Read daasanach Tímote Erká 4 Bible Online

Tímote Erká 4 - daasanach bible

Tímote Erká 4

¹Aalé Hím Naasan Waaˈgiet hé ˈdéé hát ˈdabaanká hogoto, kieye, Bár biiy el ˈdaˈdká gáál ˈbáál iiy yeenlé Kirísto iiy yieká gil sug hai ki haađia, ˈdaa giri gaal aryaan gáál nyiimisatoká ubaa Sátan gállé ˈgassoká he onisinyle el gaa veereká.

²Gál hođomlé-, hol gál ˈduuˈdúwaká hođúóllá hé gál hé ˈdúwaká ubaa hódhoká hol ká muogká yie.

³Gál hođomlééllá gálaat hol shuunan hát kerka ˈdeewká he gálaat geđia, héétí gaal ˈguom Waag hí ká kuonne-, onnônyka gál Waag iiy yie-, Waag ˈduuwle ógká hí hát gielmitiká Waag met gaa egeet-, hí kokuoká he gálaat ká riridhdha.

⁴He met lullé Waag hí ka kuonneká hé midhab, tá har ke hát gielmitiká Waag met gaa eedhdheka, af kinaalka hé hé níínní ke gaa điidhanká mán.

⁵Hééllá he ˈdaa giri ˈdeeny Waaˈgiet muun ke he met lulle kokuoká iiy chie-, tá hé koonyiet kinaal ˈdaalleka, ke Waag ˈgielmít hol ˈdú nannuoká.

⁶Kúún har atimééllá gál nyaaram-, Kiristoká af ki tatiyyoka, in kuun gédéch ˈdúwa-, Yiesu Kiristoká cheedhe. Fayam ke iiy yíéllá ˈdeenyle ubaa he onisiny midhab-, kuuní el gaa veeˈdééllá iiy yeenkú hai higirasicha.

⁷ˈDeeny ˈdúúw mán-, lesalloká ubaa hibano đeemoká hol gáá fagánash. Hol húgúm Waaˈgiet gaa íđish.

⁸Har káána gon ke he oonisuoká á níínni mare midhíntaka, húgúm Waaˈgiet ˈgany hát lullé he midhab. Har ke húgúm Waaˈgiet ˈguoka, báral ubaa bár ka chiimetóótíá luolmit Waag hí gáál af iđicheká ha ke gaa aargira.

⁹Hééllá he ˈdéé hót ˈdúwa-, ke hát ˈdabaanká iiy yegetká.

¹⁰Muun húgúm Waaˈgiet ˈganyo in ke hát ˈdabaanká ˈdú lađama. Hééllá he ˈdaa giri he met esinykúnno ki Waag bííyyo ali iđoká ke gaa iđieká. Waag íínííllá he gálaat lulle Rúbáchlé, tá súm gál hí iiy yieká Rúbáchlé.

¹¹Gálaat ˈdeenyééllá oonísish, af ki táátaʼ.

¹²Rúórmích kuallá ˈdaalleka, gálaat hai ko eeshêny, tá ˈdéé hótkú, he ekenykú, ubaa gielmitkú, tá iiy yeenkú, héétí iđinykú lúl hí húgúm saas manti-, gál Kiristo hí ka ennianká onnoyyo.

¹³ˈDaab yú ma ka yímenká, gáál Warˈgat Waaˈgiet met gaa tuonyle, ubaa gáál guofsiny, tá he onisinyle hol ˈdú sílish.

¹⁴Af giri karu Kiristo ko gil ˈdú fieká hé shiicho Waaˈgiet ˈdaa ˈdeeny Waag hí gaal íín ká shiicheká ˈdaalle ki argiyyeká ha hâny, eekémesh.

¹⁵Hújíchallá hol ˈdú sílish, náánnaʼ, giri gálaat lulle hát kuun iiy yeenkú gaa hirayyeká kiimisatká.

¹⁶Iđiny kua iđoká ubaa he onisiny kua gáál oonisichoká ˈdeeˈdémo, taalle gaa yíéđig, ˈdaa giri hééllá ekeycheka, ˈdéé ki iđiny Waaˈgiet kúún dhúrkú ubaa gál ko af nee kokuoká ha ká riata.