Read daasanach Galátia 2 Bible Online

Galátia 2 - daasanach bible

Galátia 2

¹Aalé warram tomon tikiˈde a afur beeyyeká yú geđi Yerúsalem mé nie, Barnábas nyí hol eete, Títos úba yú eedhdhe.

²Sienyééllá Waago hí ye mé gaa kaayye. Yú ál kinaal ki ˈjieká gál Kirísto iiy yieká gállé gaalí gál méte ka dhaˈgasanká yú tól eedhdhe, yú Fayam Midhab Kiristóóllá hát yú gál gál Yuuˈdi muuninyká ki ˈdiiyimeká fayamle shie. Hééllá yú ekeyallá he ˈdaa giri hújích yú nie-, laatle hátle yú gaa ijo-, yú lađaanallá ma ˈdeđenen-, gaal hújích chiallá hát tagléká iiy yegetká.

³Tá Títos giri nyí hol ˈgayyeká har úba máá Hellen onnoyka, gaal hé mú hermisan ma ˈdú tíiny.[2]

⁴Tá gál mu hermisatká fedeká he gál điđám ka ˈdie-, muun gáál hurt ká hile-, gáál ka ˈdeey-, mé furit kúnnaa Yiesu Kiristo ki gaa ijóóllá ˈgas egew-, muun gáál nyatalaam Yuuˈdiká mé ki tatuoká.

⁵Tá gáál kár níínní nyí shiicheká mán, giri Fayam Midhab Kiristóóllá ˈduuwle taalle bííyyo itle hí ki iđaká.

⁶Gál Kiristo gállé gaalí gál méte ka dhaˈgame kinaallá hé ˈdéé hót níínní ˈdéé hót chiallá af ˈdú kaayká mán. ˈDaachúka, gálaat kansím ˈgaa yíekaʼ, kansím mán yíekaʼ, yúka hé kátaká mán, ˈdaa giri Waag gálaat ˈdug ma gáá dhaˈgaminyká.

⁷Gaal ˈdéé hótchú ˈdéé hót af ma ˈdú káanyallá, gaal hát Waag ye gál gál Yuuˈdi muuniny-, ma hermisanallá Fayam Midhaballá ki ˈdiiyiminyle mé ki koyye-, ubaa Waag hát Bétiro gál Yuuˈdi Fayam Midhaballá ki ˈdiiyiminyle mé ki koyyeká he arge.

⁸Waag Bétiro hujich ki naasate-, mú gál Yuuˈdi ali ˈdú kaayyeká in úba hát ye hujich ki naasate-, ye gál gál Yuuˈdi muuninyká ali ˈdú kaayyeká gaalí kimite.

⁹Yákob, Kéfas, ubaa Yuána giri gál Kiristo hí gállé méte ka dhaˈgasanká Waag hát ye ˈdúˈjímle ka shiicheká kimiteká, đo yú ubaa Barnábas nyí gil ger gaa ˈgiiliˈgay, giri nyiin nyí gál gál Yuuˈdi muuninyká ki ˈdiyeenne-, gaal íín gál Yuuˈdi ki ˈdiyeenká.

¹⁰Hé gaalí nyí heete-, nyí ekemeychoká he tikiˈd tákáma, giri gál he maamanká taalle nyí ˈdú ˈjeˈjeenneká. Tá hát gon yú súm fedeká hé kinaallá.

¹¹Af giri Kéfas[3] Ántiok ki ˈjie-, gaa ijeká, yáá mu héllé ˈdeeđeneyká mú ˈdú huogodhe.

¹²Hééllá he ˈdaa giri mu erkob hátle gál Yákob bííyle ma gáá fáminyká gál gál Yuuˈdi muuninyká hol ˈgar golmote-, tá gál kinaal ka fameká mu gál gál Yuuˈdi muuninyká gaa ˈgiteká. Mu gáál gaa ˈgitééllá, gál gálaat hermisan mé ki tatuo-, ka fame kinaallá hí ˈdeem verenoká he kikiadhe.[4]

¹³Gál Yuuˈdíítí Kéfas yaalmitlé tagle muuniny gaa seseme kinaal ennie, Barnábas úba gáál yaalmitlé kinaal ennie.

¹⁴Aalé gaal Fayam Midhab Kiristóóllá ˈduuwle el má gaa igiro yú argeká in gáál lulle metle yú Kéfas hatal gaa geey, yú kieye, Kúún he máá Yuuˈdi, kor yietééllá kó máá Yuuˈdi ma ká iđiny. Tá háteka gál gál Yuuˈdi muuninyká nyátál Yuuˈdi-, kuuní gíl sug ki haycheká mé ki tatiyya?

¹⁵Múúni ki gál Yuuˈdi honyir-, ke gál kidhdho-, hemuumurit Waaˈgiet el ma gaa igirinyatíá muuninyallá

¹⁶hé ki onnodheká hééllá: Máádhat hemuumurít el gaa igiritle hé mú innum Waaˈgiet mú máá ˈdúwaká ma gaa hođiny. Máádhat Yiesu Kirísto iiy yieka in tákáma innum Waaˈgiet máá ˈdúwaká gaa yegedhe. Muun úba hé ke Yiesu Kirísto iiy yie, giri Waag innumle ˈdaa iiy yeen kúnnaa ke Kirísto iiy ki yiekáka ke gál ˈdúwaká gaa yegetká. Hemuumurít el gaa igiritle hé muun gáál gál ˈdúwaká ma hođiny. Hééllá he ˈdaa giri hemuumurít el gaa igiritle ˈdaalleka Waag máá níínní máá ˈdúwaká chegetoká mánká.

¹⁷Múúni ke Kirísto ˈdaalleka innum Waaˈgietka ke gál ˈdúwaká yegetká fedóóllá, ke yaalmit kinaallá seseenka, gál Yuuˈdi álká muun gál ađaabano ˈguo-, hemuumurít el ma gaa igirinyká he gáál ká dhaˈgama. Tá hé kinaal Kirísto gálaato ađaabano mé ki kokoo yegedhe? Híʼi. Hé hát kinaallá muuniny.

¹⁸Tá hemuumurít el gaa igiritle he onisinylé kis yú eiy fufueká geđi yú hol ˈdú nannaatka, yú gon af kinaalka máá ađááb ˈguoká.[5]

¹⁹Hemuumurít ˈdaalleka yáá hemuumurít gim yíé gaa ˈdie, giri yú Waag ˈdaalle ki yaalká.

²⁰Aaléka, hát Kirísto ˈgór đarám yaalká ˈdú kufééllá in yíéđiny chia kis yú ki ijeká úba kuyye. Luolmit káána yú ˈgúóllá hé luolmitchú muuniny, he Kirísto luolmitlé ye gaa iđa. Luolmit yú ˈgúóllá iiy yeen chia-, yáálle Iny Waaˈgiet ye giel-, ye hol ˈdu gáá sillie-, yú iiy yieká ˈdaallé ki taalla.

²¹Yáá gielmit Waag hí muun gáál ka ˈgayyoká ma egesheny. Gálaat hemuumurít el gaa igiritle hí saas ˈdaˈdabsînyka, af kinaalka Kirísto hállééllá he kufe, yú Bétiro yie.