Read daasanach Galátia 1 Bible Online

Galátia 1 - daasanach bible

Galátia 1

¹Yú he Báulo, máá ali gaa kaany-, gálaat, muuninyka, máádhat hí ali ma gáá káany-, Yiesu Kirísto dhúrle ubaa ˈJaa kúnnaa Waag Yíésu uushich yé gáá ˈdeeyká hí ali gáá kaayká.

²Yú ubaa gál nyaaram nyí hol af iđáállá warˈgatééllá it Kirísto iiy chie-, hí Galátia gaa iđóóllá ki hí ˈdu gáá veere.

³ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

⁴ˈJaa kúnnaa Waag hát he fedeká in Kirísto nyuogim ubaa ađaabanokúnno ˈdaalle hol ˈdú sillie, giri mu gáál yaalmit gaa nyakaridhe-, barallóóllá gaa ririanká.

⁵ˈDuuw taalle bííyyo hí hé Waaˈgiet onnow. Iiy-hí, he hí hát kinaallá yeet.

⁶ˈDaa giri tíkíˈdéél Waag hí ˈdaa ˈdúˈjím Kiristo kí viiyyééllá hí ká haađicha-, hí fayam éíy taaka-, Fayam Midhaballá muuninyká bala ˈdú nanniyyáállá, yáá tág hé kinaallá ye birgisie, he af ˈdabe.

⁷Fayam hí bala ˈdú nanniyya kinaallá hé fayam kátaká mán. Itín gálaato hí mé guuđanaya. Gál kinaallá Fayam Midhab Kiristóóllá he ˈdeđeneye, ˈdeemle af ˈdú fafaa.

⁸Har nyíín yíekaʼ, máá ˈgasso-, Waaˈgiet-, urruká yíekaʼ, máá hí fayam éíy taaka-, Fayam Midhab ke hí ki ˈdiyimééllá muuninyká hí ki ˈdiyeenka, máá kinaallá Waag hí điito.

⁹Har káána úba kis ke hí geeyka, geđi yú hí ká geeye, máá mákárta-, hí fayam éíy taaka-, Fayam Midhab hí kis iiy chíéllá muuninyká hí ki ˈdiyeenká, máá kinaallá Waag hí điito.

¹⁰Yú hatallá yegetallá in gálaato ger gaa memeyee? Ebá Waago geer gaa memeye? Yú meeny gálaat hí ye memeyoká hol gaa ˈgéˈgédhe? Híʼi, yú hátle meeny gálaat hí ye memeyoká hol gaa ˈgéˈgenka, yáá onnônyka gédéch Kiristo ma yégen.

¹¹Nyaaramchú, hééllá hí eiy nannasatoká yú fede. Fayam Midhab-, yú hí ki ˈdiiyimeká hé fayam gálaat hí hol af tág ki koyká muuniny.

¹²Fayamééllá hé máádhat hí ye ma ka shíiny, hí ye ma onisíiny. Fayam Midhaballá Yiesu Kirísto hí ye kí edhesie.

¹³Itín bár giri yú nyátál Yuuˈdi el gaa igireká it yaalmit yú seseme-, yáálle gál Kiristo súm maanyjasie-, gáál eiy fufumieká maalle.

¹⁴Bár kinaallá ˈdaa nyatalaam kínyaa Yuuˈdikáka yáá modo chia Yuuˈdiká gúch af yíé ˈdie, nyatalaam eshim eshimchú tág ki yiel.

¹⁵Tá hééllá met, yú hátle ˈjiechú geer gaa ijaʼ in Waag ye taak koote, ye ˈdúˈjímle ˈdaalle kí viiyye. Aalé aleđuđugul Waag hí feˈdeká ali kí ˈdiiyyeká

¹⁶in Waag ye Inyle kí edhesiche, giri yú mú fayamle gál gál Yuuˈdi muuninyká ki ˈdiyeenká. Waag ye Inyle kí edhesicheká, yáá máá níínní ˈdú sedhe-, heete-, ye he af gáá koyká mán.

¹⁷Yáá úba Yerúsalem ma síen, gál ye gál alb fimi-, met yieká af ma kí ˈdíiny, yú đo lés Arabia mé nie, đo geđi ˈjien ˈDamaskas hol ˈdu nadhe.

¹⁸Aalé warram seđ beeyyeká yú Yerúsalem sedhe, giri Kéfas[1] nyí hol oonootoká. Ál kinaallá kulich tomon tikiˈde a chenno nyí mú hol af yíéđiyye.

¹⁹Yáá gál éíy taaka-, alb fimi-, argeká mán. Yákob giri Máá Guđoká nyárléká tákáma nyí hol argiyye.

²⁰Hé yú hí ˈdu gáá verenóóllá hát hódho muuninyká hé Waag hí óg.

²¹Af kinaal el ˈdaal yú đo lés Siria ubaa lés Kilikia mé nie.

²²Yú dhúrchú gál Kiristo-, lés Yuuˈdiaká hé ye moonnoy.

²³Gaal ˈdeeny ˈdaa chia gálaat hí hol geđieká tákáma he mamale, giri kieye, Máá kis muun gáál maanyjasieká hé iiy yeen ke Kirísto iiy yie-, he eiy fufumieká hé ˈdiiyime, yegieká.

²⁴Gaal đo ˈdaachúka Waag meey.