Read daasanach Korínto ki Naamaká 8 Bible Online

Korínto ki Naamaká 8 - daasanach bible

Korínto ki Naamaká 8

¹Nyaaramchú, nyiin gál Kiristo Makeˈdónia gaa ijóóllá hé midhab-, ˈdúˈjím Waaˈgiet hí yé gáá ˈdeeycheká ke hí geđuoká nyí feˈde.

²Gaal har úba manyjasiny guđoká il hí aargiˈdo-, gál he maamanká úba kátaka, hé tág ger hí gaa meedhe, in ger gaa meen kinaallá gáál ger gaa ˈdabínt yé ˈdú ˈdeeyche.

³Yú hí geeye, gaal hát mé ki timiká muuniny, hát he gaa feditiká, héllé nigini-, he ˈgieká ubaa hé éíy hé kinaal a ˈdú gíriká hol ˈdú gáá shuune, hé shiicho ká hoy.

⁴Gaal súm nyí gil ki efe, giri hé shiicho muun ke gál Kiristo Yerúsalem gaa ijoká ali ˈdú fafuoká úba ká shiguoká.

⁵Gaal hé úba nyiin nyí mé ka mannayyeká ekey, gaal hát Waag hí ki feˈdeká er Máá kúnnaa Guđoká hol ˈdú sillie, in úba nyíín nyí hol ˈdú gáá sillie.

⁶Aaléka, ˈdaa giri Títo ˈdéé hót hé shiichóóllá er hí mé kí kodhdheká, in nyí mú gil ki efiyye, giri muí guofsuo-, hé shiicho gielmitííllá shiinyle hí đuusichoká.

⁷ˈDaa giri hí he lúl ˈdaa gaa lilete-, hát káána hí iiy yeen fargogoká ˈgayya-, hí ˈdeem huogon óg-, hí ˈdaalim guđoká ubaa gúóf lulle ˈgayya-, héétí it hí nyí súm gielká, hé shiicho gielmitííllá úba hát geer gaa midhantiká hol ˈdu gáá shuunáa.

⁸Hééllá yú hogodhóóllá he yú hí ki mumura muuniny. Yú taalle gálatí góflé gál kúnnaa he hí ki ˈgierˈgereká ˈdú ˈjeˈjeenká hí geđia, giri gielmitkícho ˈduuwle yú kiimisatká.

⁹It Máá kúnnaa Guđo Yiesu Kirísto gielmitlé hí ka ˈguoká ˈduuwle óg. Mu har úba kamurnayka, ˈdaakícho ˈdugaka mu hé kamurle gíl sug ki hay, máá he mánká yie, giri itín hí kamur Waaˈgiet aargiˈdoká.

¹⁰ˈDaachúka, hé hí ki midhab-, hí ekemeychoká, hé shiicho-, hí wár beeyéétíá mé gáá kooteká hí đusicheka kalat. Itín he gál erkob hé shiichóóllá shiinyle hí feˈde-, hí hol ˈdu gáá shugunneká.

¹¹Aaléka, hé hí mé gáá kootééllá beetíe. Hát tikiˈde hí erkob hé shiichóóllá shiinyle gófle ˈgayye-, hí he hol ˈdú gáá shugunneká, káána úba hé hí uˈda-, hí hol ˈdú gáá shugunnoká hol ˈdú gáá shuuninyle beetíe.

¹²Hé mákárta-, máádhat hí geer gaa midhánt kí shiguoká, hé kinaallá innum Waaˈgietka taglé. Máádhat he manítaka, hé hé níínní ka shiguoká mán. Tá máádhat har he ˈguo-, he geer gaa midhánt kí shiguoka, hé kinaallá innum Waaˈgietka taglé.

¹³Yáá kieye, gaal yaalmitlé he ki ijoká he hí hawul ki mannaw, itín íín he hí ki ˈgeerˈgernaw, ma yegen. Tá hé midhabká itín hí he hol ˈdú chichiratoka kalat.

¹⁴Káánaka, it hí hé guđoká ˈgayya, gál he hí ki ˈgierˈgereká úba hí gíl ki helisannoká it uˈda. Af giri gaal íín hé guđoká ˈguo-, itín hé hí ki ˈgierˈgereká ˈgayyaká, in gaal hí gíl kí helisanká ura. Hatallá in lulkícho hí he hol ˈdú chichirata.

¹⁵Hééllá he hát Warˈgat Waaˈgiet hí hote-, kieye, Gál hé guguđoká hol ˈdú shuuneká héllé hol ˈdú shuune kinaal hé hí nuore, héétí gál hé niginiká hol ˈdú shuuneká héllé nigini hol ˈdú shuune kinaal he hí iraam ma ki ˈdábiny,[11] chieká.

¹⁶ˈDaa giri Waag góf tikiˈde ke hí ka ˈgúóllá úba Títo geer gaa kaayyeká, nyáá nyí tág Waag gielmít hol ˈdú niiyye.

¹⁷Títo hé gil nyí ki efiyyeká tákámle iiy ma yéen, he fedit hí ˈdu gáá yiimieká úba gófle he ˈgie.

¹⁸Nyár kúnnaa Fayam Midhab Kiristóóllá hújíchle ˈdugaka gál Kiristo lúl lésallá gaa ijóóllá hí memeyóóllá úba mú ha nyí gáá kakayya.

¹⁹Nyár kúnnaallá he máá af giri nyí hé shiicho gielmitííllá nyí Yerúsalem sisitoká gál Kiristo lesalloká hí ká sillie-, nyí hol egeetoká. Hé shiicho nyí sisitóóllá Máá kúnnaa Guđoká ˈdúúw shigia. Héétí gál nyí he ˈdú sisitóótíá hát nyíín fedit nyí gáál ˈdú ˈjeˈjeennoká nyí ˈgayyaká úba hai kiimita.

²⁰Máállá nyí hol egeetallá, he giri hé shiicho guđo-, gaalí nyí gíl ká fie-, nyí gál Yerusalem ˈdú sisitóóllá ˈdaalle ˈdugaka gaal nyí ma ki nannaanká.

²¹Nyiin hé innum Máá kúnnaa Guđoká gaa midhabká tákámle nyí ma ekemeny, hé midhab kinaal gálaat innumle úba nyí gaa ekemeychoká nyí feˈde.

²²Gál naama ke hí ali ˈdu gáá fafúóllá nyár kúnnaa éíy taaka-, nyí hát lulle hujich kí dhaˈgasanne-, ˈdúwa-, góf guđoká ˈgúóllá úba gáál ha nyí gáá kakayya. Mu hé tág sienyééllá ˈdú guofe, ˈdaa giri hí súm ˈdúúw ki ógká.

²³Títo íín he máá chia ˈdaakíchoka nyí hol hujich ˈgar nanniyyoká, tá nyaaram kúnnaa mú hol ˈgúóllá he gál gállé Kiristo-, lesalloká hí ali ká fie-, hújíchlé nannúól Kirísto ˈdúúw gaa shiguoká.

²⁴Aaléka, gálallá gielmít argisía, hé midhab ˈdaakíchoka nyí gál Kiristo lesallóóllá geeychééllá nyí af ki ˈduwayyíe, hát hódho muuniny-, ˈdúwaká gaalí kimisat.