Read daasanach Dhesaloníke Erká 5 Bible Online

Dhesaloníke Erká 5 - daasanach bible

Dhesaloníke Erká 5

¹Nyaaramkínyo, yaalmitééllá bárle ubaa kúlíchlé ali kí ˈdeennoká héllé níínní hí muog-, ke hí ˈdu gáá verenoká mán.

²Hát káána máá buraalléká aflé buraa ká iyaanká ke muogallá, in úba kúlích Máá kúnnaa Guđóóllá hí gáá ˈjeˈjeenká ke muog. Hé kinaallá it tág óg.

³Af giri gálaat kieye, Hé lulle naanná ubaa hát ˈdabaanká he ija, gaalí yegetká, gaal đo hát geer veerit ˈdalietkáka gáál he illo hí argiyye, gaal hé hát níínní he met kar gaa ˈduoká mán.

⁴Nyaaramkínyo, ˈdaa giri hí bííy gaa dhátká ma gaa iđinyká, kúlích kinaallá hát máá buraalléká hí gáál biirgisuokáka hé hí ma biirgisiny.

⁵Itín lulkícho hí um edhum ubaa um kulich. Múún hé ke gál bííy gaa ongʼoˈdeká ubaa gál bííy chuureká muuniny.

⁶Aaléka, hát gáál ˈbáál ram hí ˈdú ˈjeˈjeennóólláka, ha ram gáál ˈdú ˈjíiny. Kí in bano, met hí gáál ˈdú ˈgie.

⁷Gál rafananká chúúre he rafama, héétí gál bersham hí fafaanká chúúre bersham hí fafama.

⁸Tá múúni ki um kulichká, met hí gáál ˈdú ˈgie. Kí iiy yeen ubaa gielmít hát síbil máá yuoyoká hí bala gaa higisat-, mú ririankáka kí balo gaa hisat. Kí rúbáchkúnno ˈduuwle hát shóte-, síbil-, máá yuoyoká ririankáka kí faat.

⁹Waag múún gáál gálle hosotééllá, idhollé he gáál ˈdú iđimicha muuniny, he giri muun ke Máá kúnnaa Guđo Yiesu Kirísto rubach gaa aargiroká.

¹⁰Mu íín gáál ˈdú kufééllá, har ke les ˈdú ija yíekaʼ, ke kuf yíekaʼ, taalle mú afo ke hol ija.

¹¹Aaléka, hát káána hí gaa iđa-, hí ekemeychóóllá, hol guogofsía, hol yiir gaa chiichiˈdíe.

¹²Nyaaramkínyo, gillo ki hí ki efe, gál hurtkícho hújích Waaˈgiet hát ˈdabaanká gaa nannuo-, ˈdaa Máá kúnnaa Guđóólláka hí met ki ˈgie-, hí af tatúóllá kiikiadhíe.

¹³Hújích gaal hí ki nannuo kinaal ˈdaalle ˈdugaka gáál gál ˈdúwaká ka dhaayyíe, gáál geelnedhíe. Lulkícho hol naanná ki yíéđía.

¹⁴Nyaaramkínyo, héétí ha ki hí gogofsia, gál he ma uu-urinyká af taatáa, gál síéramká guogofsía, gál đááliská yiir gaa chiˈdíe, tá gáál lulle ger gaa gúch aargisía.

¹⁵Máádhat hai hé ˈdeewká héllé ˈdeewká akaˈd madîny, tá aadh lulle hé midhabká hol ki eekemeyyíe, gálaat lulle hé midhabká úba ki eekemeyyíe.

¹⁶Aadh lulle ger hí gaa meemeet,

¹⁷Waag viivitíe.

¹⁸Yaalmisano lullé hí gaa iđaká ˈdaalleka, Waag gielmít hol ˈdú naannáa, ˈdaa giri hééllá ˈdaa Yiesu Kiristoka Waag hí ki feˈdoká.

¹⁹Hím Naasan Waaˈgiet haí hújíchle ka rían.

²⁰ˈDeem Waag hí gálaat ká shigichoká haí egeshêny,

²¹tá he met lulle eiy naanatíe. Hé ˈdúwaká hát ˈdabaanká chiˈdíe,

²²he met lullé gaa nyakarichká hol ka ridhdhíe.

²³Waag naannaká dhúrle hí gál iđiny ˈdúwa-, Waaˈgietká ki ijoká hoycho, hí tawunykícho ubaa sidhamkícho tá gónkícho hát ˈdabaanká chirat, giri Máá kúnnaa Guđo Yiesu Kirísto ká ˈjieka hí ˈdeensen mánká.

²⁴Waag ííni hí ka viiyyééllá he Máá ˈdúwaká. Mu hééllá lulle hai ekemeye.

²⁵Nyaaramkínyo, nyí úba Waag kí viivitíe.

²⁶Gál nyaaram kúnnaa Kiristoká lulle nyí hát gielmitiká naa kí yiedhíe.

²⁷ˈDaa Máá kúnnaa Guđokáka, hééllá ha yú hí kí mure, warˈgatééllá gál nyaaram kúnnaa Kiristoká lulle af ki tuoyyíe.

²⁸Aaléka, Máá kúnnaa Guđo Yiesu Kirísto hí ˈdú ˈjeeˈjeen.