Read daasanach Korínto ki Naamaká 9 Bible Online

Korínto ki Naamaká 9 - daasanach bible

Korínto ki Naamaká 9

¹Hé kíchia shiicho-, hí hol ˈdu gáá shugunna-, hí gál Kiristo Yerusalemká shigichóóllá ˈdeenyle hí muog-, yú hí ˈdu gáá verenoká mán.

²Hééllá he ˈdaa giri itín hí hé shiichóóllá shímle hát hí gófle ˈgayyoká yú ógká. Yáá hí ki ˈgaađame, it lés Akayáállá yaalmit kíchia itle hí wáratí-, tá ˈjíig káána hí hátle tagano ˈgiiyyáállá yáá gál lés Makeˈdoníállá geey. Aalé góf kíchiallá hé úba gál gúúđo allóóllá guofsie.

³Aaléka, yú gál nyaaram kúnnaallá hí ali ˈdú gáá fafúóllá, he giri hát kíchia hí tagano ˈgiiyyaká gaalí ká aargiro-, ˈdeeny kíchia yú gáál geeyká hódho ma yegen-, hí tagano ˈgiiyya, hí gaa ˈdabaanká.

⁴Tá af giri yú ka yiimetká, gál Makeˈdonia ˈbaal nyí hol ká eete-, gaal itín hát hé kíchia shiicho kinaal tagano ma ˈgiinyká argeka, nyíín kern ha nyí ˈgiidha, itín úba kern haí ˈgiidha.

⁵In yú tawue, gál nyaaram kúnnaallá yú hí ali ˈdu gáá fie, giri hé shiicho, Ha nyí ká shigicha, hí chieká har tagano ˈgieka gaalí ka aargiro-, héétí hí hol af tág ki kokoyyoká. Hatallá in hé shiichóóllá hé shiicho-, gaalí itín mé ki tieká ma yegen, he hé shiicho-, hí gerkícho gáá fuˈdeká yeedhe.

⁶Ebá ˈdéé hótééllá táb ˈdodhdhíe, ár iraam mánká gaalí fieka, aadh ˈdaatika ˈguomle hé iraam mán. Tá ár guđoká gaalí fieka, aadh ˈdaatika ˈguomle hé iraamlé.

⁷Aaléka, hol ˈdéé mé gaa eedhdhíe, hé shiichóóllá shíícholle ˈdaˈdab mákárta-, hí gáá shigichoká. Haí he hát ger gaa ˈdeentiká ubaa mé ki timiká he ka shigîny. Waag máá he hát geer gaa midhantiká he ka shiguoká he giel.

⁸Tá Waag ˈdúˈjímle hát lulle hí ˈdú okoˈdmichoká hé uˈdo, giri itín aadh lulle hí he ˈgayya-, tá hí gálaat hát lulle ˈdú ˈjeˈjeennoká hí uˈdaká.

⁹Warˈgat Waaˈgiet kieye, Máá Waag kikiatká hé gál he maamanká hát ger gaa midhantiká he shiguo. Mu geer gaa midhantlééllá bííyyo gálaat táb haí ˈdoˈdodhdho,[12] he chie.

¹⁰Waag ííni gál les fafuoká aram shigicho-, gálaat hé geere shigichóóllá in úba hí he shigicha, hé kíchia kinaal hegersicha, tá hé ger gaa midhantkícho yé gáá ˈdeˈdeenallá in úba hegersicha.

¹¹Waag hát lulle haí ˈdú ˈjeenne, giri itín úba hí hát lulle gálaat ˈdú ˈjeˈjeennoká. Hé shiicho kíchia hí nyí ka shigicho-, nyí gáál ˈdú sisitóóllá gáál Waag gielmít hol ˈdú niiny mé hai ki kokoo.

¹²Hé shiicho kíchia hí gáál shigichóóllá hé gál Kiristo héllé hí ki ˈgierˈgereká hé tákámle yé ma ˈdú ˈdeeminy, Waag gielmit guđoká hol ˈdú ním gáál yé hai gáá ˈdeđicha.

¹³ˈDúˈjím kíchiallá ˈdaalle ˈdugaka gaal Waag ˈdúúw hai shigia. Ger gaa midhant kíchia hí gaal íín ubaa gálaat lulle aargisichóóllá, hát itín hí Fayam Midhab Kiristóóllá hí iiy chie-, hí met gaa kekeennóóllá gáál úba hai aargisia.

¹⁴ˈDaa giri Waag hí ˈdú ˈjiiyye-, hí geer gaa midhant guđóóllá shiichééllá, gaal súm haí fiiria, Waag haí kí vivita.

¹⁵Waag hé shiicho gáál ka shiiche-, ˈdúwa-, hát níínní úba ke ˈdaakayo mánnallá[13] ˈdaalleka, kí gielmít hol ˈdú naannuo.