Read daasanach Dhesaloníke ki Naamaká 2 Bible Online

Dhesaloníke ki Naamaká 2 - daasanach bible

Dhesaloníke ki Naamaká 2

¹Nyaaramkínyo, ˈdaa Máá kúnnaa Guđo Yiesu Kirísto hol ká naanle ubaa múún gáál hol ˈdú gáá shuunanle ˈdéé hótle ˈdaalleka, gillo yú hí ki efe,

²ˈdéé hót kerka Waag yé gáá ˈdiiyyeká yíekaʼ, ˈdéé hót máá mákártaká yé gáá ˈdiiyyeká yíekaʼ, héétí warˈgat kerka nyiin nyí ka veeˈde-, kieye, Máá kúnnaa Guđoká kúlíchlé he hol gáá naatká kisso he ali kí ˈdiiyye, úba chegetoká haí mé guđanâny, hí sierm gaa véériny.

³Ha máádhat hí ˈgierim mákártaká ki nyiimísan. Kúlích kinaallá hé ali ma kí ˈdeeminy, ˈdaab Waag af điiny er ali ma kí ˈdíiny-, máá hemuumurit Waaˈgiet điidhe-, Waag hí maanyjasichoká biiy yé ma gáá ˈdíinyká.

⁴Máá kinaallá he máá ameeny hé gaalí waag yeget-, gaalí vivisatká fiichilo-, hol hé kinaal ˈdú ˈduuwayo-, kara ˈBíl Waaˈgiet ˈdú yíéđian-, hol Waag hođuoká.

⁵Hééllá af giri ke hol af ije-, yú hí ka geđieká in inno hí ká bađay?

⁶Máá kídhích Waaˈgietallá fargogint hí momoychoká it óg, giri aleđuđugulle ali kí ˈdiiyyeka biiy yé gáá ˈdeenká.

⁷Máá hemuumurit Waaˈgiet điidhééllá héllé geer geđiká hé kis hújíchle mé gáá kodhdhe. Tá hújíchle lulle hé biiy yé ma gáá ˈdeeminy, ˈdaab fargogint hí momoychoká ali ma gaa síenká.

⁸In aalíáka máá hemuumurit Waaˈgiet điidhééllá biiy yé gáá ˈdeeme. Tá Máá Guđo Yíésu hímlé af ki nannuoká mú hai ki yeese, Yíésu guchlé he kí ˈjeˈjeenká mú ha ki beđita.

⁹Máá hemuumurit Waaˈgiet điidhééllá fargogint Satano kí yiimedhe, in he met lullé fargogínt ˈguo-, gálaat hí aargiro-, hí af ˈdaˈdabo-, hodhoká ekemeye.

¹⁰Mu ameeny hé hodho-, gálaat ki baađisuoká hai kí yiimedhe, gál Waag hí he il ká aargisichoká hai baađisia, ˈdaa giri gaal ˈduuw Waaˈgiet iiy ma yegen-, gielmitle mán-, gaal rúbách Waag hí gálaat shigichoká ma aargirinyká.

¹¹Hééllá ˈdaalle ˈdugaka in Waag gáál hé hódhoká ˈdú haađicha, giri gaal hé hódhoká ˈdúúw hođisatká.

¹²Gál hatallóóllá lulle in Waag hí ˈdéé ki iđimicha, ˈdaa giri gaal hé ˈdúwaká iiy yegetká điđidhan-, hé ˈdeđewká gaa geyyeenká.

¹³It nyaaram kínyaa Máá kúnnaa Guđoká hí gielallo, ˈdaakíchoka aadh lulle Waag gielmít nyí hol ˈdú nanniyyoká taglé. Hééllá he ˈdaa giri itín he gál Waag hí waarate-, hí er rubach shiicheká ˈbáálká. Rúbách hí argiyyééllá, he Waag Hím Naasanle hí itín gál Waag gielká hoyche-, héétí hí hé ˈdúwaká iiy chieká in hí rúbáchallá argiyye.

¹⁴Fayam Midhab ke hí ki ˈdiiyimééllá, in Waag hí rúbáchallá kí viiyye, giri Máá kúnnaa Guđo Yiesu Kirísto hí ˈdúúw gaa aargiˈdoká.

¹⁵Nyaaramkínyo, aaléka, taganokícho ˈdée, he onisiny ke hí af kí onisieká yíekaʼ, he onisiny warˈgatle ke hí ˈdú gáá veereká yíekaʼ, lulle hát ˈdabaanká ki ˈgée, tág chiˈdíe.

¹⁶Aalé Máá kúnnaa Guđo Yiesu Kirísto dhúrle ubaa ˈJaa kúnnaa Waag gáál giel-, ˈdaa ˈdúˈjímle ˈdugaka gáál góf biiyoká ubaa hé midhab ke met egesoká ka shíéllá,

¹⁷hí gúóf shiiguo, hí farguogoyo, giri aadh lulle hé hí ekemeychoká ubaa hé hí hogotoká ˈdúwaká.