Read daasanach Dhesaloníke Erká 4 Bible Online

Dhesaloníke Erká 4 - daasanach bible

Dhesaloníke Erká 4

¹Nyaaramkínyo, aaléka, Máá kúnnaa Guđo Yíésu ˈdaallé ke hí gil ki efe, ke hí gogofsia, giri hát káána iđiny Waag geer gaa memeychoká hí nyí gaa onnote-, hí ki iđóóllá, yaalmit hat kinaallóóllá af ˈdú faafadhdhíe, ki yíéđía.

²Máá kúnnaa Guđo Yíésu ˈdaalleka hemuumurit ke hí af ki tatieká it óg.

³Hé Waag hí feˈdoká he giri itín gál ˈdúwa-, Waaˈgietká hí chegeto-, hí herginy gálle hol ma shúúnanká hol ká ririato-,

⁴lulkícho hát ˈduwanti-, saas mantiká hí shugunatoká úba hí ógká.[1]

⁵Héétí balt ˈdeew-, gál Waag muogallá hí gaa seseenallá úba hí ma gaa seseminyká.

⁶Máádhat hai nyárlé Kiristoká hé hat kinaallóóllá ki ekêny, ki ˈdeenêny, ˈdaa giri hát ke hí il gíl gaa heliekáka Waag íín yaalmisano hatallóóllá lulle hala hollo hol gáá nanniyya.

⁷Waag íín hé gáál yaalmit gaa nyakaridheká ma kí víiny, iđiny ˈdúwa-, he feˈdoká he gáál kí viiyye.

⁸Aaléka, máá atimééllá điidhoká, hé máádhat ma đíin, Waag ííni hí itín Hím Naasanle shigichóóllá he điidhe.

⁹Aaléka, gielmit gál Kiristo hí hol ká ˈguoká ˈdaalleka, hé níínní hí muog-, yú hí ˈdú gáá verenoká mán, ˈdaa giri itín dhúrkícho yaalmit hí hol ki gegelneteká Waag hí onisicheká.

¹⁰Hé ˈduwa, it gál ˈdaa Kiristoka hol nyaaram-, lés Makeˈdonia lulle gaa ijoká giel. Aaléka, nyaaramkínyo, gillo ke hí ki efe, gielmit kíchia kinaallá af ˈdú faafadhdhíe.

¹¹Héétí hát gál sáa-, olle ma gaa mamadinyká ka yíéđía. Hát kis ke hí geeyká, máádhat hí hélle mé veero, hí gil gerle hujich ki naanuo,

¹²giri itín hí gál gál Kiristo muuninyká innumleka hí hát ˈdabaanká gaa seseen-, hé hí ma ki ˈgeerˈgernenyká.

¹³Nyaaramkínyo, aaléka, yaalmisano gál Yiesu Kiristo kis mán yieká he onisinyle hí muogká nyáá nyí ma fediny, giri itle hát gál mú iiy ma yéen-, uushim yiem gáá ˈdím met esinyle mán-, ger hí gaa ˈdeđenetkáka itín ger hí ma gaa ˈdeđenenká.

¹⁴Yíésu hát he kufe-, tá geđi loolnodhe-, uushich yé gáá ˈdieká hé ke iiy yie, in gál Yíésu iiy yie-, mán yíéllá hát mú ˈdaalleka Waag hí shugunatoká in úba ke iiy yie.

¹⁵Hééllá he ˈdaa ˈdeeny Máá kúnnaa Guđoká hí hodhekáka in ke hí geđia, giri múúni ke luogol-, af giri Máá kúnnaa Guđóóllá hol ka nannaatká hátle ke les ˈdug ˈdú ijoká, ke gál kis kufeká er met ma nannaan-, ke mú ma ˈdú seseminyká.

¹⁶Máá kúnnaa Guđóóllá dhúrle úr hai gáá yiimedhe, kóˈd guđo-, hemurít ˈguoká úr yé hai gáá ˈdeeme, mu máá méte urru-, gassoká afle ubaa faˈd Waaˈgiet shímle hai kí yiimedhe. Tá gál Kirísto iiy yie-, kis mán yieká er uushim yiem hai gáá ˈdeeme.

¹⁷Đueka, múúni ke gál Kiristo-, ke hátle luogol-, ke les ˈdug ˈdú ijoká, tíkíˈdé kinaal ál nyáˈdow hí iđo-, gál uushim yiem gáá ˈdieká hí ijoká Waag haí gáál ˈdú egeete, Máá kúnnaa Guđóóllá úr hollo ke hol gaa aargira. Aaléka, Máá kúnnaa Guđóóllá taalle bííyyo afo ke hol ija.

¹⁸Héétí aaléka, hol ˈdéé hótééllá ki guogofsía.