Read daasanach Galátia 4 Bible Online

Galátia 4 - daasanach bible

Galátia 4

¹Hé yú hogodhóóllá he kieye, gál aˈjibaat idhaamle lulle lé-, kor hátle ma guguđánanká, gál kinaallá hát géde.

²Hééllá he ˈdaa giri iny hátle gál ˈjaalle hí ki kieˈde-, hí ˈdeˈdeenká ubaa hí aany ki chichiratká gil ger gaa ijoká. Iny hé aany ma higiliny, ˈdaab aleđuđugul ˈjaalle hí mureká ali ma kí ˈdíinyká.

³Múún úba hát tikiˈdééllá ke ije, af giri ke Kirísto moonnoyká muun hát ke um nigini-, nyatalaam lesalloká hí gedelle hoteká.

⁴Tá Waag aleđuđugullé feˈdeká ali kí ˈdiiyyeká, in Waag Inyle ali gáá kaayye, ini hí ˈdalle, hemuumurít gim gáá ˈdalidhe,

⁵giri gál hemuumurít gim gaa ijoká yé ká ˈdeđisat-, Waag muun gáál umle hođisatoká.

⁶ˈDaa giri itín hí um Waaˈgiet chieká in Waag Hím Naasan Inyle hí ali ˈdu gáá kaayye. Hím Naasan gáál ger gaa iđo kinaallá, Ába,[15] Baabá, Waag chegedhe.

⁷Aalé káána kó Yíésu iiy chíéllá, kó geđi gedech muuniny, kó veel Waaˈgiet chie. Kuun in veel Waaˈgiet háluke, he lullé Waag hí umle shigichoká háte ma aargiriny?

⁸Itín af giri hí Waag moonnoyyeká hé gálaat hí waagam yegetká hí gedelle onnoyye.

⁹Aalé káána it Waag óg. Hé kinaallá a mé ˈdaatí Waag hé hí óg. Tá háteka geđi nyatalaam ˈdúúw mán-, hí ađaabanokícho ma gaa egenyallá hí bala ˈdú niiyyéel? Nyatalaaméél geđi hí gedelle chegetoká hí féˈde?

¹⁰Itín har ˈjila gál Yuuˈdi hí ram ubaa hí ˈguiyam, tá hí warram gaa nannasatká har hí nannasataa!

¹¹ˈDaa kíchoka geer hé tág ye gaa ˈdeenedhe. Yú ta hállééllo hí ˈdú laađame?

¹²Nyaaramchú, gillo yú hí ki efe, ˈdaa giri yú hát itín yíéllá yaalmit chia yáálle nyatalaam Yuuˈdi gim gaa láállá ka ennée. It hé hí ye ki ˈdeeneycheká mán.

¹³Ebá táb ˈdodhdhíe, af giri yú hí Fayam Midhab Kiristóóllá er ki ˈdiiyimeká yáá báásh ˈgieká muunîny?

¹⁴Har básh chia kinaal úba hí ílsh ˈdú iđieka, it ye ma eeshêny, ye il bís ma ki dháany. Itín yú hát máá ˈgasso-, Waaˈgiet-, urruká, muuninyka, hát Yiesu Kirísto tuuˈdle gaalí mé guđáan yegetká úba hát kinaallá hí ye mé guđáan chie.

¹⁵Aaléka, geer gaa meenkícho ále siete? Af giri ke hol ˈgieká yáá gon óg, máádhat héle hol in gáá babîny-, in máá eiy shigînyka, it onnônyká ye in kí biiyye.

¹⁶Hé ˈdúwa-, yú hí geđúóllo ye kídhíchkícho hôy?

¹⁷Gál hí nyatalaam Yuuˈdi mé ki tatúóllá hé tág hí ˈdú ˈgađasan. Tá gáál ˈgatle hé ma midhanany. Gaal hát he fedoká itín ubaa nyíín gáál hol eiy gaa ˈgiˈgidhuo-, itín hí gáál ˈdaalle ˈdú ˈdaraannoká he fede.

¹⁸Tá hé midhabká ˈdaalle ke ˈdú ˈgađasanka hé midhab. ˈGat kinaallá af giri yú ke hol af ijoká tákámle haí ˈgađáminy, aadh lulle hé midhabká ˈgatle ˈgaađamíe.

¹⁹Umchú, geer kúl ˈdaakíchoka yú geđi ˈgúóllá hát geer kul min ˈdaˈdalloká verennoká. Itín hí hát Kirísto chegetoká yú fede.

²⁰ˈDaakíchoka, yáá tág me ye guđandhe. Yú káána ke hol af yíéđian-, yú hí ere sáaká ki geđuoká fede.

²¹Ebá, it giri hí hemuumurít gim gaa iđaká feˈdoká ye ka geeyyíe, hemuumurít hát chegetoká it múog?

²²Warˈgat Waaˈgiet Abirááyam hát nyígéény naam ˈdaleká hé hote. Íny tikiˈd ˈjielle gededhe, inyáátí ˈjielle mú minlé sillaká.

²³Abirááyam inylé min gededheká hí ˈdalleká hát aađaká he ˈdalidhe, tá mú inylé min sillaká hí ˈdalleká íín ˈdaa he af iđiny Waaˈgieto ki ˈdalidhe.[16]

²⁴ˈDeg naamáállá he hol ki ekeny ˈdaallé ke ki egedhdhe. ˈDegééllá hát he hol af iđiny naama-, Waag hí gálaat af iđicheká. Hágar giri gededhe-, géde ˈdaˈdalleká he hát he hol af iđiny hemuumuriti-, Waag hí gál Yisirayel Gúm Sanai gáá shiicheká.

²⁵Hágar úba he hát Gúm Sanai giri lés Arabia gaa yaalká. Hágar ubaa umlé géde-, gálaat hí he ki mumureká he hát ˈjien Yerusalem-, gálle hemuumurít gim gaa ijóóllá.

²⁶Sáára íín he hát ˈjien Yerusalem urru-, gálle hemuumurít gim gaa láká. Muun ke ˈjien kinaallá umlé.

²⁷Warˈgat Waaˈgiet hé hoteká kieye, Min ˈdal mánnallo, geer hí ko gaa meet! Kó geer veeliet ko ma vereninyallo, ˈgéyig, af gaa guđoká ki ˈdâsh! Kó beel ko hayallo, umkú um min bélkú ˈgayyoká hai ˈdú buurnaa, he chie. [17]

²⁸Nyaaramchú, hát Yísak he iny he af iđinyallá, itín káána úba ˈdaa ˈdúˈjím Waag hí Abirááyam af iđichekáka hí um Waaˈgiet.

²⁹Bár Abiraayam kinaallá in iny hát aađaká ka ˈdalidheká, iny fargogint Hím Naasan Waaˈgiet kí ˈdalidheká maanyjasie. Yaalmitkícho káána úba hát kinaallá he taalla, giri gál hí hemuumurít mé ki tatuoká hí maanyjasuoká.

³⁰Tá Warˈgat Waaˈgiet háte he chie? Warˈgat Waaˈgiet kieye, Min gededheká ubaa inyle ali gaa árig, min gededheká inyle ubaa min sillaká inyle gon hé aˈjibáát hol ma ki lilenyo, he chie.[18]

³¹Aaléka, nyaaramchú, muun hé ke um min gededheká muuniny, muun ke min gededhe-, muuninyká umlé.[19]