Read daasanach Eféso 5 Bible Online

Eféso 5 - daasanach bible

Eféso 5

¹Aaléka, it um Waaˈgiet-, Waag hí gielallá, Waag húgúmle ennée.

²Hát Kirísto múún gáál giel-, gáál sídhle ˈdú sillie-, hol suor hoy-, suor kinaal hé shiicho ussaká Waag ki hoyká, itín úba gielmit hatallóóllá ˈgáa.

³Herginy gorramká[4] ubaa babát, tá gajált haí ˈgíiny, hemitle hé níínni úba haí yé gáá ˈdíiny, ˈdaa giri hé hatallóóllá gál Waag hí waarateká yaalmitle muuninyká.

⁴Héétí haí ˈdeem đeemoká hógon, ádúm kern mantiká ubaa ˈdéé hót kern manti-, gálle af ka húrt mánká haí ˈgíiny. Yaalmitééllá hé tagle muuniny, Waag gielmít hol ˈdú niiny tákáma ˈdúwa.

⁵Hééllá hát ˈduuwawká onnóo: Máá herginy gorramká ubaa babát gaa seseenká, tá máá gajált ˈguoká, hé Kirísto ubaa Waag guchle aˈjibáát ma gaa aargiriny. Máá hé ˈdeđewallá gaa seseenká he waaglé hote.

⁶ˈDaa giri Waag gál hí af đuˈduse-, hé ˈdeđew kinaal gaa seseenká ˈdú idhanne-, gáál he il ká aargisichoká, máádhat haí ˈdeem nyag maamanká ki nyiimísan.

⁷Aaléka, gál hat kinaallóóllá haí hol ˈdôny.

⁸Itín kíssóótí bííy gaa dhátká hí gaa iđe, káána ˈdaa giri hí Máá kúnnaa Guđoká hol lileteká it hí mú édhúmle argiyye. Édhúm kinaallá gaa yíéđía.

⁹Édhum saanolle he midhánti, saas mánti, tá ˈduwánti.

¹⁰Hé Máá kúnnaa Guđoká geer gaa memeyoká hol gaa ˈgeeˈgedhée, eekemeyyíe.

¹¹He ekeny nyag mán-, gálle bííy gaa dhátká gaa seseenká hol gáá faganayyíe, hé ˈdeđew kinaal ka edhesía.

¹²Gál Waag af đuˈduseká, héllé shuoliti-, ekemesetká, ki hol geđuoka, kern hai gáál ˈgiˈgidha.

¹³Tá he lullé edhum hí gaa verenoká đo hai ká edhdhey, yaalmitle ha ki kimite,

¹⁴ˈdaa giri edhum íín he lulle ka eedhesuoká. Yaalmitééllá ˈdugaka in gálaat kieye, Kó rafanannóóllo, in eiy ˈdéesh, kúfach yé gáá ˈdé, Kirísto édhúmle hí ko gaa veero, gaalí yegedhe.

¹⁵Tá aaléka, nog sedhíe, haí gál đéeská chéen, ˈdaalím ˈgáa.

¹⁶ˈDaa giri yietéél gálaat hé ˈdeđewká gaa seseenká, biiy hátlé ka bibiˈdoká aadh ˈgas lulle hé midhabká gaa eekemeyyíe.

¹⁷Aaléka, haí đées chéen, Máá kúnnaa Guđoká hé hí gaa fedo-, hí ekemeychoká hol gaa ˈgeeˈgedhée, eekemeyyíe.

¹⁸Bersh haí fafáminy, bersh hí faanneka, bersh gál hol ma momonyká haí hođicha. Kalat Hím Naasan Waaˈgiet hí koch cheet.

¹⁹Arram Warˈgat Waaˈgiet gaa ijoká ubaa arram káána hí Waag ki ˈdoyyeká hol ki guogofsía. Máá kúnnaa Guđoká arram hí ki memeychoká gerkícho ki ˈdaaramíe.

²⁰He lúl ˈdugaka, Máá kúnnaa Guđo Yiesu Kirísto meenyle ˈdaalle ˈJaa kúnnaa Waag ki vivitíe, mú aadh lúl gielmít hol ˈdú naannáa.

²¹ˈDaa giri Kirísto he Máá kíchia kíátoká hol met gaa keekemíe.

²²ˈDége, hát tikiˈde hí Máá kúnnaa Guđoká met gaa kekeennóóllá, beelemkícho úba met gaa keekemíe.

²³Kirísto gálle he mú gónlé. Ííni gáál mé, ubaa gáál Rúbáchlé. Hát tikiˈdééllá in min bélle hí mé ki yaalla.

²⁴Hát káána gál Kiristo-, Kirísto met gaa kekeenallá, ˈdég úba hí hát lulle beelemle met gaa keekeen.

²⁵Gál yaab, hát káána Kirísto gálle giel-, sídhle gáál ˈdú sillíéllá, itín úba hát tikiˈdééllá ˈdeg kícho geelnedhíe.

²⁶Kirísto sídhle gáál ˈdú sillíéllá he giri mu gálle ˈjiˈjio-, gáál ˈdeeny Waaˈgiet ki dhiiro-, gáál saas gaa egewká.

²⁷Héétí mu gálle saas ubaa ˈdeensen-, tá he lullé hat kinaalloká ˈdaabo-, gaal ˈduuwaw-, mu gáál egeetká.

²⁸Hát tikiˈdééllá gál yaab hát dhúrle hol gielallá hí ˈdegle úba geelnew. Máádhat he minle gielnítaka, hé dhúrle úba hol giel.

²⁹Hé ˈduwa, hé máá níínní gónle nébká mán. Máádhat gónlé he golmia, ootolo. Hát tikiˈdééllá in Kirísto hí múúni ke mú gállééllá gáál ki ootolo,

³⁰ˈdaa giri muun áwúlkúnno ki mú gónléká.

³¹ˈDaa kinaallá ˈdugaka in mááyab ˈjaalle ubaa ˈjielle haađia, mu ubaa minle hol chiiˈda, gaal hullaalle gon tikiˈd yeedhe.[5]

³²Hééllá he onisiny ki af ˈdaˈdaboká, tá yú Kirísto ubaa gálle héllé hogodho.

³³Aaléka, it yaabká, máádhat hát dhúrle hol gielallá hí minle úba geelnet, tá min úba hí bélle kiikiat.