Read daasanach Korínto ki Naamaká 3 Bible Online

Korínto ki Naamaká 3 - daasanach bible

Korínto ki Naamaká 3

¹He in geđi hollo nyí hol ká ˈdaakaycha, ke hí ˈduuwkínyo geđía? He in hát gáál ˈbaal hí ekemesetalka, warˈgasano ˈduuwkínyo hogodhoká gálaat hí ˈdu gáá vereno-, muuninyka, itín hí verennoká hí féˈde? Híʼi, hé kinaal gon hát hí hol ma hegesenká nyáá nyí óg.

²Itín dhúrkícho he warˈgat ˈduuwkínyo hogoto-, gálaat lulle hí totoyoká. Hé kíchia hí gerka ˈgayyaká[1] gaalí argeka, in hújích kínyaa ke hí hurt gaa nieká gaalí eiy nannata.

³Hé gaa édhká he kieye, itín hí hát warˈgat hújích kínyaa ke hí hurt gaa nieká ˈdaalleka Kirísto hí veereká. It warˈgátáállá, it Kirísto hí ˈgór mé dhátká ma ki véériny, mu Waag bííyyo ali iđoká hí Hím Naasanle ki veere. Mu hé he veeritééllá waar ˈdug ma gaa véériny, he veeritééllá ger kíchia muí gaa veere.

⁴ˈDuuw ˈdaa Kiristoka nyiin nyí Waag ka ˈgayyáállá, in hé yú hí ka geđúóllá nyí ki og.

⁵Nyiin nyáá nyí kieye, hééllá he uritle nyííni nyí yé gáá ˈdeˈdeenne, nyí ma chegen. He uritkínyo lulle Waago yé gáá ˈdeˈdeenne.

⁶Nyiin Waago úba nyí he hol af iđinylé kaanáállá hújíchle nímle uritle shiiche. He hol af iđiny kaanáállá hé hemuumurit Móshe hí veereká ˈdaalle ma ki taaliny, Hím Naasan Waaˈgieto ˈdaalle ki taalla. Hemuumurít íín kúfacho gáál mé ki kokoyyo, Hím Naasan Waaˈgiet íín luolmíti gáál yé ˈdú ˈdeđicha.

⁷Hemuumurit gáál kúfach mé ki kokoyyóóllá Móshe hí waar ˈbaˈbassoká ˈdug gaa veere, Waag ˈduuwle édhúmle Móshe gaa veere. Móshe hemuumurit kinaal gál Yisirayel shigieká, innum hí súm ˈjiimidate. Innum ˈjiimidantlé kinaal har káána úba hol gagalleka, gaal hé hát níínní mú innum gaa dhaˈgameká mán.

⁸He hol af iđiny kaana-, Hím Naasan Waaˈgiet ki taalallá ˈduuwle hé hol af iđiny kisso-, hemuumurít ki taalallá af mé ma iđiny?

⁹Har he hol af iđiny kisso-, hemuumuriti-, gálaat ˈdeđensetóóllá ˈdúúw ˈgayyoka, he af iđiny kaana-, múún gáál Waag innumleka gál ˈdúwaká gaa hođichóóllá ˈduuwle hé súm ma guđanany?

¹⁰Har he hol af iđiny naamáállá ke hol ki ekeyka, he hol af iđiny kissoká ˈjiimidantle hé ˈgite, ˈdaa giri he hol af iđiny kaanáállá ˈjiimidantle súm hí af mé ˈgisateká.

¹¹He hol af iđiny kisso-, el me hí ˈgidhééllá, af giri ka chimieká hé ˈduuwle ˈgayye. Tá he hol af iđiny kaana-, bííyyo-, el me hí ma ˈgiˈginallá, ebá ˈduuw hí súm guđáan!

¹²Aaléka, ˈdaa giri múún ke he hol af iđiny kaanáállá ˈduuwle ógká, in ke he ma kakany, ke biiy met ki seseme.

¹³Muun hé ke hát Móshe muuniny, máálle đafar mé bubudhdhe-, giri innumlé ˈjiimidate-, dhodhoyyeká gál Yisirayel hí ma aargírinyká.

¹⁴Af Moshe kinaallá in gál Yisirayel kas hí chúg chie, tá ˈjíig káána ke gaa ijóóllá đig. Gaal af giri he hol af iđiny kissoká warˈgasamle totoyoká, gaal hát gál kasle đafar giˈdidheká bueká. Gaal Kirísto iiy yieka tákáma kas hí eiy ˈdeenne, fayam Waaˈgiet eiy nannata.

¹⁵Tá gál Yisirayel káána ˈjób ki gaa ijóóllá Móshe warˈgasamlé veereká totoyoka, kasle hé hátle chúg, đafar buan kinaallá he gim gaa iđa.

¹⁶Tá máádhat Máá kúnnaa Guđo Kirísto bala ˈdú nuo-, mú iiy yeetká kasle đafar giˈdidhe kinaallá haí gaa ˈjeenne.

¹⁷Aalé Máá kúnnaa Guđóóllá hé Hím Naasanle muun gáál ká shie.[2] Héétí ál Hím Naasan Máá kúnnaa Guđóóllá hí gaa iđoká hé mé furit Waaˈgiet ˈgayyo.

¹⁸Múúni lulkúnno ke Kirísto iiy yie-, kaskúnno đafar hí gaa ˈjiiyyééllá, Máá kúnnaa Guđóóllá guchlé ka edhdheyyééllá hé ke il ki aargiro, in aaléka muun gáál taalle hol gaa lalaanna, giri húgúmkúnno mú húgúmle hođichoká. Hol gaa lany kúnnaallá Máá kúnnaa Guđoká Hím Naasanlé he yé gáá ˈdeˈdeenne.