Read daasanach Korínto ki Naamaká 7 Bible Online

Korínto ki Naamaká 7 - daasanach bible

Korínto ki Naamaká 7

¹Nyaaram chia yú gielallo, ˈdaa giri Waag muun gáál hééllá lulle af iđicheká, ameeny hé ˈdeđew-, gón gelle ubaa sídh gelle gaa ijo-, muun gáál ˈdeđeneyoká lulle kí hol gaa dhiiro, kí Waag kiikiat, kí gál Waag hát ˈdabaanká ennianká yeet.

²Aaléka, ˈdaakínyoka ger furáa. Nyiin nyáá nyí máá níínní he ki ˈdeeneycheká mán, muuninyka, nyí he ki ekeycheká mán, héétí nyí ki kiiyyeká mán.

³Hééllá yú hogodhóóllá, yáá hí ma ˈdeđensen. Yú kis hí ma géeny? Ke hol ˈgar kuf yíekaʼ, ke les ˈdú ija yíekaʼ, it tág ke hí giel, yú ma yéen?

⁴Yú hí hatallá geđúóllá, ˈdúuw yú hí ki og. Meeny yú itín memeyoká hé tág guđo. Har káána úba nyiin nyí hát lulle maanyjayyeka, fayamkícho hé tág ye guofsiche, ye geer gaa meeyche.

⁵Aalé af giri nyí Makeˈdónia kí faanneká nyáá nyí hím ma níiny, ˈdaa giri shalal ilishká nyí faanne-, gáál ˈdeemle ubaa ˈdeemkínyo hol ma ˈdú fafaminy-, ger úba nyí gaa ˈdeenedheká.

⁶Tá Waag ííni gál ger hí gaa ˈdeđenetká gogofsichóóllá nyí Títo ali ˈdu gáá kaayye, nyí guofsiche.

⁷Títo ˈjímle hé tákámle úba nyí ma guofsîny, fayam ˈdaakíchoka muí nyí ˈdu gáá sidhe-, giri itle hí mú guofsicheká hé úba nyí guofsiche. It fiirit giri hí ye aargiˈdeká ˈgayya-, héétí it úba ger hí gaa ˈdeđenet-, tá hát úba hí ˈdaachú ki ˈgiiyyaká hé muí nyí geey. Fayamééllá hé ye tág geer gaa meeyche.

⁸Hár úba káána warˈgat yú hí ˈdu gáá veereká hí ger gaa ˈdeeneycheka, yáá gil ma ˈdaanan. Erkob ˈdaa giri warˈgát ˈdeenyle hát hí ger gaa ˈdeeneycheká yú argeká, yáá á níínni mare gil ˈdanne, tá ger gaa ˈdeenen kíchia kinaal hé ali hí ka ninniká.

⁹Aalé káána yáá geer ye gaa meedhe, tá hééllá hé ˈdaa giri ger hí gaa ˈdeenedheká muuniny, he ˈdaa giri ger gaa ˈdeenenkícho hát Waag hí ki feˈdeká hí Waag makan famít mé ki koyye-, héétí hé ke hí ki ˈdeeneyká úba mánká.

¹⁰Ger gaa ˈdeenen Waag hí gálaat gaa feˈdoká he ger gaa ˈdeenen gálaat Waag makan famít mé ki kooyyo-, gálle rubach yé ˈdú ˈdeˈdeenká. Ger gaa ˈdeenen hatallóóllá hé tág midhab. Tá ger gaa ˈdeenen lesiet-, gálle Waag makan famít ma fedinyká íín kúfacho gáál yé ˈdú ˈdeđicha.

¹¹Tá bá dhaayyíe, ger gaa ˈdeenen Waag hí ki feˈdééllá, hát hí hé midhabká hí yé ˈdú ˈdeeychééllá, it argiyye? It góf hé tagléká ekemeycheká ˈgayye. It Waag hí ˈdeđenseteká ma fédiny. It hé hurtkícho yé gáá ˈdieká ˈdú idhanne, he il ká argisinyle kiate, ađaab kinaal hí hol yé gaa ˈdeđicheká it úba feˈde, hí ki ˈgađasanne. It máá he ˈdeeney kinaal ˈdéé ki iđiche. It ˈdeenyééllá Waag innumle hát tagléká gaa beesete.

¹²Aaléka, har úba káána yú hí warˈgat kinaal ˈdu gáá veereka, yáá máá he ˈdeeneyká, muuninyka, máá muí he ki ˈdeeneyká ˈdaalle ˈdugaka súm warˈgát ma kí véériny. Warˈgat yú hí ˈdu gáá veere kinaal, he giri itín innum Waaˈgietka hát hí súm ˈdaakínyo ki ˈgiiyyaká hí kiimisatoká.

¹³Aaléka, hééllá hé nyí guofsie. Góf kínyaallá úba kí hayo, Títo geer gaa meenle súm nyí ger gaa meesiche, ˈdaa giri hí mú geer ˈdéént yé gaa ˈdeeycheká.

¹⁴Hé midhab ˈdaakíchoka yú Títo geeyká, it ye af ki ˈduwasiche. Hát tikiˈde he lullé ke hí geeyká ˈdúwáállá, in úba hé midhab ˈdaakíchoka nyí Títo geeycheká ˈduway.

¹⁵Títo hé káána úba hí tág geelnedhe, hát giri itín hí mú af ˈduwasiche-, hí mú mé guđáan chie-, hí mú met gaa kekeenneká.

¹⁶ˈDaa giri he lulle ˈdaalleka ˈduuwkícho yú ógká, yáá tág geer ye gaa meedhe.