Read daasanach Eféso 3 Bible Online

Eféso 3 - daasanach bible

Eféso 3

¹Yáá Báulo lééllá ˈdaa giri Yiesu Kirísto hujich ki nannuo-, mú Fayamlé Midhaballá it hí gál Yuuˈdi muuninyallá ˈdú gáá sidhééllá in káána yú hiigin gaa ija.

²Waag hát giri ye hújíchallá ká shiiche-, mú ˈdúˈjímle fayamle yú hí ki ˈdiyeenká, it buot maalle.

³Hé kinaallá he hé geer geđi-, Waaˈgiet-, kasle Waag hí ye kí edhesicheká, in yú hí ˈdéé hót mé gáá gaawallá ˈdu gáá verene.

⁴ˈDeeny yú ka verenóóllá hí tuoycheka, Waag ˈdeenylé geer geđi-, Kiristóóllá hát yú ógká haí kiimisata.

⁵ˈDeeny geer geđi-, Waaˈgietallá kíssóótí hé Waag hí gálaat ma kí edhesîny. Tá káánaka, Hím Naasan Waaˈgiet ˈdaalleka, hé Waag hí gállé alb fimi-, ubaa gállé ˈdeem ka shigiche-, taak koyyeká kí edhesiche.

⁶Hé geer geđi-, Waaˈgietallá hééllá: ˈDaa Fayam Midhab Kiristóólláka, gál gál Yuuˈdi muuninyká hát gál Yuuˈdi hí aˈjibaat Waaˈgiet aargiróóllá íín úba hai aargira. Gálallá met hullaalle he gon tikiˈde, ˈdaa Kiristoka, he af iđiny Waaˈgiet úba ˈgarro hol aargira.

⁷ˈDúˈjím ubaa fargogint Waag hí ye shiicheká in ye máá Fayam Midhaballá hol gaa sisidhoká hoyche.

⁸Har káána gál Waaˈgiet biiy elloká lulle máállé hí el ˈdaˈdká yú kátaka, Waag hé ye ˈdú ˈjiiyye, giri gál gál Yuuˈdi muuninyká yú ˈdú ˈgúúnnúmíny ˈdú ˈguunnuminy lulle af mé ˈdú gíriká gál Kirísto hol liiletká hí aargiroká yú ki ˈdiyeenká.

⁹Waag úba hé ye ˈdú ˈjiiyye, giri ˈdeenylé geer geđiká hát he ˈduuwawká yú gálaat eiy ki nannuoká. ˈDeeny kinaallá Waag ameeny he met lulle ka kuonneká hé hí geerle ká ˈgayye.

¹⁰Waag kasleka, ˈdaalimle hátlé met hí hol ká eiyyeká kansimano lullé urietká hí kiimisatká he feˈde. Aalé káána, gál uriet-, kansimano ˈgúóllá, ˈdaa gál Kiristoka, Waag ˈdaalimlé kinaal hai kiimita.

¹¹Waag hátlé les ma ka kúóninyká, hé hééllá mé ká ˈgayye, in đo muí Máá kúnnaa Guđo Yiesu Kirísto gáá ˈduwasie.

¹²Múúni giri ke Kirísto hol liledhe-, ki mú iiy yieká, hát ke bineneny ubaa ki naan mán-, ki Waag met ki ˈdeˈdeenká hé ke uro.

¹³Aaléka, gillo yú hí ki efe, manyjany chia yú hí ˈdú maanyjawallá haí gúóf gaa galîny. Manyjanychú hé hí ki midhab-, hí ger gaa memesuoká hí yé gáá ˈdeˈdeme.

¹⁴ˈDeeny kinaallá ˈdugaka, yáá ˈJaa kúnnaa Waag met les kurram gaa ˈdaraan, hí mú kí vivisat.

¹⁵ˈJaa kúnnaallá he máá gál úr gaa ijoká ubaa gál les gaa ijoká lulle yaalmit baabá hí yaalká aargisuoká.

¹⁶Hé yú hí Waag kí rogononká, he giri Waag hí kamurlé uriet-, ˈdúwaká ˈdaalleka, hí fargogintle shigicho-, tá mú Hím Naasanle hodhinaamkícho far googonoychoká.

¹⁷Yáá úba hí Waag kí rogonon, giri Kirísto ˈdaa iiy yeenkíchoka, gerkícho gaa yíéđianká. Héétí gielmit hí Waag ubaa gálaat ka ˈgayyaká hí hidh ki aruanna-,

¹⁸ubaa gál Kiristo lulle hí fargogínt aargiˈda-, hí gielmit Kiristo af mé mánnallá kiimisatoká.

¹⁹Yáá úba Waag vivisat, giri gielmit kás lulle af mé iđóóllá gónkícho hí oonoot-, Waag hí Hím Naasanle koch ki hođichoká.

²⁰Aaléka, kí Waag meeyo. Waag fargogintlé gáál hujich gaa nanniyyóóllá ˈdugaka, héllé ekemeycho-, uˈdoká, hé hé ki taawuoká, muuninyka, ki mú rogononká lulle úba súm af mé ˈdú gíri.

²¹Múúni ke mú gállé-, mu gáál Yiesu Kirísto ˈdú fíéllá taalle bííyyó biiyo kí Waag meemeyo. Iiy-hí, he hí hát kinaallá yeet.