Read daasanach Korínto ki Naamaká 12 Bible Online

Korínto ki Naamaká 12 - daasanach bible

Korínto ki Naamaká 12

¹Har káána hol meeny úba ˈdúúw manítaka, bá yú geđi ˈdéé hol ˈdú hoogodho. Yú hé Máá kúnnaa Guđoká hí ye argisie-, tá hí ye kí edhesieká ˈdeenyle ha yú hí ká geđia.

²Yú yáá máá Kiristo-, warram tomon tikiˈde a afur beeyéétíá Waag hí ur ki seđeká[17] ˈdú eeteká óg. [18] Máá kinaallá Waag hí egeeteká, gónle ˈgabka, gónle mannabka, yáá muog, Waago hí og.

³Yáá máállá hát Waag hí ál geyyiet-, Waaˈgietká ˈdú eeteká yáá óg. Yáá hí geey, mu gónle ˈgabka, gónle mannabka, yáá muog, Waago hí og, yú hí yie.

⁴Mu ál geyyiet kinaallá ˈdeeny súm ˈdúwa-, máádhat hát níínní hí hodho mán-, huogonle Waag hí mú ma shíinyká maale.

⁵Yú máá hatallóóllá ˈdaalleka ˈduuwle hogodho, tá yáá ˈduuwchú ma hogon, đalim chia tákáma hélle hogodho.

⁶Tá har yú ˈduuwchú hogodhoka, af kinaalka yáá hát máá đeechká ˈdéé ma ká hogon. Yú hé ˈdúwaká ha hogodho. Tá yáá ˈduuwchú huogonle hol gáá faganay. Yú gálaat ye memeyoká fede muuniny. Tá gálaat har midhantchia mákártaká taawuoka, hé kinaal hí ˈdaa húgúmchú ubaa he onisiny gaalí ye gaa maaleká ˈdaalle ki yaal.

⁷Har káána úba yú hé súm ˈdúwa-, Waag hí ye edhesichééllá argeka, Waag hé yú máá súm ˈdúwaká hol ká dhaˈgasanká ma fediny, in hiit ye ki ˈgite.[19] Hiitééllá he Sátan máállé ˈgasso-, ye maanyjasuoká.

⁸Aalé yú a seđe Máá kúnnaa Guđoká gil ki efe, giri hiitééllá ye gaa silmeetoká.

⁹Aalé mu ye geey, mu kieye, ˈDúˈjímchú hé ko ka gúúđo, fargogintchú af giri kúún đalidhekáka hé tág ko far ki gogiyyo, muí ye yie. Aaléka, đalim chialláka yáá geer ye gaa meedhe, giri fargogint Kiristo ye hujich gaa nanniyyoká.

¹⁰Aaléka, he lullé ˈdaa Kiristoka il hí ye argiyyeká, hát káána đalím, chaarim gaalí ye chacharoká, hé ye ki ˈgierˈgereká, manyjasiny, tá gon bólo, lúl iiy ha yú yeedhe. Yú af giri đalitká in fargogo.

¹¹Yú hát máá đeechká ˈdéé ká hogodhe. ˈDaa giri hí ye ˈdéé ma ˈdú húógonká, hééllá itíni hí ye mé ki koyye. Hár úba káána yú máá káta mánká kátaka, gál hol gál ˈdúwa-, alb fimiká ka hoyallá hé íín ye ma ˈdú ˈduwanany.

¹²Hé ˈduuˈdúwa-, yú hurtkícho gaa eekemeyká, he hé máá Kirísto hí ali gáá kaayká hí ekemeyoká. Yáá mé ki chichirte, it hé hí af ˈdaˈdabsie-, farguogoká il ki argiyye.

¹³Itín hurtkícho meete yú ma gaa eekemêny, he yú gál Kiristóótíá tákámle hurt gaa eekemey? Hé yú hurtkícho ma gaa ekênyká tikiˈd tákáma. Yáá hé mannayká ilshle hí ma ˈdú iđîny. Har hééllá yú ˈdeeneyka, ye ˈdú ˈjée!

¹⁴Aalé káána yáá sieny chia ki seđe-, hí af kí ˈdeˈdeenká ˈguo. Yáá hí ílsh ma gaa iđiminy, hé kíchia mákártaká ma fediny, yú itín dhúr kíchia hí fede. Um hé gál hí ˈdaleká hé geere ma ki eebisan, gál um ˈdaleká in um hé geere ki eebita.

¹⁵ˈDaakíchoka he lulle yú yé gaa ˈdeˈdeenká yáá uro. Har yú hí hatal súm gielnítaka, háteka itín úba hí ye hatal ma geelnenyal?

¹⁶Hát yú hí ílsh ma gaa iđînyká it úba iiy chie. Tá yú gáál ˈbáál hát máá điđasich-, hí nyiimisatká ye ká dhaˈgama.

¹⁷Tá háte yú hí nyiimite? He in gál yú hí ali ˈdú gáá fieká ˈdaalleka in itín yú hí bal mé ki káádhdhe?

¹⁸Af giri yú Títo gil ki efe-, mu ubaa nyárkúnno yú hí ali ˈdú gáá fieká, Títo úba bal mé hí ki káádhdhe? Yú ubaa mu íín Hím Naasan Waaˈgiet he nyí a tatiyyoká muunîny? Nyiin ˈgas hé nyí tikiˈd muunîny?

¹⁹Itín haí taawuyye, hí kieye, Gaal taalle ˈdéé he hol ˈdú hogodho, hí nyí chegie? Nyaaram kínyaa nyí gielallo, he hé hát kinaallá muuniny. Nyiin innum Waaˈgietka hát gál Kiristoká nyí ˈdéé ká hogoto. He lullé nyí hogoto-, ubaa nyí ekemeychóóllá, he giri itín hí higirayyoká.

²⁰Hé geerle ye gaa ˈdeewká, he yú bííykícho ká yimieka, it kálmaréél hát yú hí ki fedoká ma ká iđiny, in aaléka hé yú hí geđuoká kálmareka hí ma fediny. Hé yú hí ma gaa fedinyká, he hol ki fálaam, hinááf, ídho, hol eiy gaa ˈgiiˈgisan, hol méé ˈdeeneny, heengʼeen, hol gál ˈdúwaká ká dhaany, tá hol shalal fiiny.

²¹Geer chia ye gaa ˈdeewká he giri geđi yú ká yimieka, kálmaréél ˈdaakíchoka Waag kern ha ye ˈgiidhicha, geer súm đo hai ye gaa ˈdeenedhe, ˈdaa giri it burnayyeká hí ađaabano kíchia kissoká hí ma hâny-, hí Waag makan ma fáminyká. It hé kíchia gaa nyakarichká, ubaa herginy hol buraaká, tá hé kern mantiká hátle ma hâny.