Read daasanach Eféso 2 Bible Online

Eféso 2 - daasanach bible

Eféso 2

¹Itín érlé-, hí Waag af đuˈdute-, hí ađaabano gaa seseenneká bár kinaalláka hí gál kufachiet.

²Af giri hí hé ˈdeđew-, lesalloká gaa seseenneká, it af đuˈdusiny ubaa ađaabano kinaallá gaa iđe. It úba aryáán máállé guđo-, aryáán bííyle kansimle ˈguoká ˈdeenyle el gaa veeˈde. Máá kinaallá ííni gál Waag af đuˈdusanká he gaa mumura.

³Múún lulkúnno érléká yaalmit tikiˈde gal kinaallóóllá ke ki ije, giri gónkúnno baltle ki geymisie-, he feditle ubaa kasle ki el gaa igireká. Hát tikiˈde Waag gál hí af đuˈdusanká ˈdú iiđidhanno-, gáál bár ˈdaatika he il ka aargisichóóllá, hé úba érléká idhokúnno ˈgayye.

⁴Tá Waag geer guuralle hé tág guđo, Waag hé tág muun gáál giel.

⁵Af giri hátle ađaabanokúnno ˈdugaka ki gál kufachiet onnoyká, Waag hé muun gáál Kirísto hol ˈgar loolnoyche. Aaléka, itín ˈdúˈjím Waaˈgieto hí ki biiyye.

⁶Aalé Waag hé múún gáál Kirísto ˈdú fiiyye, gáál Kirísto hol uushich ˈgar yé ká ˈdeeyche, gáál úratí Yiesu Kirísto hol af iđiche.

⁷Hééllá Waag hí ekeychééllá, he giri bár ˈdaatika, Waag ˈdúˈjímle hát ˈdúˈjím lulle af mé iđoká gálaat aargisichoká. Múúni ki Kirísto hol liladhééllá Waag hát gáál ki midhabká gálaat hí argeka, Waag ˈdúˈjímlé ˈdúwáállá gálaat haí kiimita.

⁸Itín meka ˈdúˈjím Waaˈgieto hí ki biiyye. ˈDúˈjím hí argiyyééllá he ˈdaa giri hí Yiesu Kirísto iiy chieká. Hééllá hé ˈdaakícho yé ma gáá ˈdíiny, Waago hí ká shiiche,

⁹hé máádhát hí ki laađame-, muí hol ki memeyoká muuniny.

¹⁰Múún ke hé lilammo-, Waag hí tág koyyeká. Waag múún gáál gál Kiristo hoycheká, in muun hújích midhab-, Waag hí kíssóótí gáál met tág koyyeká ki nannaa.

¹¹It halúg gál gál Yuuˈdi muuninyká hí ˈdalóóllá, gál Yuuˈdi hol gál hermisatká yegetallá itín gál ma hermisanká hí yegedhe. Hermisan yú hogodhóóllá he hermisan gálle gaalí tudaam gaa mumuroká. Aaléka, onnóo! Itín érléká it Kirísto hol ma lilêny, it úba gál hí gál Yuuˈdi yegieká mán. Af iđiny Waag hí gálle af iđicheká it úba gaa lalayye. Lésallá hí gaa iđe, kor it Waag moonnoyye, it úba hé midhab hí táb ˈdoˈdoote-, hí met egeteká mán.

¹³Aalé káána, ˈdaa giri Waag hí Yiesu Kirísto ˈdú fiiyyeká, it érléká Waag gaa faganayyeká, it fás Kiristo hí Waag kí ˈjobonoy.

¹⁴Yiesu Kirísto íín he máá kúnnaa shimitiká. Mu hé gál Yuuˈdi ubaa it gál Yuuˈdi muuninyallá hí hol fie, hí tikiˈd hoy. Gál met hí naamáállá nebitlé hol nebeneey-, hát đírka, gáál toom gaa tielká hé Yíésu hí eiy fufue.

¹⁵Mu hé hemuumurít ubaa nyatalaam gál Yuuˈdi-, gáál hol nebesicheká kúfáchle úba ali ki koy. Mu hééllá ekeyallá, he giri gál met hí naama-, hol ka kídh onnoyká mú ˈdaalleka, hol ˈdú fafaan-, gaal tikiˈd yegetká. Mu hatallá in gáál hol shimít ki mure.

¹⁶Mú kúfáchlé muí ˈgór đarám yaalká ˈdú kufe kinaallá ˈdaalleka in gón tikiˈde-, gálle met hí naama-, hol ka kídh onnoyká muí Waag hol ˈdu gáá nie, nebitle muí mé ˈgidhie.

¹⁷Mu hé ká yimie, it gál Yuuˈdi muuniny-, Waag gaa faganayyeká ubaa nyííni nyí gál Yuuˈdi-, nyí Waag kí ˈjobonoyyeká gáál Fayam Midhab-, naannaká ki ˈdiiyime.

¹⁸Aalé ˈdaa Kiristoka, múún met hullaakúnno Hím Naasan Waaˈgiet tikiˈdééllá ki ˈJaa kúnnaa Waag met ki seseenká hé ki uro.

¹⁹Aalé itín káánaka, it gál eiy ubaa gál gálkínyo muuninyká muuniny, it gál Waaˈgiet hol ˈdú faanne, hí gál ˈbíl geer Waaˈgiet chie.

²⁰ˈBíl geer Waaˈgietallá gál Waag hí ˈdéé ká shigicheká ubaa gál alb fimiká Waag hí ˈdug gaa ˈdite, Yiesu Kirísto íín he ˈbíl áár.

²¹Máá Guđo Yíésu lééllá ˈdugaka in ˈbíl me hí hol ki yaalla, ˈbil seeme, ˈbil ˈbíl mu hí taak koy-, mu hílléká yeedhe.

²²Waag it gál Yuuˈdi muuniny-, hí Kirísto iiy chíéllá ubaa gálle hollo hí hol fafiyya, giri itín hí ˈbíl mu hí Hím Naasanle ki ijoká chegetoká.