Read daasanach Korínto ki Naamaká 5 Bible Online

Korínto ki Naamaká 5 - daasanach bible

Korínto ki Naamaká 5

¹Gón kúnnaallá he hát lokoolom lesallo-, aadh ˈdaatika ˈgieˈgewká. Muun gón kúnnaa lokoolomallá ˈgieˈgeyyeka, Waag hát muun gáál gón kaanaká úratí gaa shigichoká hé ke óg. Gón ke kakaat kinaallá he hát ény biiyo-, gál hí gil ki ˈdisse mán-, ma ˈgieˈgenyká.

²Hátlé ke gón kúnnaa lokoolomallá ˈgúóllá in ke egedhme, ke fiirit gón uratiká kakaatká kaadha,

³ˈdaa giri gón kúnnaa ke ˈgúóllá ke yé gaa ˈdieka, ke gón biiyo-, uratiká ma ˈdaabinyká.

⁴Hé ˈduwa, muun hátlé ke gón kúnnaa lokoolomallá ˈgúóllá, edhminy hé tág gáál chies. Tá hé kieye, gón kúnnaa ke ˈgúóllá kí ˈdabo, ke ma yegen. Muun gón uratiká ke kakaatká ke fede, giri gón kúnnaa aadh ˈdaatika kufunannóóllá mán cheget-, ke gón kaana-, biiyoká ali iđoká ke kakaatká.

⁵Máá muun gáál ka kuone-, gáál gón kaana-, biiyóóllá ka shigúóllá he Waag. Waag íínííllá in gáál Hím Naasanle ká shiiche, giri luolmit biiyo kinaal ke met gaa ógká.

⁶Aaléka, muun hé ke aadh lulle gúóf ˈguo. Muun ˈdaab hátle ke gón kúnnaa lokoolomallá gaa ijóóllá hát ke éget Máá kúnnaa Guđóóllá ma gaa yíéđiminyká kí onnow.

⁷Nyiin káána nyí ali iđóóllá nyáá hé nyí il ki aargiˈdoká nyí ma ki iđiny, nyiin hé nyí ma árginy-, kor nyí iiy chieká nyí ki iđa.

⁸Nyiin góf guđoká nyí ˈgayya, tá onnônyka hát nyí feˈdoká, gón kínyaa lokoolomallá nyí yíé gaa ˈdiiyye-, nyí éget Máá kúnnaa Guđóóllá mé niiyyeka kalat.

⁹Aaléka, har káána úba nyí gón kúnnaa lokoolomallá gaa iđa yíekaʼ, nyí éget Máá kúnnaa Guđóóllá gaa iđa yíekaʼ, hé nyiin nyí súm feˈdoká he giri nyí Máá kúnnaa Guđóóllá geer gaa memeychoká.

¹⁰Muun lulkúnno kara Kirísto hí ˈdú yíéđian-, mu gálaat ˈdéé ki iđimuoká metle ha ke ki ˈdeeme, giri máádhat af giri he gónlé lokóólallá lésallá ki ijeká, héllé midhab eekemeyká yiekaʼ, héllé ˈdeđew-, eekemeyká yíekaʼ, héllé shiichoká aargiroká.

¹¹Nyiin ˈdaa giri nyí kian Máá kúnnaa Guđóóllá ka ˈgayyaká in nyí gálaat af ˈdú nannasata, giri gaal mú iiy yegetká. Waag hé gerkínyo hélle alulle óg, itín úba onnônyká hát tikiˈdééllá hí nyí ógká yú fede.

¹²Nyiin nyáá nyí geđi ˈduuwkínyo ke hí ma geđiny. Nyiin hé ke hí ki fedoká he giri ˈgatkínyo hí ˈgayya-, gál gálaat ˈdug gáá dhaˈgasan-, gálaat memeyo-, húgúm gálaat ger gaa ijoká hol ma hegesenallá ˈdéé hót hí hol ˈdú nanniyyaká hí ˈgayyaká nyí feˈde.

¹³Aaléka har gálaat nyiin gál met hí ˈjieˈdeká nyí ká dhaˈgameka, hé kinaallá lulle Waago nyí ki ekemeyche. Tá itínka, nyiin kas tagléká nyí ki ˈdiyeenneka, af kinaalka hé kinaallá itíni hí ki midhanay.

¹⁴Nyiin hé nyí af tatuoká he gielmit Kiristo. Hééllá he ˈdaa giri ke óg-, mú tikiˈd tákámle gálaat lulle ˈdú kufeká. Aaléka, múúnííllá hé ke mú hol ˈgar kufe, ke húgúm kúnnaa kissoká ke yé gaa ˈdie.

¹⁵Kirísto gálaat lulle ˈdú kufééllá, he giri gál les ˈdug ˈdú ijóóllá mú iiy yeget-, hát hol ki fedoká ma yíéđiminy-, Máá hí ˈdú kufe-, geđi loolnodhééllá hol ˈdú silmuoká.

¹⁶Aalé káána ke gaa ijóóllá, muun hé ke geđ máádhat hát gálaat hí ki taawuo-, hí ka egeetká ma dhaˈgaminy. Muun erkobká Kirísto hát gálaat hí ká dhaˈgameká in úba ke ká dhaˈgame, tá káána ke mú kimiteká, hé kinaallá hé ke hay.

¹⁷Aaléka, máá Kirísto hol ˈdú fameká hé Waag hí káána hoyche, mu hé yaalmitlé kissoká gaa láʼ. Ebá mú dhaayyíe, mu hé káána kí yie!

¹⁸Hééllá lulle Waago hí hatallá ká kokoyyo. Waag íínííllá Kirísto ali gáá kaayye, Kirísto muun ubaa Waag gáál hol hilsie. Waag úba nyíínííllá nyí hujich shiiche, giri gálaat ubaa mu íín nyí hol higilsichoká.

¹⁹Aaléka, Waag ˈdaa Kiristoka gál lesalloká ínnallé hol ˈdú gáá eeyye, gálaat ađaabanolle gaa eeyye. Tá Waag hé hújíchle nyiin nyí mé ki koyye, giri nyí gálaat fayam Kiristo-, fayamle gálaat ubaa Waag íínííllá hol higilsichoká ki ˈdiyeenneká.

²⁰Aaléka, nyiin nyí Kirísto gállé nannoká. Nyiin nyí gálaat fayam Kiristo ki ˈdiyeennoká he hát Waag íín gálaat gil ki egefiyyo. Gáál gillo nyí ki egefiyya, in nyí geđicha, ˈDaa Kiristoka Waag hol hiláa, nyí gáál chegedhe.

²¹Kirísto ađááb mánnallá in Waag hí ađaabanokúnno ˈdú iđiche, giri mú ˈdaalleka Waag muun gáál gál ˈdúwa-, ađááb mánká innumle gaa chegetoká.