Read daasanach Tímote Erká 2 Bible Online

Tímote Erká 2 - daasanach bible

Tímote Erká 2

¹Aaléka, hé erkobká, gillo yú ko ki efe, giri gálaat lulle ˈdaalleka, kuun Waag gil ki egefiyyo-, gáál Waag ki vivisato-, hé gáál ki ˈgierˈgereká Waag rogonon-, tá Waag gielmít hol ˈdú nanniyyoká.

²Waag visan hatallóóllá úba gál les met ki ˈgieká ubaa gállé kaansúoká lúl ki viivíso, giri múún ki yíéđiny taglé-, naanná ˈgayyo-, Waag kian ˈgayyo-, ˈdúwaká ke ki yíéđianká.

³Hééllá innum Waag kúnnaa gáál rubach shigichóólláka, he yíéđiny midhab-, Waag hí gáál ki feˈdoká.

⁴Waag hát feˈdoká he giri gálaat lulle rubach aargiro-, hé ˈdúwa-, Waaˈgietká kiimisat-, eiy nannasatká.

⁵Waag íín tikiˈde, tá Máá gariet-, gálaat ubaa Waag hol higilsuoká úba tikiˈde, hé kinaallá he máá Yiesu Kirísto lé-,

⁶gálaat lulle ˈdaalleka, hol gusse-, gáál ríéllá. Hééllá he ˈdeeny ˈdúwa-, a leđugul Waag hí ki muˈdeká ali kí ˈdieká.

⁷Yú hé ˈdúwaká hogodho, yáá hódho ma hogon. ˈDeenyéél ˈdugaka in Waag ye máá ˈdiiyiminy-, ubaa máá ali gaa kaany-, tá máá gál gál Yuuˈdi muuninyká iiy yeen ubaa hé ˈdúwa-, Waaˈgietká fayamle oonisuoká hoyche.

⁸Aaléka, gál yááb Waaˈgiet alb lúl gaa ijoká hí gille Waag ki eegefo, Waag viivisat. Gaal ídho ubaa hol ki fálaam mánká yú fede.

⁹Héétí gál ˈdiet yaalmit siríg ˈgayyoká hol ki ootoloká yú fede, gáál huraam faan ubaa đafaraam faanle, hí hé taglé-, midhabká onnoyyo. Gaal hai súm metle buukâny, hai huraam ubaa đafaraam him hí súm iigilishká fafáan.

¹⁰Gaal hí húgúm he ekeny midhabká ˈgayyoká hol ki ootolo, hát onnônyka gál ˈdíét-, gálle hol gál Waaˈgiet yegetká hí ijoká.

¹¹Máá ˈdiet hí he onisiny Waaˈgiet álle shab gaa yeeget, hí hát met gaa kimiká he oonoot.

¹²Máá ˈdiet máá yab ˈdeeny Waaˈgiet oonisuo-, ubaa he gil ki mumuˈdoká yáá iiy ma yegen, hí shab cheet.

¹³Hééllá he ˈdaa giri Áˈdam er Waag hí tág niiyye-, Háwa waaséél Waag hí tág niiyyeká.

¹⁴Héétí Áˈdam hé hí nyimiteká mán, minne in he hí nyimite, đo hemurit Waag hí shiicheká ˈdeeneyche.

¹⁵Min hí umle hát ˈdabaanká ki taal. ˈDég har iiy yeenlé Kirísto ka ˈgayyoká ki ˈgiiyyo-, héétí gielmít ubaa iđiny Waag geer gaa memesichoká, tá siríg ˈgayyoka, rubach hai aargiˈda.