Read daasanach Eféso 6 Bible Online

Eféso 6 - daasanach bible

Eféso 6

¹Ummo, ˈdaa giri Máá kúnnaa Guđoká hílléká, gál hí ˈdaleká af ˈduuwasía. Hé ˈdúwa-, hí ekemeychoká hé kinaallá.

²Hemuumurit Waaˈgiet hemuritlé he af iđiny ˈgayyo-, erkobká hééllá: ˈJaakú ubaa ˈjiekú kiikíaw.

³Hééllá el gaa veeˈdeka, Waag hai ko ˈdú ˈgunnuanna, yíéđiny mé ˈdérká les ˈdug ha ˈdú yíéđianna.[6]

⁴Idhaam, haí umkícho iidhansîny, um he onisiny Máá kúnnaa Guđoká oonisía, af ki taatáa, um hí he onisiny kinaallá kí guguđanat.

⁵Géde, hát hí Kirísto af ˈduuwasicháállá, gál kíchia lesallo-, híllé-, hí he gaa mumuroká, hát ˈduwantiká af ˈduuwasía, kiikiadhíe.

⁶Géde ˈbaal, af giri gállé hílléká alb ˈgieká tákáma in hujich hát ˈdabaanká nannaa, giri gaalí memeyoká. Tá ˈdaa giri itín hí gede Kiristoká haí hát gaal íín chéen, aadh lulle hujichaamkícho ger midhabká ki naannáa. Waag hát feˈdoká hé kinaallá.

⁷Hát he uritiká, hújíchkícho naannáa. Hujich hí nanniyyoká, haí hújích hí gálaat ki nanniyyoká ka éen. Hujich nímle hát hújích hí Máá kúnnaa Guđoká ki nanniyyoká ka eedhdhíe,

⁸ˈdaa giri gedech yíekaʼ, máá aađaká yíekaʼ, héllé midhab-, ekemeyoká Máá kúnnaa Guđoká hí he gaa shiguoká, hí ógká.

⁹It gédellé-, géde he gaa mumuˈdáállo, gedekícho hát midhabká úba ki sedhíe, haí gáál nenesîny. Hééllá mé ka ˈgáa, Máá géde ubaa itín híllé-, met hullaakícho hí he gaa mumuroká hé úr gaa ijo. Máá kinaallá hé gálaat hol eiy ma gaa nanniny.

¹⁰Aaléka, ˈdéé hót chia biiy el ˈdaˈdká hééllá: ˈDaa giri itín Máá kúnnaa Guđoká hílléká, mú fargogintlé fargogiyyóóllá far ki googóo.

¹¹He lullé Waag hí shiiche-, hí máá gáál ka kidhich-, Sátanléká hol kí ririataká shuunníe, fadhdhíe.

¹²Ooskúnno hé oos ke gálaat hol yegeská muuniny, he oos ke kansimano aryaan-, bííy urietká ubaa bííy lesallo-, gaa ongʼoˈde-, gálle édhúm Waaˈgiet ma árginyká mé ki ˈgiiyyo-, hátlé met hí hol ká eiyyeká ke hol kí ririatká.

¹³Aaléka, he lullé Waag hí shiiche-, hí hol kí ririataká shuunníe, fadhdhíe, giri bár hé hí ki ˈdeđewká alb kí ˈdeeˈdemeka, hí taalle lađaanna-, hí el ma ki sorominyká.

¹⁴Aaléka, tág ˈdée! ˈDeeny ˈdúwa-, Waaˈgietká hát ˈdabaanká chiˈdíe, ki kuongʼoˈdíe. Hí hát kinaallá ˈdiiyyeka, in hí hát yuoy saawle seg hisate-, tagonolle ˈgiiyyoká cheedhe. Hé ˈdúwaká eekemeyyíe. Hát káána yuoy héllé balo gaa higisatoká hí ririannallá in he ekeny ˈdúwa kinaallá úba hí ririanna.

¹⁵Koiy kíchia guogoká fadhdhíe, giri hí tagano ˈgiiyyoká. Koiyééllá he Fayam Midhab hí naanná shieká.

¹⁶Héétí, iiy yeen kíchia hí Yiesu Kirísto iiy chieká, tág chiˈdíe. Iiy yeen kinaallá he hát raat kíchia hí in gaa taal-, silo máá saas hí gáá kokoonno-, Sátanléká, hí ka lalaan-, boloonká hí af ki ˈdaraannoká.

¹⁷Rúbách Waag hí ˈdaa Kiristo kí shiichééllá úba chiˈdíe. Rúbách kíchia kinaallá hát shóte-, síbil-, máá yuoyo-, ririanká in úba hí ririma. Aaléka, ˈdeeny Waaˈgiet tág chiˈdíe. ˈDeeny kinaallá he faaˈd órof-, Hím Naasan Waaˈgiet hí shigichoká.

¹⁸Hé kinaal hí ekemeychoká aadh lúl Waag gil ki eegefée, viivitíe. Hím Naasan Waaˈgiet hí fargogint hí Waag ki vivisataká shiigicho. Biiy ˈdeeˈdemíe, haí ˈgoróminy, gál Kiristo lulle Waag ki viivitíe.

¹⁹Yú úba ye Waag kí viivitíe, giri aadh lulle yú Fayam Midhaballá ˈdiyeen-, Waag ye ˈdéé af ká fafiyyo-, yú sierm ˈdaabo-, hé kis ˈdaa Fayam Midhaballáka, gaalí moonnoyká yú gáál eiy ki nannuoká.

²⁰Yiesu Kirísto ˈdaa Fayam Midhaballáka, hé ye máá naanne hoy, in káána nyarugano ye ki ˈgee. Ye Waag kí viivitíe, giri yú nyaalilet-, fayamééllá hát ˈdabaanká yú ˈdiyeenká.

²¹Nyár kúnnaa Túkiko, ki giel-, ˈdúwa-, gédéch Máá kúnnaa Guđóóllá, yaalmit yú ki ijoká ubaa hé yú ekemeyoká fayamle lulle haí shigia.

²²Yú hí mú ali ˈdu gáá kakawallá he giri hí yaalmitkínyo maalla-, tá muí gogofsuoká.

²³ˈJaa kúnnaa Waag ubaa Máá kúnnaa Guđo Yiesu Kirísto hí it nyaaramká naanná ubaa iiy yeen gielmít ˈgayyoká shuo.

²⁴Ameeny gál Máá kúnnaa Guđo Yiesu Kirísto gielmit af mé mánká ki gielká Waag hí ˈdú ˈjeeˈjeen.