Read daasanach Galátia 6 Bible Online

Galátia 6 - daasanach bible

Galátia 6

¹Nyaaramchú, har itín máádhat ađááb hileka, it giri hí Hím Naasan Waaˈgiet ki hirayyeká máá kinaallá hát abuntiká hol ka naatíe. Tá dhúrkícho hol ˈdeeˈdemíe, haí ađaab kinaal úba híliny.

²Hol ílsh ˈdú chiichiˈdíe, hí hatallá ˈdiiyyeka, in hí hemurit Kiristo đuusicha.

³Máá taawuo-, kieye, yaa ˈdúwa, yeget-, kor máá káta-, mánká, hollo hol nyimite.

⁴Máádhat hí hújíchle hát ˈdabaanká naannuo. Hát kinaallá in mu geerle ki geyyime, mu yaalmitle yaalmit máá eiy ma ki ekemeny,

⁵ˈdaa giri máádhat dhúrle hújíchle ilshle uroká.

⁶Máádhat gálaat ˈdeeny Waaˈgiet oonisuoka, gál muí he oonisuo kinaallá hí mú símísle hol ˈdú naannuo, gaal héllé ˈdabaan-, ˈguoká lulle ha muí gaa ˈdábiny.

⁷Máádhat hai hol nyimísan, Waag egeshêny, Waag hé máá níínní hí af kar gaa ˈdaraanká mán. Máádhat héllé fafuoká in aargira.

⁸Máá balt gónlé gaa nyakaridheká el gaa igiroká, kúfach hai aargira. Tá máá Hím Naasan Waaˈgiet el gaa igiroká íín luolmit biiyoká hai aargira.

⁹Hé midhab-, ki ekemeyoká hai gáál ˈgorosîny. Muun ki ma ginnanyka, hé midhab kinaal héllé hí yé gáá ˈdeˈdeenká aleđuđugulle ali kí ˈdiiyyeka ha ki aargira.

¹⁰Aaléka, har taalle ki hát ˈguoka, gálaat lulle kí hé midhabká ki eekemeyo, tá súm nyaaram kúnnaa Kiristoká kí ˈdú ˈjeeˈjeen.

¹¹Ebá, he veerit guguđo-, yú gílchú kí vereno-, yú hí ˈdu gáá verenóóllá dhaayyíe.

¹²Gál hol ˈdug gáá dhaˈgasan-, hol gál ˈduuˈdúwaká hođúóllá he gál hí hermisan mé ki tatúóllá. Gaal hí hermisan mé ki tatúóllá, he ˈdaa giri gaal he onisiny ˈdaa Kiristo máálle ˈgór đarám yaalká ˈdú kufeká tákámle ˈdiyeenka gáál gaalí maanyjasuoká.

¹³Gaal ííni hermitééllá hé hemuumurít lulle el ma gaa igiriny, kor gaal itín gaal hí heermisuo-, hermisan kíchia kinaal hol bal ki ˈdaraanká he fede.

¹⁴Tá hé yú hol bal ki ˈdaraanká tikiˈd tákáma, hé kinaallá he Máá kúnnaa Guđo Yiesu Kirísto ˈgórlé đarám yaalká. ˈGór đarám yaal kinaallá ˈdaalleka yáá lésallá gaa ˈgite, les íín hé ye gaa ˈgisate.

¹⁵Máádhat hermíte yíekaʼ, má hermisan yíekaʼ, hé naamáállá hé máádhat innum Waaˈgiet máá ˈdúwaká ma gaa hođiny. Hé ˈdúwaká he máádhat geđi Waag hí káána kí hođichoká.

¹⁶Aalé gál he onisinyééllá el gaa igiroká ubaa gál Yisirayel Waaˈgietká[21] Waag hí naanná shiigicho, hí geer guurá aargisicho.

¹⁷Aalé, ˈdaa giri fayam Yiesu yú ˈdiiyime-, gadyamle yú ˈgúólláka, máádhat geđi ha ye shalal fíiny.

¹⁸Nyaaramchú, Máá kúnnaa Guđo Yiesu Kirísto ˈdúˈjímle hí gaa yíéđiyyo. Iiy-hí, he hí hát kinaallá yeet.