Read daasanach Tímote Erká 6 Bible Online

Tímote Erká 6 - daasanach bible

Tímote Erká 6

¹Ameeny gál Kiristo gaalí géde hoteká, hí gállé hí léká hát lulle gál ˈdúwaká ká dhaaˈgasan, giri Waag meenyle ubaa he onisinyle gaalí ma eeshenyká.

²Gál gédeká har gállé hí hoteká úba gál Kirísto iiy yieká kátaka, ˈdaa giri gaal ˈdaa Kiristoka hol nyaaraká gede hai gáál kian ka ˈdábiny. Hé kinaallá afleka, gede hí hát ˈdabaanká hujichaamlé kinaal naanuo. Gál gede hí hujichaam midhabká ki nannúóllá he gál úba Kirísto iiy yie-, ki gielallá. Atimééllá lulle hé gille kuuní gáál ki egefiyyo-, kuuní gáál oonisichoká.

³Máádhat har he onisinyééllá he onisiny éíy taaka gaa fue-, ˈdéé hót Máá kúnnaa Guđo-, Yiesu Kirísto ˈdúwáállá ubaa he onisiny Waaˈgietallá iiy ma yegenka,

⁴máá kinaallá máá súm ˈdúwaká hol ká dhaˈgama, kor hé hé níínní ogká mán. Mu ˈdeem met ˈdaraan ubaa ˈdéé hót fálaam gaa iđimuoká taalle he fede. Hééllá hé hí yé gáá ˈdeˈdeenká he hinááf, shalal, ˈdeemano ˈdeđewká, tá hodhin ˈdeew-, gálaat ki nannaatká.

⁵Gál hatallóóllá he gál gálaat shalalaam fafuo-, kás hí ˈdeenete-, hé ˈdúwaká gíl sug ki hayká. Gálallá tawunyleka, kerka hol gál Waaˈgiet hoyka, hai kaamuraa, he yegedhe.

⁶Tá máádhat har hát Waag hí feˈdoká ka yíéđian-, héétí hé Waag hí shiicheká hí ka guđíntaka, mu kamur ˈdúwaká he ˈgaa.

⁷Lésallá ke ki ˈdalidheká hé hé níínní ke ká sidheká mán, héétí lésallá ke haađuoká hé hé níínní ke gaa egeetká mán.

⁸Aaléka, har ke hé geere ubaa geleem ki higisatká ki ˈguoka, af kinaalka hé kinaallá hé gáál ka gúúđo.

⁹Tá gál súm kaamurawká fedoká hé ˈdeđew-, tagle muuniny-, ki kaamurawká he ekemeye. Gaal he feditlé đeemo-, burnayye-, gálaat ˈdeđeneychóóllá he hát naar gaal íín dhúrle ˈgiiliˈgayyo-, gáál beđisato-, gáál mé ˈgiidhichoká.

¹⁰Kamúr gielmít he met lullé ˈdeđewká máádhat yé ˈdú ˈdeđicha. Kamúr baltlééllá ˈdugaka in gáál ˈbáál iiy yeenlé Kirísto iiy yieká ˈboiy gaa ˈdie, hol geer ˈdeent burnayyeká ˈdú iđie.

¹¹Aaléka, kó máá Waaˈgietallo, hé kinaallá hol ka río. Iđiny ˈdúwa-, Waag hí feˈdoká ubaa iiy yeen Kirísto ka ˈgayyoká, héétí gielmít ˈgany, mé ki chirsan, tá abúnt ˈgany lulle ˈdú laađámo.

¹²Iiy yeen Kirísto ka ˈgayyóóllá laatlé ˈdúwáállá laađámo. Luolmit biiyo-, Waag hí ko kí viiyye-, kuuní iiy chie-, kuuní gál burnayká hát ˈdabaanká met gaa huogoteká tág chíro.

¹³Waag ííni he lulle luolmít shigichóóllá metle ubaa Yiesu Kirísto giri gaalí Bónti Bilááto ˈdú eey-, mú innumle ˈduuwle gaa huogodheká metle afo yú ko gaa tie,

¹⁴giri hemuritééllá ˈdaab Máá kúnnaa Guđo Yiesu Kirísto hol ma ka náanká hát ˈdabaanká ki taallo-, gaalí ko ma ˈdú ˈdeđensenká.

¹⁵Yiesu Kirísto hol ká naanlééllá, Waag ke memeyo-, íín tákámle gúch ˈgayyóóllá aleđuđugullé he muˈdeká in ali kí ˈdeeme. Waag kúnnaallá he Kánsích kansím lulle mé ki yaalká.

¹⁶Mu íín tákáma he Máá ma kufuminy-, édhúm ki ma kí ˈjoobononká gaa ijoká. Mú hé kálta máá hí argeká mán. Máádhat hé fargogint níínní ˈguo-, mú ki aargiroká mán. ˈDuuw ubaa guch biiyoká hí mú hélle yeet. Iiy-hí, he hí hát kinaallá yeet.

¹⁷Gál lésalláka kaamúreká af táátaʼ, gaal hai hol egêny, hai kamur el mé mánnallá ˈdúúw hóson. Gaal hí Waag gáál he met lulle ká shigicho-, ke gaa geyyeenallá ˈdúúw hosot.

¹⁸Gáál géesh, gaal hí hé midhabká eekemeyo. Hé midhab gaalí eekemeyóóllá hí hé burnayká yeet. Gaal hí ger gaa ˈdabanaw, gálaat héllé hí ki ˈgierˈgereká úba ˈdú chiichirat.

¹⁹Gaal har he húgúmallá ˈguoka, in el meeny ˈdúwa-, biiy meto-, ˈdú seseenatíá kamúr gaa iđimia, giri luolmit ˈdúwaká higiloká.

²⁰Tímote, hújích Waag hí ko af kí haychééllá in ki ˈdé. Awaach ˈdúúw mán-, gál hé Waaˈgiet egesheyoká hí ˈdaraanká ubaa he onisiny gaalí ˈdaalím yeget-, kor ˈdaalím muuniny-, he onisiny Waaˈgiet hol ma ˈdú fafaminyallá hol gáá fagánash.

²¹Gáál ˈbaal he onisiny hódhóóllá he iiy yie. Gaal hé he onisiny ˈdúwa-, Kiristóóllá ˈboiy gaa ˈdie. Lulkícho Waag hí ˈdú ˈjeeˈjeen.