Read daasanach Filíbi 4 Bible Online

Filíbi 4 - daasanach bible

Filíbi 4

¹Aaléka sheelchú, hé kinaallá he hát hí Máá Guđoká hol chiiratká. Nyaaram chia yú giel-, yú fiiríéllo, itín he geer gaa meenchú ubaa hújích yú nieká héllé yú gaa argeká.

²Yáá Ewúóˈdia ubaa Sintíke gil ki efe-, giri gaal ííni Máá Guđoká iiy yíéllá hol af maaloká.

³Iiy-hí, kó ˈdúwa chia-, hújíchalka, ke hol ˈdú famééllo, ha yú ko ruogone, ˈdaa giri ˈdegééllá Fayam Midhaballáka nyí hol ˈgar laađaanneká, ˈdég ˈdú ˈjeeˈjémo. ˈDegééllá ubaa Keleménto tá gál éíy taaka-, meetle warˈgat luolmitiká gaa ijóóllá hujicho nyí hol ˈgar nanniyye.

⁴Aadh lulle Máá kúnnaa Guđoká ˈdaalleka geeyimíe. Geđi ha yú hí geey, geeyimíe!

⁵Af gáá abuntkícho gálaat lulle hí argo. Máá kúnnaa Guđoká ˈjímle hé tág ˈjób.

⁶Ha hé mákártaká gerle hí gaa ˈdeenêny, tá he lullé il hí aargiˈdoká héllé hí rogononnoká Waag ˈdú eegedhíe, Waag viivitíe, Waag gielmít hol ˈdú naannáa, hé hí Waag gaa feˈdoká heegetíe.

⁷Tá naanna Waaˈgiet giri kas gálaat lulle af mé ˈdú gíriká ger kíchia ubaa kas kíchia itle ubaa Yiesu Kirísto hí hol ˈdú faannééllá in hai ki ˈdeenne.

⁸Nyaaramchú, hé eiy taaka-, úba yú hí ka geđuoká hééllá: Hé ˈdúwaká, hé gaalí kian ka ˈguoká, hé tagléká, hé saas mánká, hé gielmít hí gaa iđoká, tá hé gaa ˈdabaanká aadh lulle mé ka ˈgáa. Iiy-hí, hé súm midhab-, ubaa hé ˈdúwa-, gaalí memeyo-, hatallóóllá, aadh lulle mé ka gáa.

⁹Hé hí ye gaa maalle-, hí ye gaa argiyyeká ubaa hé hí ye gaa onnoteká, eekemeyyíe. Hééllá hí ekemeychoka, Waag naanná ˈgayyoká taalle hollo hí hol ˈgayya.

¹⁰ˈDaa giri waaséél geer chia hí gaa ˈdeeneyká geer guanle geđi hí ye argisicheká, ˈdaa Máá Guđokáka yáá súm geer ye gaa meedhe. Hé ˈduwa, geerchú hé hí gaa ˈdeeney, kor it érléká hé hí ye ká shigicheká ˈdu gáá laanle hátle ˈdabiyye.

¹¹Yú hééllá hogodhóóllá, yáá kieye, He yú ˈdabe, ma yegen. Yaalmit mákárta-, yú ki ijoká hát ye ka gúúđoká hélle yáá onodhe.

¹²Yáá he mánt óg, héétí, yáá he ˈdú burnany óg. Yáá yaalmit ki ijoká hát lulle ye gaa ˈdoyyoká onodhe. Har úba héy gaa ijo yíekaʼ, kuoˈd ˈgaa yíekaʼ, har he ye ˈdú burnab yíekaʼ, he ˈdabiny yíekaʼ, lulle hé ye gaa ˈduo.

¹³Kirísto fargogint ye ka shieká ˈdaalleka, he met lullééllá fargogintle yáá ˈguo.

¹⁴Tá hé ye ki ˈgeeˈgerneyká hát hí ye yiir kí chirateká hé tág midhab.

¹⁵Hé ˈduwa, hát it Filibííllá hí ógká, bár giri er hí Fayam Midhaballá ka chiichirate-, yú Makeˈdónia gaa kekemeká, yáá gál Kiristo ˈjien hí hol ka eiyyeká hé shiicho gaa argeká mán, itín tákáma hé shiicho hí yé gáá ˈdie.

¹⁶Af giri yú Dhesaloníke gaa ijeká, hé ye ki ˈgeeˈgerneyká, hélle ití ye ká shiigiche.

¹⁷Tá yáá íín hí hé shiicho ma gaa ˈgeˈgen, hé yú fedoká he giri gil kíchia hí eiy lalaannóóllá ˈdugaka hé shiicho Waag hí itín úr gáá shigichoká hegeroká.

¹⁸Káána hé shiichokícho Ebafuroˈdíto hí ye ˈdu gáá sidheká, yáá hé ye ki ˈgeeˈgerneyká lulle arge, tá ití ye hé éíy burnayká úba af ˈdú fiiyye. Hé shiichokícho he suor usiyyo-, Waag hí iiy cheget-, Waag geer gaa memesichoká.

¹⁹Waag yú gédéchle yieká, kamurlé uriet-, guđo-, ˈdúúw ˈgayyo-, Yiesu Kirísto yíé gáá ˈdeˈdeenká hé hí ki ˈgierˈgereká lúl haí kí đuusicha.

²⁰ˈJaa kúnnaa Waag guchle taalle bííyyó biiyo gálaat hí meemeyo. Iiy-hí, he hí hát kinaallá yeet.

²¹Gál Yiesu Kirísto iiy yieká lulle ye naa kí yiedhíe. Nyaaram kúnnaa-, nyí hol af iđáállá hé hí naa ká yie.

²²Gál Kiristo-, lullé állá gaa ijóóllá, tá súm gál ˈbíl geer Kaisar,[3] hé hí naa ká yie.

²³Máá kúnnaa Guđo-, Yiesu Kirísto hí ˈdú ˈjeeˈjeen. Iiy-hí, he hí hát kinaallá yeet.