˈdeeney?

⁸Yú af kinaallá gál Kiristo albano hí taakaká héllé shiicho ye ká shigieká in yú kokoy, yú hí hujich hállééllá kí nannie.

⁹Af giri ke hol af ijeká, har úba he ye ki ˈgeerˈgerneyka, yáá máá níínní ílsh ˈdú iđimie-, hé shiicho gaa ˈgeˈgedheká mán. Nyaaram kúnnaa Makeˈdoniaká af giri ka yimieká, hé ye ki ˈgeerˈgerneyká ye ˈdú chiˈde. Yáá af kinaallá hí hát lulle ílsh ma ki yégen, tá yú taalle ha lađama, giri hí ílsh ma ki yegenká.

¹⁰Yú ˈduuw Kiristo ye gaa iđóóllá hí ki geđia, hé máá níínní lés Akaya kinaallá gaa ijo-, ˈgat chiallá ali kokuoká mán.

¹¹Hééllá in kieye, yáá hí ma geelnenyo, yú yegedhe? Hát yú hí gielká hé úba Waag hí óg!

¹²Yú kín ˈgíérích chia gaa igireká ha gaa igira, giri gál kar ˈgeˈgedho-, kieye, gáál hújíchle hát hújích kínyaallá, yegetká fedoká, kár kinaallá ha nyí ká riata.

¹³Gál hatallóóllá he gál alb fimi-, hođomlé-, hujichaam điđám ki nannuo-, hol gál alb fimi-, Kiristoká ka hođuoká.

¹⁴Hééllá hé yaalmit gáál af ˈdaˈdabsichoká muuniny, ˈdaa giri Sátan íín úba hol máá ˈgasso-, Waaˈgietká ka hođichoká.

¹⁵Aaléka, har Sátan gede lééllá úba hol gede Waaˈgiet-, ˈdúwaká ká hođuoka, hé kinaallá hé ke af ˈdaˈdaboká muuniny. Gáál héllé il hí aargiˈdoká he hé gáál he ekenyle hí hol ki ˈgeˈgetoká.

¹⁶Yú geđi hí geeye, máádhat hai ye máá đeechká ka dháany, tá har káána úba hí ye máá đeechká ká dhaˈgasannoka, ye a nee kóo, hol á níínni mare meeye.

¹⁷Hol meeny chiallá hé hát Máá kúnnaa Guđoká hí ˈdéé ka hogodhoká muuniny, he yaa hát máá đeechká ˈdéé ká hogodho.

¹⁸ˈDaa giri gál burnayká hát gál lesallokáka hol memeyóóllá, yú úba hollo hol meeye.

¹⁹It hol gál ˈdaalle léká ka dhaˈgasannóóllo, it tág hí gál đéeská af nee kokoyyoká feˈde.

²⁰Máádhat har káána úba hí hemuumuritle mé gim nannaa yíekaʼ, hí nyiimita yíekaʼ, hé kíchia hí ˈgayyaká hí af ki riridha yíekaʼ, hol máá ˈdúwaká hođia yíekaʼ, héétí hí nee ger gaa tutuna yíekaʼ, it hí mú héllé kinaallá uˈda, hí mú a nee kokoyyoká feˈde.

²¹Hééllá hát kern ˈginká yú ká hogodho, nyiin tág nyáá nyí hé kinaallá ekenyle gaa đalit.[15] Yú hátle kír máá đeechká ˈdéé ká hogodho, hé mákárta-, máádhat hí hol ki memeyoká yú úba hí hol ki meeye.

²²Gaal har gál Heberew kátaka, yú úba he máá Heberew. Gaal har gál Yisirayel kátaka, yú úba máá Yisirayel. Gaal har hídh Abiraayam yé gáá ˈdieka, yú úba máá hídh Abiraayam.

²³Tá gaal har he gede Kiristo hol yegetka, yaa súm gáál ˈdú gédéch Kiristo. Yú meka hát máá me hí ˈjieˈdeká ˈdéé ká hogodho. Yaa gáál hújích fargogoká súm ˈdú nie, yú ubaa gaal íínka yaa gálaat ye af burnayká ki hiigidhe, yaa gálaat ye af burnayká ki tune, yaa af burnayká kúfach bala gáá bie.

²⁴Yú af chenno gál Yuuˈdi ye tuuˈd tomonaam seđe a saal ki ˈdane,

²⁵af seđe gaal ye ˈgul ki tune, af tikiˈde gaal ye waar ki tune. Yú af seđe kadich ye ki ˈjieˈde, kadich eiy baabame. Héétí, yáá kulich tikiˈd ubaa chúúrélle úba bie gaa rafe.

²⁶Yáá hol siem burnayká ki yies. Warram, shútá, gál chia Yuuˈdiká, héétí gál gál Yuuˈdi muuninyká lúl úba hé ye ki ˈgeerˈgerney. Har yú ˈjien gaa ije yiekaʼ, ˈbakat álle gaa ije yiekaʼ, héétí bás gaa ije yiekaʼ, alb kinaallá lulle hé he il hí ye gaa aargiˈde. Tá gál hođomlé-, hol gál nyaaram kúnnaa Kiristoká ka hoyká hé úba ye ki ˈgeerˈgerney.

²⁷Yáá laađame, hol hujich ki yies, ram ˈdaˈdabe. Yáá mar ubaa báre ye chegies, yú af burnayká af higite, ˈdéeny gaa rafame, đafaraam ˈdúwaká mannay.

²⁸Tá hééllá lulle úba kí hayo, gál Kiristo geerle hé aadh lulle úba ye gaa ˈdeew.

²⁹Mááya đalit, yú íín hí gaa đalit muuniny? Mááya ađááb hileka, yú geer ye ma gaa kakariny?

³⁰Har yú hol memeyoka, yú af kinaalka đalimchú ha meeye.

³¹Máá kúnnaa Guđo Yíésu ˈJaallé Waag bííyó biiyo gaalí memeyóóllá hát hééllá ˈdugaka yú hódho ma hogonká hé óg.

³²Bár giri Arétas kansich onnoyká, máá muí ˈjien ˈDamaskas mé ki koyká yuoyle he ki mure, giri yuoy ˈjien ˈDamaskas kinaal ˈdeˈdeenno-, gaal ye ˈgiiliˈgawká.

³³Yú af kinaallá kulidh gaalí ongʼolich tág gaa nie mare gaalí ye gaa kaay, gaal ye đír il kí leesie, in yú kar ˈdoy. [16]