Read daasanach Tímote ki Naamaká 2 Bible Online

Tímote ki Naamaká 2 - daasanach bible

Tímote ki Naamaká 2

¹Aaléka, kó iny chiallo, ˈdúˈjím Yiesu Kirísto gaa iđóóllá far ki gógob.

²Héétí hé yú gál burnayká met gaa huogodhe-, ye af gaa maalleká, gál ˈdúwa-, ko af ˈduuwayo-, gál éíy taaka úba hé kinaal oonisuoká uroká af ki hash.

³Manyjany áwle ki gaa ijóólláka hát máá yuoyo-, Yiesu Kiristo-, ˈdúwaká ka yíéđig, mé ki chírso.

⁴ˈDaa giri máá yuoyo-, máállé hí mé ki yaalká geer gaa memesuoká fedoká, in hújíchle gaa yaalka, ˈdeem gabarich hursam ma higiliny.

⁵Hát tikiˈdééllá máá đuuloká har đúla yaalmisanolle el ma gaa veerinyka, hé hé shiicho-, đuuloká ma aargiriny.

⁶Máá les fafuo-, símis dhiireká, ííni ˈguom er hiteká kokoo.

⁷Ebá hé yú hogodhóóllá táwug! Máá kúnnaa Guđoká hééllá lulle eiy naasanle ha ko shigia.

⁸Yiesu Kirísto giri ˈbíl íl ˈDawuˈd-, uushich yé gáá ˈdie-, Fayamlé Midhab-, yú ˈdiyeenallá mé ká ˈgab.

⁹Fayam Midhaballá he Fayam yú ˈdú manyjay-, yú hát máá he ˈdeeneykáka káána nyarugano ye ki ˈgíéllá. Tá ˈdeeny Waaˈgiet íín hé nyarugano hí ma ki ˈgiiny.

¹⁰Aalé gál Waag hí waarateká ˈdaalle ˈdugaka, yú he met lullé mé ki chiirta, giri gaal íín úba rúbách Yiesu Kirísto hí gáál shiguo-, ˈduuwle bííyyóóllá aargiroká.

¹¹ˈDéé hót ˈdúwa-, ke ˈdúúw hođisatká he ˈdeeny kieye, Muun ke mú hol ˈgar kufeka, áwle mú afo ke hol yíéđima.

¹²Muun ke mé ki chirteka, mú guchle áwle mú he ˈgarro ke hol mumura. Muun ke mú điidheka, mu úba hai gáál điidhma.

¹³Muun har úba káána ke hé ˈduwantiká ma ekenyka, mu íín kír taalle hátlé ˈduwantiká kír he ija, ˈdaa giri mu hol ma gaa sorominyká.

¹⁴Gáál hééllá mé gaa káab, gáál Waag metle hát ˈdabaanká gaa géesh, giri gaal ˈdéé hót hol ki fáláámle hurt ma higilinyká. Hol ki fálaam hatallóóllá hé hé níínní midhab hí yé gáá ˈdeˈdeenká mán, gál hí nee kokuoká he baađisicha.

¹⁵Hát ˈdabaanká laađámo, giri Waag innumle kí ˈdeˈdeenno-, Waag geer gaa memesichoká. Máá hújíchlé nannuoká midhab-, kern hí ma ˈgiˈgin-, ˈdeeny Waaˈgiet ˈdúwáállá hát ˈdabaanká eiy nannasat-, gálaat oonisuoká áat.

¹⁶Awaach đeemo-, gál Waag ma kikianká hí ˈdaraanká hol gáá fagánash, ˈdaa giri awaach hatallóóllá geđi úba súm gálaat húgúm ˈdeew-, gálle Waag eesheyoká yé ˈdú ˈdeđichoká.

¹⁷Awaach hatallóóllá hát lilo ˈgoˈgodhon-, fafaatká he ká yaalla. Gál húgúm hatallóóllá ˈguoká he Heméneyas ubaa Felétos,

¹⁸giri hé ˈdúwa-, Waaˈgietká ˈboiy gaa ˈdie-, kieye, Waag gálaat uushim yé gaa ˈdeenyle kisso he đuyye, yegetallá. Hatallá in gaal gáál ˈbaal iiy yeenle eiy fufue.

¹⁹Tá Waag ˈduuwle állé he taalla, hát ár ˈbíl hurt gaa yaal-, ma niinginy-, ˈdugle gaalí ˈdéé hót kieye, Máá Guđo Waag gál he léká hé óg,[1] héétí, Ameeny máá Máá Guđo Waag vivisatká hí ađaabanolle hayo,[2] chieká, gaa veereká.

²⁰ˈBíl súm guđoká shokodaamlé hí gaa ijoká hé hórkí ubaa sibilaam ííkarská tákámle muuniny, hé shokodaam gaalí ˈguor ubaa sháˈd tagano gaa nieká úba hí gaa ijo. Shokodaamééllá ˈbaal he naasan mákárta-, ˈdúwaká gaalí tág ki nannata, ˈbaal hújích aađaká gaalí tág ki nannata.

²¹Tá máádhat har hé ˈdeđew-, Waag hí ma fedinyallá hol ká ridhdheka, mu hát hé ˈdúwa-, Máá kúnnaa Guđóóllá hí hol taak ki koy-, hí hújíchle ki nannasatká hai yeedhe. Máá hatallóóllá hé tág yaal, giri Máá Guđoká hujichaamlé hí shieká lulle hát ˈdabaanká nannuoká.

²²Aaléka, balt gál rúóreká hí ˈguoká hash, hé Waag geer gaa memesuoká, ubaa iiy yeen, tá gielmíti, héétí naanná bala ˈdú naʼ, ˈdú laađámo. Kuun ubaa gál Máá kúnnaa Guđoká hodhinaam saas mánká ki vivisatká hol ˈgar laađamíe.

²³ˈDeem met ˈdony đeemo-, nyag mánká hol gáá fagánash, ˈdaa giri hééllá hát hol shalal fím yé ˈdú ˈdeˈdeenká kuuní ógká.

²⁴Gédéch Máá kúnnaa Guđoká hai máá shalal ˈguoká onnôny, mu hí máá gálaat nog ki seseen-, gálaat hát ˈdaalimietká he oonisuoká uro-, geer gaa gúch ˈguoká onnow.

²⁵Héétí hí máá gál hí mé il gaa ˈgieká hát abuntiká af tatuoká onnow. Kálmaréél gál kinaal hodhinaamle Waag đig haí cheedhe, gaal Waag makan hai faama, hé ˈduwa-, Waaˈgietká hai oonoodho,

²⁶kas midhabká hollo hí hol ˈdú gáá naata, Sátan naarle kar hai gaa ˈdarama. Gálallá he gál Sátan hí uune-, Sátan hátlé feˈdoká hí ki seseennoká.