Read daasanach Korínto ki Naamaká 13 Bible Online

Korínto ki Naamaká 13 - daasanach bible

Korínto ki Naamaká 13

¹Hééllá sieny chia ki seđe-, yú hí ˈdú gáá yiimetká. Warˈgat Waaˈgiet kieye, Ali gál misigír naama-, muuninyka, seđeká hí gaa ijoka, ˈdéé eiyyo gaalí hol gaa nannaa,[20] he chie.

²Sieny chia ki naama-, toomeello-, yú álkíchía kinaal ka yimieká, gál kíchia ađaabano gaa sesemeká yáá il gíl gaa helie. Tá káána hátle ke hol eiy gaa fágallá, yáá geđi gaal íín ubaa gál éíy taaka ađaabano gaa seseenká geey, giri yú geđi ká yimieka, gáál yú ˈdéé ki iđimuoká.

³Kirísto hát ye ˈdéé gáá hogodhoká ˈduuwle ha yú hí ká aargisia. Kirísto atimlé hí af ka tatuoká hé đalidhe muuniny. Mu fargogintle af haí kí tataa.

⁴Mu af giri gaalí ˈgór đarám yaalká ˈdú yegieská, mú gónlé muí ˈgie kinaallá hé đalím ˈgayye, tá mu káána hé fargogint Waaˈgiet ki ijo. Aaléka, nyiin hát mu íín hí đalit onnoyká nyiin úba nyáá nyí đáális, tá nyiin nyáá nyí mú hol ˈgayya-, fargogint Waaˈgiet af ha ke hí ki tataa.

⁵Ebá hol ki ˈdoolmitíe har hí iiy yeenkícho ˈgayyoka. Máádhat hí hol dhaayo, har tagle yaalka. Itín Yiesu Kirísto hát hí gaa ijoká it muog? Ebá hát hí tagle ma ˈgiinyká hí hol kimisate?

⁶Itín nyiin hát nyí taganokínyo ˈgiiyyaká hí kiimisatoká úba yú fede.

⁷Hé ke hí Waag kí vivisat, giri itín hí hé ˈdeđewká ma gaa seseminyká. Hatallá nyí Waag vivisatóóllá, he giri gálaat nyí gál tagano ˈgiiyyaká ka dhaˈgasanká muuniny, he giri itín hí hé midhabká ekemeychoká. Hé kinaallá har káána úba gáál ˈbaal nyí gál tagano ma ˈgiinyká ká dhaˈgasanka.

⁸Nyiin nyáá nyí hé ˈdúwaká met il ma gaa ˈgiiny, nyíín hé ˈdúwaká ˈdaalle nyí ki ˈgiiyya.

⁹Har káána úba nyiin nyí đáális kátaka, af giri iiy yeenkícho fargogiyyoká nyiin ger ha nyí gaa meedhe. Waag visan ke hí kí vivisatká he giri itín hí higirayyo-, hí tagano ˈgiiyyoká.

¹⁰Aaléka, hátlé ke hol in eiy ka ijóóllá in yú hí ˈdeenyééllá ˈdú gáá veere, giri yú ká yimieka yú hí ma ugufinyká. Fargogint Máá kúnnaa Guđóóllá hí ye ka shíéllá, he giri yú hí eiy ma fufuminy-, yú hí ˈdiˈdisoká.

¹¹Aaléka, nyaaramchú, ger hí gaa meet, hiráa, gúóf ˈgáa, kas tikiˈdeká ˈgáa, hol naanná ki yíéđía. Waag kúnnaa gielmít ubaa naanná ˈgayyóóllá hí gaa yíéđiyyo.

¹²Naa gielmitiká hol naa ki yiegedhíe. Gál nyaaram Kiristóóllá lulle hé hí naa ká yie.

¹³Lulkícho, Máá kúnnaa Guđo Yiesu Kirísto hí ˈdú ˈjeeˈjeen, Waag hí gielmitle aargisicho, Hím Naasan Waaˈgiet lilmach hí hol ka ˈgayyaká hí shiigicho.