Read daasanach Korínto ki Naamaká 4 Bible Online

Korínto ki Naamaká 4 - daasanach bible

Korínto ki Naamaká 4

¹Aaléka, ˈdaa giri Waag nyí geer guuralle hújíchallá mé ki koyyééllá, nyáá nyí ma giinany.

²Nyíín nyáá nyí hé kern manti-, ubaa hé điđám gaa ijoká gaa láʼ. Nyáá nyí gálaat ma nyiimisan, fayam Waaˈgiet nyí hol ma gaa lalaminy. Nyiin innum Waaˈgietka ˈdeeny ˈdúwa-, leđuđugulleká nyí gálaat met gaa hogoto, giri gálaat lulle ˈduuwkínyo hát ˈdabaanká eiy nannasatká.

³Nyiin Fayam Midhab-, nyí ˈdiyeennallá har hé gálaat kasle ma higilinyká kátaka, af kinaalka gál Kirísto iiy ma yéen-, bađay-, kas hí chúgká tákáma he mé ma híliny.

⁴Máá lesallo-, hol Waag hođuo-, Sátanlééllá hé gál Kirísto iiy ma yegenallá kasle chúg hoy, giri gaal Fayam Midhab Kiristo-, máálle ˈdúwa-, yaalmit Waaˈgiet ˈgúóllá ˈduuwle ma kiimisanká.

⁵Nyiin nyáá nyí dhúrkínyo hékínyo ma ˈdiyiminy, nyiin Yiesu Kirísto hát he Máá Guđoká nyí ˈdiyeenne. Yíésúúllá ˈdaalle in nyí gedekícho ki chie.

⁶Muun Waag tikiˈde kieye, Edhum hí bííy gaa ongʼoˈdeká yé gáá ˈdie,[3] chieká in muun kaskúnno édhúmle gaa iđiche, giri ke mú ˈduuwle oonnootká. Waag ˈduuwlééllá in gálaat hí Kirísto gaa aargira.

⁷Nyiin nyí hát ibilaam kamur Waaˈgietallá hí gaa iđoká. Yaalmitééllá in fargogint ˈdúwáállá hát nyiin nyí yé ma gáá ˈdeˈdeminy-, Waag yé gáá ˈdeˈdeennoká gaalí kiimita.

⁸Nyiin hé il hí nyí aargiˈdoká biiy lullé he gáá yiimedhe, tá hé kinaallá hé níínní nyí ali koyká mán. Ger hé tág nyí gaa ˈdeđenet, tá nyáá nyí ma giinany.

⁹Gálaat hé nyí maanyjasuo, tá Waag hé nyí ma hâny. Gálaat hé tág nyí gon bolmosuo, tá nyáá nyí agarsata.

¹⁰Kúfách Yiesu aadh lulle nyí ˈdu gáá kekeenallá ˈjaarsamle gón kínyaa nyí ki sisita, giri luolmit Yiesu hát nyí gaa iđoká gálaat úba hí kiimisatká.

¹¹Nyiin taalle nyí les ˈdú iđáállá, Yíésu hújíchlé nyí ki nanniyyáállá ˈdaalleka kufach hé nyí ma gaa ˈgiˈgisan, giri nyííni nyí aadh ˈdaatika kufunannóóllá gálaat luolmit Yiesúúllá úba nyí gaa aargiroká.

¹²Aaléka, kúfách nyí igiróóllá in itín hí luolmit biiyoká gaa argiyye.

¹³Warˈgat Waaˈgiet mú tikiˈd hí ˈdéé gáá hodhe, kieye, Yú iiy yeenno ˈgaa, in ˈdéé hodhe,[4] yie. Nyiin hát máá kinaalka nyáá nyí iiy chie, in taalle nyí fayam Waaˈgietallá ˈdiyeenne.

¹⁴Nyiin nyí fayamééllá ˈdiyeennóóllá he ˈdaa giri Waag Máá kúnnaa Guđo Yíésu hát uushich yé gáá ˈdeeycheká nyí ógká. Hát tikiˈde Waag Yíésu uushich yé gáá ˈdeeychééllá in úba muun gáál uushim yiem gáá ˈdeđicha. Nyiin ubaa itín hát gáál metle gaa iđimisatoká nyí og.

¹⁵Hééllá lullééllá he ˈdaakícho ˈdugaka in il hí nyí aargiˈda, giri Waag ˈdúˈjímle gál burnayká úba nyonyoron-, gaal Waag gielmit guđoká hol ˈdú nannuo-, Waag ˈdúúw egeetoká.

¹⁶Aaléka, har káána úba gón kínyaallá ˈdeđenetka, nyáá nyí ma giinany. Hééllá ˈdaa giri gúóf bar lulle Waag hí nyí shigichoká.

¹⁷He il ká argisiny kínyaa nigini-, káána nyí gaa iđáállá in ˈduuw guđo-, biiyo-, tawuny lulle af mé gíriká nyí yé ˈdú ˈdeđicha. ˈDuuw kinaallá hé il ká argisiny-, hé káta-, mánnallá hol ma nyuoriny.

¹⁸Aaléka, nyiin nyáá nyí hé ke argoká ma dhaˈgaminy, hé ke ma arginyká nyí dhaˈgasanna. Hééllá he ˈdaa giri he lullé ke argóóllá el met hí ˈgiidho-, hé ke ma arginyatíá íín hé biiyo-, yegetká.