Read daasanach Tímote ki Naamaká 1 Bible Online

Tímote ki Naamaká 1 - daasanach bible

Tímote ki Naamaká 1

¹Yú he Báulo, máá Waag hát hí ki feˈdeká hí máá ali gaa kaany-, Yiesu Kiristoká hoycheká. Yú Waag he af iđinylé gálaat ki ˈdiyime, giri gál Yiesu Kirísto iiy yegetká luolmit biiyoká aargiroká.

²Warˈgatééllá kó iny chia yú ko giel-, Tímote lééllá yú ko ˈdu gáá verene. ˈJaa kúnnaa Waag ubaa Máá kúnnaa Guđo Yiesu Kirísto hí ko ˈdú ˈjeeˈjeen, hí ko geer guurá aargisuo, hí ko naanná shiiguo.

³Yú Waag eshim eshimchú hí hujich ki nanníéllá in hát yú óg-, midhabká yú hujich ki nannaa. Yú chúúre ubaa kulich Waag vivisatká yáá ko Waag visanchú táb gaa ˈdoˈdoot, Waag gielmít hol ˈdú nannuo.

⁴Imiro kua ˈgayyeká yáá mé ká ˈguo. Yáá tág ko fiirie, ko aargiroká fedo, giri geer súm ye gaa memeetká.

⁵Héétí iiy yeen kua ˈdúwa-, đunu kua Lóis ubaa ˈjie kua Yúnike hí ˈgie-, tá káána yú óg-, kuuní úba ˈgayyóóllá yáá mé ká ˈguo.

⁶Aaléka, hé shiicho Waaˈgiet gil yú ko ˈdú fieká ˈdaalle ki argiyyeká tábo yú ko kí gadhe, taalle ˈjiet kinaallá ki náánnaʼ.

⁷Waag hé muun gáál hodhin siermoká ma ka shíiny. Hodhin muí gáál ka shieká, he hodhin fargogínt, ubaa gielmít, tá ˈdaalím ˈgayyoká.

⁸Aaléka, Máá kúnnaa Guđóóllá fayamle ˈdiyeennoká kern hai ko ˈgíˈgin, héétí yáá mú ˈdaalleka hiigin gaa ijóóllá yaalmit chiallá hai úba ko kern ˈgidhîny. Tá ˈdaa fargogint Waaˈgietka, Fayam Midhaballá manyjanyle kí hol ˈgar maanyjaw.

⁹Waagééllá in muun gáál rubach shiiche, gáál yíéđiny hí geer gaa memesichoká kí viiyye. Hééllá Waag hí muun gáál ki ekeychééllá he hé kieye, muun hé mákárta-, midhabká ki ekey, muuniny. Waag hátlé les ma ka kúóninyká hé hééllá mé ka ˈgayye, giri ˈdúˈjímle ˈdaa Yiesu Kiristoka muun gáál ka shigichoká.

¹⁰Aalé káánaka, ˈdaa Máá kúnnaa Rubachiet-, gáál ˈdu gáá yimie-, Yiesu Kirísto léélláka, Waag hé muun gáál ˈdúˈjímle yé ˈdu gáá ˈdeeyche. Yiesu Kirístóóllá ííni kúfach fargogintle mán hoy, ˈdaa Fayamlé Midhaballáka, gálaat ˈgíérích luolmit biiyoká kí edhesie.

¹¹He ˈdaa Fayam Midhaballáka in Waag ye ká eeyye, ye máállé ali gaa kaany-, gálaat fayamééllá ki ˈdiyeen-, ubaa ˈdeeny lééllá gálaat oonisuoká hoyche.

¹²Hé kinaallá ˈdaalleka in yú manyjany gaa ija. Tá yú yáá kern ye ma ˈgiˈgin, ˈdaa giri Máá yú iiy yíéllá yú ógká. Tá ˈdaab kúlích biiy el ˈdaˈdká hátlé ali ma kí ˈdíinyká mu hújích ye gíl geer gáá kaayallá hát in ki ˈdeenká gon yáá óg.

¹³Gálaat oonisichoká, he onisiny ˈdúwa-, ye gaa maallééllá yaalmitle énnig, Yiesu Kirísto taalle iiy áat, gielmit Kirísto hí ko aargisúóllá gálaat ki géélneb.

¹⁴Hújích ˈdúwa-, Waag hí ko gíl geer gáá kaayyééllá, fargogint Hím Naasan Waaˈgiet muun gáál gaa iđóóllá ˈdaalleka in ki ˈdé.

¹⁵Kuun gál Asia lulle hát ye el af gaa tameká kó óg. Gál kinaallá ˈbaal hí mú Fugélo ubaa Hermogénes.

¹⁶ˈBíl geer Onesiforos Máá kúnnaa Guđóóllá hí geer guurá aargisuo, ˈdaa giri mu ye a burnayká ki yiel-, nyárug ye ki taalallá ˈdugaka kern hí ma ˈgíˈginká.

¹⁷Mu af giri Róóma kí ˈjieká, tágo ye hol gaa ˈgeˈgedhe, in ˈjíig ye shuunne.

¹⁸Kúlích biiy el ˈdaˈd-, Máá kúnnaa Guđóóllá hí gálaat hol eiy gaa nannuoká, mú Máá kúnnaa Guđóóllá hí geer guurá argisuo. Mu hát Eféso álle ye a burnayká hujich kí chichiˈdeká úba kó tág óg.